د طالبانو کورنیو چارو وزارت وايي، د پکتیا ولایت په ډنډ پټان ولسوالۍ کې یې د کشفي عملیاتو پر مهال یو شمېر وسلې او مهمات نیولي چې پاکستان ته قاچاق کېدل. په دغو مهماتو کې ۸ زره د واړه ماشینګڼ مرمۍ، ۱۲ لاسي بمونه او ۵۰۰ د دهشکې مرمۍ شاملې دي.
په ترلاسه شویو وسلو کې ۵ میله تومانچې او د هغو ۵۰ مرمۍ هم شاملې دي.
د دغې پېښې په تړاو تر اوسه پورې څوک نه دي نیول شوي، خو د طالبانو د کورنیو چارو وزارت په اېکس کې لیکلي، چې د خپلو کشفي سرچینو له لارې یې د عاملینو هویت تثبیت کړی دی.
د طالبانو دفاع وزارت خبر ورکړی، چې تخنیکرانو یې یوه ایمای-۱۷ چورلکه په بشپړ ډول ترمیم او الوتنې ته چمتو کړې ده. وزارت ویلي، چې دغه چورلکه د ۱۳ میاشتو په لړ کې په اساسي ډول ترمیم شوې ده.
د طالبانو د دفاع وزارت نن یکشنبه، د چنګاښ پر ۲۸مه وویل، چې په دې موده کې پر چورلکه بېلابېلې تخنیکي ازموینې او تخصصي ارزونې شوې دي څو په خوندي ډول الوتنې ته چمتو شي.
یاد وزارت ټینګار کړی، چې د هوايي وسایطو د ترمیم، بیا رغونې او چمتو کولو لړۍ به په دوامداره توګه روانه وساتي.
طالبانو د دغې چورلکې بیا رغول له خپله اړخه د هوايي او دفاعي ځواکونو د عملیاتي وړتیا او چمتووالي د کچې د لوړولو او پیاوړتیا په لاره کې یو مهم ګام بللی دی.
طالبانو تر دې وړاندې هم د مخکیني حکومت د یو شمېر نورو ویجاړو او زیانمنو شویو الوتکو او هلیکوپترو د ترمیمولو خبرونه ورکړي وو.
طالبانو په دې وروستیو کې له روسیې سره د پوځي او تخنیکي همکاریو یو تړون لاسلیک کړی دی.
د افغانستان لپاره د روسیې ځانګړي استازي ضمیر کابلوف ددغه تړون په اړه ویلي، چې له طالبانو سره د مسکو پوځي او تخنیکي هوکړه لیک په افغانستان کې د پخوانیو روسي پوځي وسایلو او چورلکو د ترمیم لپاره دی.
د طالبانو د اطلاعاتو او کلتور وزارت معیین پر سوداګرو او پانګوالو غږ کړی چې د ځوانانو لپاره د کاري فرصتونو په برابرولو کې خپله ونډه واخلي. نوموړي ویلي، چې «د حکومت تر څنګ خصوصي سکتور هم د کارموندنې مسوولیت لري». عام خلک نیوکه کوي، چې طالبان په ادارو کې یوازې خپل کسان ګوماري.
د طالبانو د اطلاعاتو او کلتور وزارت نن یکشنبه، د چنګاښ پر ۲۸مه په اېکس کې لیکلي، چې ددې وزارت معین مهاجر فراهي ویلي، چې سوداګر او پانګوال باید د ځوانانو د بېکارۍ ستونزې ته «جدي پاملرنه» وکړي.
هغه زیاته کړې چې اړوندې دولتي ادارې مکلفې دي پانګوالو ته لازمې اسانتیاوې برابرې کړي څو په هېواد کې د بېکارۍ کچه راټیټه شي.
د طالبانو دغه چارواکي ویلي چې د اسانتیاوو په رامنځته کولو سره به ځوانان مجبور نه شي چې د یوې مړۍ ډوډۍ د پیدا کولو په تکل په سختو لارو بهرنیو هېوادونو ته لاړ شي.
هغه له ټولو سوداګرو غوښتي چې په دې برخه کې خپل مسوولیت ادا کړي.
په افغانستان کې د طالبانو له بیا واکمنېدو وروسته د بېکارۍ او اقتصادي ستونزو کچه په بېساري ډول لوړه شوې ده. ډېری ځوانان د کار د نشتوالي او بېوزلۍ له امله اړ شوي چې هېواد پرېږدي او په ناقانونه توګه ګاونډیو هېوادونو ته سفر وکړي.
د طالبانو پر ادارې نیوکې دي، چې په ادارو کې خپلو کسانو او جنګیالیو ته کاري فرصتونه ور کوي او د نورو ځوانانو پر وړاندې یې سخت شرایط وضع کړي دي.
په خوست کې ځايي سرچینو افغانستان انټرنشنل ته وویل، چې ناپېژانده وسلهوالو تېره شپه د خوست په مرکز ۱۲ فامیلو سیمه کې د کي پي ایف ځواکونو یو پخوانی غړی ننګیالی چې په لالو مشهور و، وژلی دی. ننګیالي تازه له امریکا څخه خوست ته تللی و.
په خوست کې ځايي سرچینو نن یکشنبه، د چنګاښ پر ۲۸مه وویل، چې ننیګیالی د مخکیني حکومت له پرځېدو وروسته له خپلو درې وروڼو سره، چې هغوی هم د کي پي ایف غړي ول، له خپلو کورنیو سره امریکا ته تللی و.
د سرچینو په وینا، ننیکالی یوه اونۍ مخکې له امریکا څخه خوست ته ستون شوی و.
ننګیالی د خوست مرکز متون د حبشخېلو سیمې اصلي اوسېدونکی دی او جنازه یې هم نن په همدې سیمه خارو ته سپارل شوې ده.
طالبانو تراوسه ددې پيښې په اړه کوم غبرګون نه دی ښودلی.
د معلوماتو له مخې، دوه کاله وړاندې د ننګیالي کشر ورور سید نظر هم ناپېژاندو وسله والو په خوست کې ترور کړی و.
د ۱۴۰۳ کال د غبرګولي پر ۸مه په خوست کې ځايي سرچینو افغانستان انټرنشنل ـ پښتو ته ویلي وو، چې د امریکا د استخباراتي ادارې له لوري روژل شوي ۷۳ پخواني د کی پي اېف نظامیان د طالبانو د استخباراتو په زندان کې دي.
هغه وخت ځینو کورنیو ویلي وو، چې د خوست په مرکز او ولسوالیو کې د طالبانو د استخباراتو مسولانو د کي پي اېف د پخوانیو غړو کورنۍ په مرګ ګواښلې دي، چې د کورنۍ غړي له امریکا څخه راوغواړي او له ځینو کورنیو څخه د جزیې په شکل پیسې اخیستل شوې دي.
د کی پي ایف دغه پخواني غړی پر داسې مهال ترور کېږي، چې د طالبانو له بیا واک ته رسېدو سره سم د دغې ډلې مشر ملا هبت الله اخوندزاده د عمومي بښنې اعلان وکړ؛ خو د راپورونو پر بنسټ د کی پي اېف پر غړو سربېره د ملي اردو، ملي پولیسو او ملي امنیت یو شمېر پخواني سرتېري او کارکوونکي د دغې ډلې له خوا نیول شوي، شکنجه شوي او یا وژل شوي دي.
کی پي اېف یا د خوست ولایتي ساتندویه ځواک
د خوست ولایتي ځواکونه چې په کی پي ایف ځواکونو مشهور دي، په دغه ولایت کې د امریکايي استخباراتو مرکز له لوري طرحه او جوړ شول.
د دې ځواک غړي یوازې د خوست اوسېدونکي وو، چې د امریکا له خوا په پرمختللو نظامي تجهیزاتو سمبال وو او لوړ معاش یې درلود.ددغو ځواکونو شمېر شاوخوا اووه زره ته رسېده، خو د استخباراتي او ملکي کارکونکو شمېر په اړه یې کره معلومات نشته.
دا قطعه په خوست کې د سي ای اې مرکز له خوا رهبري کېده، او ویل کېدل، چې پر دوی د افغانستان هېڅ امنیتي ادارې واک نه درلود. طالبانو ته هم دغو ځواکونو تر ټولو ډېره مرګ ژوبله اړوله.
سیمه ییزو سرچینو افغانستان انټرنشنل ته وویل چې ناپېژاندو وسله والو د یکشنبې په سهار د بدخشان ولایت په خواهان ولسوالۍ کې د طالبانو پر یوه سرحدي کنډک برید کړی دی. د سرچینو په وینا، طالبانو یو شمېر ځايي اوسېدونکي د دغه برید په تور نیولي دي.
سرچینو زیاته کړې چې دغه سرحدي کنډک د شپې شاوخوا ۲ بجې په راکټونو او څو ډوله وسلو په نښه شوی دی.
د سرچینو د معلوماتو له مخې طالبانو تر دې برید وروسته یو شمېر ځوانان هم نیول دي. په نیول شویو کسانو کې پخوانی پوځي جهانګیر رحماني، ښوونکی نور محمد، حبیبالرحمان رستمي او عبدالستار په ګډون سیمه ییز اوسېدونکي هم شامل دي.
تر اوسه کومې ډلې د دې برید مسوولیت پر غاړه نه دی اخیستی.
سرچینو وویل چې طالب ځواکونو د تورنو کسانو د نیولو پر مهال هغوی وهلي ټکولي او شکنجه کړي دي. سرچینو همدارنګه زیاته کړه چې نیول شوي کسان د سیمې د مشرانو او اوسېدونکو له منځګړیتوب وروسته د طالبانو له بنده خوشې شول.
له دې سره سره، طالب ځواکونو د بنديانو له خوشې کېدو څو ساعته وروسته، یو ځل بیا په خواهان ولسوالۍ کې د پخواني پوځي جهانګیر رحماني کور ته ورغلل او هغه یې بیا ونیوه.
دوه ورځې وړاندې د سپاهیانو جبهې د بدخشان د یفتل پایین ولسوالۍ سقوط کړې وه او طالب ځواکونه یې بې وسلې کړي وو.
د ایران کرمان ولایت د ۲۴ افغان سوداګرو کوربه دی. ټاکل شوې د دواړو هېوادونو اقتصادي فعالان د کانونو، کرنې، لوژستیک، پانګونې او سوداګریزو همکاریو پر پراختیا خبرې وکړي. د کرمان د سوداګرۍ خونې رییس افغانستان د ګډې پانګونې او صادراتو لپاره مهم بازار بللی دی.
د کرمان د سوداګرۍ خونې رییس سیدمهدي طبیبزاده ایرنا اژانس ته ویلي، چې افغانستان د جغرافیایي نږدېوالي او ګډو فرهنګي او ژبنیو ځانګړتیاوو له امله د صادراتو او ګډې پانګونې لپاره یو مهم بازار دی.
د هغه په وینا، د «کرمان او افغانستان د اقتصادي همکاریو پراختیا» پروګرام به د چنګاښ له ۳۰مې د زمري تر لومړۍ نېټې پورې ترسره شي.
په دې پروګرام کې د افغانستان د بازار د معرفۍ غونډه، سوداګریزې ناستې، د ګمرک، لوژستیک، سوداګریزو قراردادونو او مالي راکړو ورکړو په اړه ورکشاپونه شامل دي.
طبیبزاده زیاته کړې چې د کرمان د اقتصادي ظرفیتونو معرفي کول، د صادراتو پراختیا، د ګډې پانګونې فرصتونو پېژندنه او د همکاریو د هوکړه لیکونو لاسلیکول د دې پروګرام له مهمو موخو څخه دي.
ایران او طالبانو په وروستیو کلونو کې د سوداګرۍ، ترانزیټ او ګډې پانګونې د پراختیا لپاره خپلې اقتصادي اړیکې پراخې کړې دي.