د طالبانو د ریاست الوزرا اقتصادي معاونیت وايي، چې د روان کال په ترڅ کې د ۱۴ مېلیون ډالرو په ارزښت شاوخوا ۷۶۰زره متره مربع افغاني غالۍ بهر ته صادرې شوې دي. طالبانو زیاته کړې، چې د افغانستان د غالیو په صنعت کې په مستقیم او نامستقیم ډول شاوخوا یو مېلیون کسان په کار بوخت دي.
د طالبانو د ریاست الوزرا اقتصادي معاونیت ویلي، چې دغه غالۍ اروپایي، عربي، افریقایي هېوادونو او دغه راز ترکیې، امریکا، کاناډا، اسټرالیا او روسیې ته صادرې شوې دي. د غالۍ اوبدلو صنعتي شرکتونو زیاته کړې، چې افغاني غالۍ دامهال یوازې د کورونو د ښکلا لپاره نه؛ بلکې د ډېرو افغانانو د ورځني ژوند د پرمخ وړلو د ګټې وټې سرچینه هم ګڼل کېږي.
افغانستان د نړۍ له هغه هېوادونو دی، چې لاسي اوبدل شوې غالۍ یې د لوړ کیفیت، ښکلو نقشو او طبیعي وړیو له امله نړۍوال شهرت لري. سوداګر وایي، چې د بازار موندنې، مستقیمو صادراتو او نړۍوالو نندارتونونو له لارې د دغه صنعت د پراختیا هڅې روانې دي.
د افغانستان د غالیو د تولیدوونکو او صادرونکو ټولنې مشر وايي، افغاني غالۍ دامهال د نړۍ لږترلږه ۳۷ هېوادونو ته صادرېږي. عبدالله رحمانقل ویلي، د غالیو اوبدلو صنعت په شمالي ولایتونو کې د شاوخوا ۱۵زره کسانو لپاره د کار زمینه برابره کړې چې ډېری برخه یې ښځې دي.
