په پاکستان کې د تېلو (پټرولو او ډيزلو) د پمپونو د مالکانو ټولنې د سې شنبې په ورځ له حکومت سره د تېلو د ورځنيو بیو په اړه د خبرو اترو له ناکامېدو وروسته، په ټول هېواد کې کاربندیز اعلان کړی دی.
د ځايي رسنيو د راپورونو له مخې، د تېلو د مرکزي وزير علي پروېز ملک په مشرۍ د حکومت له مذاکراتي ټیم سره له کتنې وروسته، د یادې ټولنې استازو رسنیو ته وویل چې د تېلو د ورځنيو بييو د میکانیزم په اړه د دوی یو ساعت اوږدې خبرې وشوې خو کومې موافقې ته ورنه رسېدل او له همدې امله دوی بله لاره نه درلوده پرته له دې چې کاربندیز وکړي، ځکه د دوی په وینا چې دا د دوی د بقا مسله وه.
د ټولنې مشر همایون خان وويل، چې په ورځني ډول د تېلو بييو ته د بیاکتنې په اړه د حکومت پلان «د تېلو د پمپونو د مالکانو لپاره د منلو وړ نه دی او دا د عملي کېدو وړ هم نه دی».
هغه وویل د دوی اصلي غوښتنه دا وه چې د تېلو بيې باید په میاشتني ډول وټاکل شي، او زیاته یې کړه چې د تېلو د کاروباريانو د کمېشن د زیاتوالي په اړه د دوی پخوانۍ غوښتنه لا هم پاتې ده، ځکه چې دا کمېشن د تېرو درېیو کلونو راهیسې کنګل شوی دی.
په ورته وخت کې، خان وویل چې د پټرول پمپونو مالکان لا دمخه د تیلو او ګازو د تنظیم کونکي ادارې (اوګرا)، د تیلو د بازارموندنې شرکتونو او د حکومت د پالیسیو د مختلفو فشارونو له امله له «سختو مالي ننګونو» سره مخ دي.
هغه وویل: «د ورځنيو بيو میکانیزم ګډوډی رامنځته کړی او زموږ هغه سوداګري یې له منځه وړې چې لا دمخه په لږه ګټه روانه وه».
د تېلو د پمپونو مالکانو ددغې سره اړونده اعتراضونه هم وړاندې کړي دي.
د تېلو د پمپونو مالکانو کاربنديز پر داسې مهال اعلان کړ چې تېره اوونۍ په اسلاماباد کې یوې خبري غونډې ته د وینا پر مهال د پاکستان د تېلو مرکزي وزیر علي پروېز ملک اعلان کړی و چې د تېلو او ګازو د تنظیم اداره (اوګرا) به له دې وروسته د اوو ورځو پر ځای هره ورځ د تېلو بیې ټاکي.
د امریکا او ايران د جګړې پيل کېدو راهيسې په پاکستان کې د تېلو بيې ډېرې لوړې شوي دي.
