د اسټرالیا په کوینزلنډ ایالت کې د افغانانو ټولنې د «د خلکو پیاوړتیا، د کوینزلنډ پیاوړتیا» په نندارتون کې د ګډون سربېره د افغانستان ځانګړی فرهنګي غرفه جوړه کړې وه او د لسګونو نورو بنسټونو، ټولنو او فرهنګي ډلو ترڅنګ یې د افغان کلتور او دودونو بېلابېل اړخونه نندارې ته وړاندې کړل.
دغه نندارتون د ټولنیز یووالي د پیاوړتیا، د څو فرهنګیزم د ودې او د کوینزلنډ ایالت د فرهنګي تنوع د معرفي کولو په موخه جوړ شوی و. په دې پروګرام کې بېلابېلو ټولنو د خپلو دودیزو جامو، سیمهییزو خوړو، لاسي صنایعو، موسیقۍ، ولسي نڅاوو او فرهنګي نندارو له لارې خپل هویت او تاریخي شالید له لیدونکو سره شریک کړ.
د افغانستان فرهنګي غرفې، چې په کې د افغانستان درېرنګه ملي بیرغ، دودیزې جامې، فرهنګي سمبولونه او د هېواد د تاریخ او فرهنګي میراث بېلابېلې برخې نندارې ته اېښودل شوې وې، د ګڼ شمېر لیدونکو پام ځان ته واړاوه.
لیدونکو د دې غرفې په لیدو سره د افغانستان له تاریخ، فرهنګ، هنر او په اسټرالیا کې د افغانانو له ژوند سره اشنايي ترلاسه کړه او د کوینزلنډ د افغانانو د ټولنې له غړو سره یې د خبرو اترو فرصت هم وموند.
د کوینزلنډ د افغانانو ټولنې ویلي، په دغه نندارتون کې ګډون د افغانستان د فرهنګ او هویت د معرفي کولو، له نورو فرهنګي ټولنو سره د اړیکو د پراختیا او په څو فرهنګي اسټرالیايي ټولنه کې د افغانانو د فعال رول د ښودلو لپاره مهم فرصت و.
د یادې ټولنې په وینا، په پام کې لري چې په راتلونکې کې نور فرهنګي، ټولنیز او ښوونیز پروګرامونه هم جوړ کړي، څو د افغانستان د فرهنګ لا پراخ معرفي، د افغانانو د فرهنګي هویت ساتنه او په کوینزلنډ کې د مېشتو افغانانو ګډون په څو فرهنګي پروګرامونو کې لا زیات شي.
د «د خلکو پیاوړتیا، د کوینزلنډ پیاوړتیا» نندارتون د بېلابېلو ټولنو ترمنځ د متقابل تفاهم، درناوي، سولهییز ګډ ژوند او فرهنګي تنوع د لمانځنې په موخه جوړ شوی و او د کوینزلنډ په فرهنګي او ټولنیز ژوند کې یې د کډوالو ټولنو ارزښتناک رول هم روښانه کړ.
