د امریکا ولسمشر ډونالډ ټرمپ ویلي، ښايي پر ایران د «حماسي غوسې» په څېر یو بل پوځي عملیات هم ترسره شي او زیاته کړې یې ده، چې بله لاره د تهران له لوري د یوې هوکړې لاسلیکول دي. هغه ټینګار کړی، که ایراني چارواکي هوښیار وي، جدي خبرې اترې به پیل کړي.
د عوامي نېشنل ګوند مشر میا افتخار حسین وايي، پاکستان او افغانستان باید د خپلو ستونزو د حل لپاره خبرو ته دوام ورکړي، ځکه د دواړو هېوادونو ترمنځ اختلافات د جګړې له لارې نه حل کېږي.
ملګرو ملتونو په اردن کې د کلیسا دننه د جنازې پر مراسمو برید غندلی، چې له امله یې اووه کسان وژل شوي او یو شمېر نور ټپیان شوي دي. دغه سازمان د برید د عاملانو د پېژندلو او د قانون منګولو ته د سپارلو غوښتنه کړې ده.
د ملګرو ملتونو د اټومي انرژۍ نړیوالې ادارې مشر رافایل ګروسي، د ایران د اټومي پروګرام په اړه د ډیپلوماټیکو خبرو د بیا پیل غوښتنه کړې او خبرداری یې ورکړی چې د اټومي وسلو د نه خپرېدو نړیوال نظام له ګواښ سره مخ دی.
هلمند کې د طالبانو د اطلاعاتو او فرهنګ ریاست خبر ورکړی چې د دغه ولایت په نادعلي ولسوالۍ کې یې امنیتي ځواکونو له پاکستان نه د ۹۵ کارټنه انساني او حیواني درملو د قاچاقي راوړلو مخه نیولې ده.
د ملګرو ملتونو د افغانستان څانګې د دغه سازمان د ۸۱مې کلیزې په مناسبت خپاره کړي پیغام کې ویلي، چې د جګړو، بېوزلۍ، بېځایه کېدو او اقلیمي بدلونونو له امله میلیونونه افغانان لا هم له سختو ستونزو سره مخ دي.
په اردن کې پر یوې کلیسا تر برید وروسته، امریکا له خپلو اتباعو غوښتي چې د پولیسو د زیات حضور تمه ولري، احتیاط وکړي او د دغه هېواد د امنیتي ادارو تازه خبرتیاوې تعقیب کړي.
د افغانستان د کرېکټ تجربه لرونکي الراونډر محمد نبي، چې له ۲۰۰۹ کال راهیسې د هېواد په استازیتوب نړیوال کرېکټ کوي، د زیمبابوې پر وړاندې د درېاړخیزې لوبلړۍ په پایلوبه کې د ۳۰۰ نړیوالو وېکټو تاریخي پړاو ته ورسېد او د افغانستان دویم توپاچوونکی شو چې دا شمېر بشپړوي.
په افغانستان کې د یونیسف استازي تاجالدین اویوال، ویلي چې د اقلیمي فشارونو، د اوبو د تقاضا زیاتوالي، مالي محدودیتونو او د اوبو د ناسم مدیریت له امله د دغه هېواد د اوبو کړکېچ لا پېچلی شوی او پر ماشومانو او ټولنو اغېز کوي.
د یمن د دولت پوځ د جمعې په ورځ (د لړم لومړۍ) اعلان وکړ، چې په تېرو څلورویشتو ساعتونو کې یې د «فجر یمن» په نوم عملیاتو کې د حوثیانو پر مورچو یو زر او ۳۹۲ بریدونه کړي او په «تعز» ولایت کې د له لاسه وتلو سیمو د بېرته نیولو لپاره د دې ډلې هڅې یې ناکامې کړې دي.
اوکراین او روسیې د جمعې په ورځ اعلان وکړ، چې د امریکا د لومړۍ مېرمنې مېلانیا ټرمپ په منځګړیتوب یې د روسیې تر ولکې لاندې په اولشکي ښارګوټي کې پر یوه لنډمهالي اوربند هوکړه کړې ده. د دې هوکړې لهمخې به د اکتوبر پر ۲۷مه اوربند پلی شي، څو له بشري مرستو سربېره بند پاتې کسان وژغورل شي.
د پاکستان او افغانستان ترمنځ د لارو له تړل کېدو یو کال تېر شوی، خو د دواړو هېوادونو ترمنځ سوداګري لا هم بنده ده. د اسلاماباد او د افغان طالبانو ترمنځ په قطر، ترکیې او چین کې د خبرو اترو د څو پړاوونو له ترسره کېدو سره د سوداګرۍ د بېرته پیلولو لپاره هېڅ هوکړه نهده شوې.
پر ایران د امریکا د بیا ځلي برید له پرله پسې تکرارېدونکي خبرداري سره هممهاله؛ د ایران د بهرنیو چارو وزیر ویلي، چې د دغه هېواد ولسمشر مسعود پزشکیان راتلونکې اونۍ مسکو ته سفر کوي. تهران تېره اونۍ د روسیې د بهرنیو چارو د وزیر کوربه وو.
د جرمني د بایرن ایالت لومړي وزیر زودر افغانستان او سوریې ته د هغو کسانو د بېرته شړلو پر دوام ټینګار کړی، چې په باور یې په جرمونو ککړ دي او یا هم د دغه هېواد امنیت ته ګواښ ګڼل کېږي.
د طالبانو د کورنیو چارو وزارت روغتیایي رییس وايي، چې هبتالله اخوندزاده د پولیسو په روغتونونو کې د امربالمعروف وزارت د محتسبانو، نورو کارکوونکو او د هغوی د کورنیو د امتیازي درملنې امر کړی. د هغه په وینا، له دې امله یې مراجعین زیات شوي او شته روغتیايي کارکوونکي یې بسنه نهکوي.
په خیبرپښتونخوا کې د «وفاق المدارس العربیه پاکستان» مشر مولانا حسین احمد د دیني مدرسو په تړاو د ثمر بلور د خبرو غبرګون کې ویلي، له ترهګرۍ سره د دیني مدرسو تړل له حقایقو لرې خبره ده. نوموړي د خیبرپښتونخوا د اطلاعاتو له سلاکارې بلور څخه غوښتي چې له داسې بېبنسټه څرګندونو ډډه وکړي.
د افغانستان د جنبش ګوند مشر عبدالرشید دوستم وایي، چې په افغانستان کې اوسنی «نازک» وضعیت به دوام ونهکړي او په دغه هېواد کې د بنسټیزو او جدي بدلونونو احتمال شته. هغه دغه څرګندونې په استانبول کې د ازبکي ژبې د ملي ورځې په مناسبت یوې غونډې ته کړې دي.
د متحده عربي امارات پخوانۍ ډیپلوماتې لانا نصیبه د ملګرو ملتونو د عمومي منشي څوکۍ ته خپله نوماندي رسماً ثبت کړه. هغې د نړۍ په روانو ناورینونو کې د دغه سازمان اوسنی رول «نندارچي» ته ورته بللی او ژمنه یې کړې، که بریالۍ شوه دا رول به بدل کړي.
د فرانسې د پلازمېنې په سویللویدیځ تراپ ښار کې یوه وسلهوال له موټره په کړو ډزو کې یو تن وژلی او پنځه نور یې ټپیان کړي دي. په ټپیانو کې یوه ۱۲ کلنه نجلۍ هم شامله ده چې اته مرمۍ پرې لګېدلې دي. پولیسو ویلي، چې ۳۹ کلن بریدګر یې له یو شمېر وسلو سره نیولی دی.
ځايي سرچینې افغانستان- انټرنشنل پښتو ته وايي، د بلوچستان د کیچ ولسوالۍ د دښت چیري کنچتي په سیمه کې پر کرنیزو ځمکو د یوه ادعا شوي ډرون برید له امله یو کروندګر وژل شوی او شپږ نور ټپیان شوي دي. دغه برید هغه مهال شوی چې کروندګر پر خپلو کرنیزو چارو بوخت وو.
د خیبر پښتونخوا والي فیصل کریم کنډي ادعا کړې، چې له افغانستان څخه د نړیوالو ځواکونو تر وتلو وروسته پاتې شوې ځینې وسلې د «ترهګرو» لاسونو ته ورغلې دي. هغه همداراز وویل، چې پخوانی اعلی وزیر سهیل اپریدی خوندي دی، خو د هغه د راتلونکي په اړه څوک معلومات نهلري.