اروپايي ټولنې ویلي چې د رسنیو کارکوونکو پر وړاندې تاوتریخوالی او وژنې لا هم جدي ستونزه ده او یوازې په ۲۰۲۵ کال کې ۱۲۹ خبریالان او د رسنیو کارکوونکي وژل شوي، په داسې حال کې چې له ۱۹۹۳ کال راهیسې دا شمېر ۱۹۲۲ ته رسېدلی دی.
د افغانستان لپاره د بریتانیا ځانګړي استازي ریچارډ لینډسي د مطبوعاتو د ازادۍ نړیوالې ورځې په مناسبت ویلي، افغان خبریالان له ستونزو سره سره خپل مهم مسوولیت ته دوام ورکوي او د خلکو اندېښنې او غوښتنې نړۍ ته رسوي.
د طالبانو ریاستالوزرا اقتصادي معاونیت وایي، چې د اقتصادي کمیسیون په وروستۍ غونډه کې ۱۲ نوې پراختیايي پروژې تصویب شوې دي، چې ډېری یې د برېښنا د تولید او لېږد له سکټور سره تړاو لري.
د پاکستان جمعیت علماء اسلام ګوند د بلوچستان څانګې مشرانو خبرداری ورکړی، که حکومت د مدرسو د راجسټر قانون کې بدلون راولي او یا یې وتړي، نو دوی به پراخ احتجاجونه پیل کړي او د ایالت په کچه به بازارونه وتړي.
د طالبانو کورنیو چارو وزارت وایي، د جنايي جرمونو پر وړاندې د مبارزې ځواکونو په بېلابېلو عملیاتو کې د هېواد په اوو ولایتونو کې ۲۶ تنه د غلا، قتل، قماربازۍ او جعلي پیسو د کارونې په تړاو نیولي دي.
د طالبانو ټولګټو چارو وزارت خبرداری ورکړی، چې د بدخشان – تخار لویه لار د سختو سېلابونو د راوتلو له امله په شاوخوا ۱۵ بېلابېلو نقطو کې د ترافیکو پر مخ تړل شوې ده. دغه وزارت وايي، د ژغورنې او پاککارۍ عملیاتي ټیمونه به ژر لاره خلاصه کړي.
د طالبانو د کرنې، اوبو لګولو او مالدارۍ وزارت ویلي چې په کندهار ولایت کې ترکیې د همکارۍ ادارې ټیکا په مالي ملاتړ د اوبو ستونزو د حل لپاره یوه پروژه پیل شوې ده.
روسیې او اوکراین د اوکراین د سومي (Sumy) سیمې د میروپیلیا کلي د کنټرول په اړه متضادې ادعاوې کړې دي؛ مسکو وايي چې دغه کلي یې نیولی، خو کیف دا ادعا ردوي او ټینګار کوي چې سیمه لا هم د اوکرایني ځواکونو تر کنټرول لاندې ده.
په کندهار کې د طالبانو د کرنې، اوبو لګولو او مالدارۍ ریاست وايي چې سږ کال په دې ولایت کې د ځمکني توتانو کرکیله زیاته شوې او شاوخوا پر ۲۰ جریبه ځمکه توتان کرل شوي دي.
د بلوچستان ایالت ګوادر ولسوالۍ اړوند پسنۍ سیمه کې د روانې اونۍ د شنبې په ورځ د امنیتي ځواکونو د هدفي عملیاتو پر مهال دوه پاکستاني سرتېري او څلور وسلهوال وژل شوي.
د امریکا د مرکزي استخباراتو ادارې (سياېاې) پخوانۍ ماموره سارا اډمز وايي، په افغانستان کې د ښځو پر زدهکړو بندیزونه او روان وضعیت د جدي اندېښنې وړ دی. د نوموړې په وینا، افغان ځوانان د اوسني وضعیت پر ځای د بدلون او د طالبانو د واکمنۍ د پای ته رسېدو غوښتونکي دي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې تېره ورځ ۸۷۹ کډوالې کورنۍ چې ټول ۴۶۱۷ کسان کېږي، له ایران او پاکستان نه افغانستان ته ستنې شوې دي.
د سمندري څار راپورونو او د «ټانکر ټرکرز» د معلوماتو له مخې، چې د نفتو لېږد رالېږد څاري، د ایران د خامو تېلو د استخراج ملي شرکت یوه لویه کښتۍ چې له ۱.۹ میلیونو څخه ډېر بېرله خام تېل یې بار کړي، د امریکا د تعقیبي سیسټمونو له تېرېدو وروسته ختیځو اوبو ته رسېدلې ده.
د امریکا د مرکزي استخباراتو ادارې، په تازه خپور شوي راپور کې ویلي چې د القاعده پخوانی مشر اسامه بن لادن د ۲۰۱۱ کال د مې میاشتې له عملیاتو څو میاشتې مخکې نږدې شوی و چې د پاکستان په ایبټاباد کې خپل پټنځای پرېږدي، خو د همدې مودې په ترڅ کې یې لا هم د القاعده مشري او لارښوونه کوله.
د شمالي کوریا د بهرنیو چارو وزارت د امریکا هغه تورونه رد کړي چې ګواکې پیونګیانګ سایبري ګواښ رامنځته کوي او دا ادعاوې یې «جوړې شوې خبرې» بللي دي. دغه هېواد همداراز خبرداری ورکړی چې د خپلو ګټو د دفاع لپاره به په سایبري فضا کې لازم اقدامات ترسره کړي.
د ملګرو ملتونو د تعلیمي، علمي او کلتوري سازمان (یونسکو) د کابل دفتر وايي، په نړۍ کې د بیان ازادي له ۲۰۱۲ کال راهیسې ۱۰ سلنه راکمه شوې او د خبریالانو د ځانسانسور کچه ۶۳ سلنه لوړه شوې.ورته مهال په افغانستان کې پر رسنیو محدودیتونه او د خبریالانو نیونو رسنیز چاپېریال اغېزمن کړی.
د پاکستان تحریک انصاف ګوند او د هغه متحدینو اعلان کړی چې د ګوند د بنسټګر او د پاکستان پخواني لومړي وزیر عمران خان د خوشې کېدو لپاره به په ټول هېواد کې د لاریونونو لړۍ پیل کړي.
امریکایي رسنیو د سپنې ماڼۍ له قوله راپور ورکړی، نېک سټوارټ چې د امریکا د بهرنیو چارو وزارت پخوانی کارکوونکی دی او د ډونالډ ټرمپ د ولسمشرۍ په لومړۍ دوره کې یې د ایران په اړوند چارو کې کار کړی، اوس به له ایران سره د خبرو په بهیر کې برخه واخلي.
د امریکا د کرنیزو څېړنو خدمتونو ادارې نوې څېړنه ښيي، چې که څه هم د شاتو مچۍ کولی شي په خوړو کې ویروسونه وپېژني، خو کله ناکله بیا هم ککړ خوراک ته لومړیتوب ورکوي. دا موندنه کولای شي، د شاتو مچیو ترمنځ د ناروغیو د خپرېدو د څرنګوالي په ښه پوهېدو کې مرسته وکړي.
د امریکا ولسمشر، ډونالډ ټرمپ ویلي چې د ایران پر ضد د پوځي بریدونو د بیا پیل احتمال شته. هغه د خبریالانو د یوې پوښتنې په ځواب کې وویل: «دا امکان شته چې دا کار وشي.» نوموړي د ایران د سویلي بندرونو د محاصرې په اړه هم وویل: «دا یوه ډېره دوستانه محاصره ده.»
د رسنیو د ازادۍ نړیوالې ورځې په مناسبت په یوه خپور کړي پيغام کې د پاکستان ولسمشر اصف علي زرداري ویلي، چې اوس مهال د مطبوعاتو د ازادۍ پر وړاندې سترې ننګونې شتون لري.