د افغانستان پخواني ولسمشر حامد کرزي افغان ورزشکارې فریبا هاشمي ته د بایسکل ځغلونې په سیالیو کې د هغې د بریا او د سپینو زرو مډال ګټلو مبارکي ورکړې ده. کرزي نورو افغان ښځینه لوبغاړو ته هم د بریا هیله کړې ده.
د طالبانو عدلیې وزارت خبر ورکړی، چې د شمال زون د غصب شویو ځمکو قضیو ته د رسېدنې ځانګړې محکمې په بلخ ولایت کې د «ډیپلوماټیک ښارګوټي» ۲زره او ۶۵۷ جریبه ځمکه دولتي اعلان کړې ده.
د ملګرو ملتونو د بشري چارو د همغږۍ دفتر (اوچا) وايي، په افغانستان کې د ۲۰۲۶کال په اګست میاشت کې د بشري مرستو رسولو پر وړاندې ۴۱ پېښې ثبت شوې چې د جولای د ۳۰ پېښو پرتله ۳۷ سلنه زیاتوالی ښيي. د اوچا په وینا، په دې موده کې د دوی څلور کارکوونکي هم نیول شوي دي.
په هرات کې د طالبانو رسنیز دفتر خبر ورکړی، چې د دغه ولایت لپاره طالب والي اسلامجار د ایران د ترانسپورټ او ښار جوړونې وزارت له پلاوي سره د هرات-خواف اوسپنې پټلۍ پراختیا او د سوداګرۍ پر زیاتوالي خبرې کړې دي.
په خیبر پښتونخوا کې د تحریک انصاف ګوند پر وزیرانو او د پارلمان پر غړو د ناپېژاندو وسلهوالو د بریدونو او تښتونې پېښې زیاتې شوې دي. راپورونه ښیي، چې د پښتونخوا د ملي اسمبلۍ غړی زبیر خان په ډېره اسماعیل خان کې له خپل کور څخه تښتول شوی دی.
د فرانسې ولسمشر امانوېل مکرون له اېبيسي نیوز سره په خبرو کې د ایران د جګړې په اړه ویلي: «زما په باور دا به د عملي کېدو وړ نه وي، چې د یوه هېواد په بمبارۍ دې نوی حکومت واک ته ورسېږي». هغه ټینګار وکړ: «دغه لاره پایله نهورکوي».
د طالبانو د کور او ښار جوړولو وزارت وايي، له صیاد اوبیزې سرچینې څخه نوي کابل ښار ته د پاکو اوبو د لېږد پروژه د ارزونې او طرحې په پړاو کې ده. یاد وزارت ویلي، د اوبو د لېږد لپاره شاوخوا ۵۵ کیلومتره اوږده لار په پام کې نیول شوې ده.
د طالبانو تر واک لاندې د پېښو پر وړاندې د مبارزې چمتووالي ادارې ویاند محمدیوسف حماد وایي، چې تېرکال په هېواد کې ۲۴ څاهګانو ته د لوېدو پېښې ثبت شوې دي. د هغه په وینا، په دغه پېښو کې نږدې ۹ کسان ژغورل شوي؛ خو د ۱۱ ماشومانو په ګډون ۱۵ کسان مړه شوي دي.
د کابل یو اوسېدونکي افغانستان انټرنشنل ته په لېږلي پيغام کې ویلي، چې په پروان کې د طالبانو د امنیه قوماندان ورور په زور ترې پارکېنګ اخیستی او بیا یې په یوه دروغجنه قضیه کې زنداني کړی دی. د هغه په خبره، درې میاشتې یې په زندان کې تېرې کړې او د طالبانو له سخت چلند سره هم مخ شوی دی.
لووي انسټیټیوټ په یوه راپور کې ویلي، له هېواده بهر د طالبانو مخالفو ډلو د افغانستان د راتلونکي لپاره ګڼې طرحې، نقشې او اعلامیې وړاندې کړې؛ خو لا داسې باوري او عملي پلان نه لیدل کېږي چې وښيي د طالبانو تر واکمنۍ وروسته به افغانستان څنګه اداره کېږي.
د روغتیا نړۍوال سازمان خبر ورکړی، چې د اېټالیا حکومت په مالي ملاتړ په ننګرهار او لغمان ولایتونو کې د راستنېدونکو کډوالو په ګډون ۶۸زره او ۲۶۳ کسانو لومړني روغتیايي خدمتونه ترلاسه کړي دي.
د سپټمبر ۲۳مه هرکال په نړۍ کې د پښتنو د کلتور د نړۍوالې ورځې په توګه نمانځل کېږي او په دې مناسبت د نړۍ په ګوټ، ګوټ کې پښتانه بېلابېلې کلتوري او علمي غونډې جوړوي.
د سېشنبې په ورځ د ایران د بهرنیو چارو وزیر عباس عراقچي د ملګرو ملتونو د عمومي اسمبلۍ په څنډه کې د امریکا له ځانګړي استازي سټیو وېټکاف سره لیدلي. د غونډې پرمهال د هرمز تنګي د بیا پرانیستلو لپاره امریکا ته د ایران شرایط وړاندې شوي.
د افغانستان تجربهکار ووشو لوبغاړي محمد خالد هوتک د ۲۰۲۶کال د ایچي–ناګویا اسیایي لوبو د منفي ۷۰ کیلوګرامه وزن په یوهڅلورمه پایلوبه کې د اندونیزیا د استازي پر وړاندې بریا خپله کړه او د سیالیو د څلورو غوره لوبغاړو په ډله کې یې خپل ځای خوندي کړ.
رویټرز خبري اژانس راپور ورکړی، چې روسیې په اګسټ میاشت کې افغانستان او د منځنۍ اسیا هېوادونو ته د ډیزلو صادرات په بېساري توګه زیات کړي دي. د راپور له مخې، روسیې په یوه میاشت کې افغانستان ته ۳۷۰زره ټنه ډیزل صادر کړي دي.
«بایو انجینیر» وېبپاڼې په یوه څېړنیز راپور کې ویلي، د کابل د قرغې د کبانو په فارم کې شوې لومړنۍ منظمه څېړنه ښيي چې د اوبو کیمیاوي کیفیت د «رېنبو ټراوټ» کبانو پر روغتیا او وده مستقیم اغېز لري.
د کډوالۍ نړۍوال سازمان ویلي، د ۲۰۲۵کال د جنورۍ له لومړۍ د ۲۰۲۶کال د سپټمبر تر ۱۲مې نېټې له ایران او پاکستان نه ۴ مېلیونه، ۱۰۹زره او ۶۱۲ کډوال چې ټولټال ۵۵۹زره او ۸۶۳ کورنۍ کېږي افغانستان ته ستانه شوي.
د سپټمبر ۲۷مه د پاکستان د تحریک انصاف ګوند د لاریون د مخنیوي لپاره په اسلاماباد او اټک ښارونو کې سخت امنیتي تدابیر نیول شوي دي. د راپورونو له مخې، پولیسو ته امر شوی چې تر ۵۲زره پورې امنیتي سرتېري په حساسو سیمو کې ځای پرځای کړي.
طالبانو وایي د لغمان ولایت په پادیش ولسوالۍ کې د یوې ترافیکي پېښې له امله یو کس مړ شوی او نهه نور ټپیان شوي دي.
د لاهور عالي محکمې د عمران خان د خور علیمه خان د نظر بندۍ پر ضد د قضیې اورېدنه تر ۲۵ سپتمبر پورې ځنډولې ده. محکمې له مدافعې وکیلانو پوښتلي چې ولې اړوندې ادارې ته له مراجعې وړاندې محکمه ته قضیه وړاندې شوې ده.
د ماشومانو لپاره د ملګرو ملتونو د ملاتړ صندوق (یونیسف) وايي، په تېرو نهو میاشتو کې په افغانستان کې له نیم میلیون ډېر ماشومان د سختې خوارځواکۍ له امله په روغتیايي مرکزونو کې بستر شوي دي.