د افغانستان د کرېکټ ملي لوبډلې د درې نړیوالو شل اوریزو سیالیو د لړۍ په دویمه لوبه کې هم د هند پر وړاندې ماتې وخوړه. افغان لوبډلې دا ځل هم، لکه د لومړۍ لوبې په څېر، سیالي هند ته د ۷ وېکټو په توپیر وبایلله.
د بشري حقونو د څار سازمان د ښځو د برخې مرستیالې هېډر بار له جرمني، کاناډا، اسټرالیا او هالنډ څخه غوښتي چې د طالبانو پر خلاف کړې ژمنې باید ژر تر ژره عملي او پوره کړي.
د خیبر پښتونخوا اسمبلۍ په لاهور د دغه ایالت له اعلی وزیر سهیل اپریدی سره د شوې پېښې په غبرګون کې د پنجاب پولیسو پر ضد د غندنې پرېکړه وړاندې کړې ده. په دغه پرېکړه کې د پېښې د مسوولو پولیسو د معلومولو او د هغوی پر وړاندې د سختو اقداماتو غوښتنه شوې ده.
د طالبانو د مخالفو جبهو د فعالیتونو د پراختیا سره هم مهاله، د طالبانو دفاع وزارت خپل ۳۱۳ مرکزي قول اردو ته امر کړی، چې له پنجشېر ولایت سره د ګاونډیو ولایتونو ترمنځ پرتې بین الولایتي پولې او امنیتي پوستې پياوړې کړي.
د اسراییل د اټومي انرژۍ کمېسیون مشر موشهادري وایي، په ایران کې تر نهو ټنو ډېر اټومي مواد د اټومي انرژۍ نړیوال اژانس له څارنې بهر دي چې د څه باندې لسو اټومي بمونو جوړولو لپاره بسنه کوي.
د طالبانو تر واک لاندې د هوا پوهنې ادارې سبا چهارشنبه په ۱۶ ولایتونو کې د سختو بارانونو، تالندې او برېښنا او سېلابونو راوتلو اټکل کړی دی.
د ایټالیا دفاع وزیر ګویډو کروسیټو وایي، د ناټو د بالتیک د هوايي دفاع په ماموریت کې شاملې یوې ایټالوي جنګي الوتکې د لیتوانیا په هوايي حریم کې یوه ډرون ویشتلې چې ښایي له روسیې راغلې وي.
د بلوچستان عالي محکمې په دغه هېواد کې د افغان محصلینو د پاتې کېدو او طبي زده کړو د دوام غوښتنه رد کړې ده. محکمې ویلي، بهرني وګړي د حکومت د پالیسۍ خلاف د زده کړو د دوام حق نه لري.
د ملګرو ملتونو د کډوالو ادارې ویلي، په یمن کې د جګړې له پیل راهیسي تازه د هېواد دننه له ۱۰۰ زرو ډېر کسان بېځایه شوي او زرګونه نور د سمندر له لارې جیبوتي ته تللي دي.
په خوست کې د طالبانو د امنیې قوماندانۍ خبر ورکړی، چې په علیشېرو او تریزیو ولسوالۍ کې د ناچاوده توکو د چاودنې له امله دوو ماشومانو وژل شوي او یو بل ماشوم مرګونی ټپي دی.
د افغانستان او هند ترمنځ د شل اوریزو سیالیو د دویمې لوبې وګټله او د افغان لوبډلې پر وړاندې یې د توپ اچونې پریکړه وکړه. د دغې لوبلړۍ په لومړۍ سیالۍ کې د هند لوبډلې افغان لوبډلې ته د ۷ ویکټو په توپیر ماتې ورکړې وه.
د طالبانو تر واک لاندې افغانستان بانک اعلان کړی چې له درېیو زونونو څخه راټول شوي د څه باندې ۶۶۰ میلیونه افغانیو زاړه او مندرس بانکنوټونه وسوځولي دي.
د طالبانو د دولتي شرکتونو ویاند محمدنبي بهار وایي، په تېرو شپږو میاشتو کې افغانستان ته د بهرنیو سېلانیانو په راتګ کې ۳۰ سلنه زیاتوالی راغلی دی.
په بغلان کې د طالبانو د امنیه قوماندانۍ ویاند وايي، چې د روان په لومړۍ نیمايي کې یې د نشهيي توکو پر وړاندې ۳۸۸ عملیاتو کې ۹۹ تنه قاچاقبران او د نشه يي توکو پلورونکي نیولي دي.
د تخار ولایت یو شمېر اوسېدونکي او سوداګر په بازارونو کې د افغانیو د زړو بانکنوټونو له زیاتوالي شکایت کوي او وايي، د زړو بانکنوټونو د زیاتېدو له امله په ورځنۍ راکړه ورکړه کې له جدي ستونزو سره مخ دي.
ازادي راډیو د خپلو سرچینو له قوله راپور ورکړی چې پاکستان د بلوچستان په ناامنه ایالت کې د وسلهوالو ډلو پر ضد د جګړې لپاره د افغانستان د پخواني پوځ او پولیسو غړي ګوماري. دغو کسانو ته شاوخوا ۴۰ زره پاکستانۍ کلدارې میاشتنی معاش ورکول کېږي.
د طالبانو د کانونو او پټرولیم وزارت ویاند همایون افغان ویلي، د ټاپي ګازو نللیکې پروژې د هرات برخې ودانیزې چارې نږدې ۸۰ سلنه بشپړې شوې. د نوموړي په وینا، په هرات کې د ګازو د وېش شبکې د ډیزاین چارې هم دوام لري او تمه ده چې د جوړولو چارې به یې ژر پیل شي.
د ملګرو ملتونو د بشري مرستو د همغږۍ دفتر (اوچا) ویلي، د ژمي د رارسېدو په درشل کې له ګاونډیو هېوادونو څخه افغانستان ته د راستنې شوې کډوالې کورنۍ له سختو او ننګونو شرایطو سره مخ دي.
د طالبانو د ریاست الوزرا اقتصادي مرستیال عبدالغني برادر په مشرۍ اقتصادي کمېسیون د معیار او کیفیت ادارې ۳۶ معیارونه او د ازمایښت ۳۰ طریقې تایید کړې. دغه معیارونه د کرنیزو محصولاتو، خوراکي توکو، درملو، نساجۍ او نورو برخو اړوند دي.
لیلا هره ورځ هغه ټولګي ته ځي چې باید څوک یې ونه ویني. هغه سهار له کوره وځي، داسې ښوونځي ته ځي چې لوحه نه لري او له هغو نجونو سره یوځای زدهکړې کوي چې د خپلو زدهکړو د دوام لپاره باید پټې پاتې شي.
د ایران د بشري حقونو سازمان ههنګاو خبر ورکړی چې ایراني چارواکو د خلیل افغان په نوم یو ۲۵ کلن افغان د نشهيي توکو د قاچاق په جرم د زاهدان په مرکزي زندان کې اعدام کړی دی.