د هرات لپاره د طالبانو والي د سرطاني ناروغیو له متخصصینو سره لیدنه کې د دغې ناروغۍ د زیاتوالي د عواملو د معلومولو او درملنې د لارو چارو د موندلو لپاره د علمي څېړنو او تخصصي کنفرانسونو پر جوړېدو ټینګار کړی. یاده دې وي، چې دمګړۍ هېواد کې یونیم میلیون کسان پر سرطاني ناروغیو اخته دي.
د ښځنهوو شل اوریز اسیا جام سیالیو په پایلوبه کې د هند ښځینه کرکټ لوبډلې سریلانکا ته په ۷۲ منډو ماتې ورکړه او د ښځینهوو شل اوریز اسیا جام سیالیو کې یې اتم ځل لپاره اتلولي خپله کړه،خو د اسیا کرکټ شورا مشر او د پاکستان د کورنیو چارو وزیر محسن نقوي له لاسه یې د اتلولۍ جام وانخیست.
د هرات لپاره د طالبانو د رسنیز دفتر مسوولین وايي، په دغه ولایت کې د روميبانجانو د روب ۱۳ تولیدي کارخونې فعالیت لري. د دوی په وینا، پر دغو کارخونو ۶۵ میلیونه ډالره پانګونه شوې او په میاشت کې د روب جوړولو لپاره شاوخوا ۳ زره ټُنه رومي بانجانو ته اړتیا لري.
د طالبانو د کورنیو چارو وزیر سراج حقاني د ملا هبتالله له خوا د ننګرهار یو ګوښه شوی طالب چارواکی او د ټولنیزو رسنیو فعال، قاري ساجد خوږیاڼی، د دغه ولایت د خوږیاڼو ولسوالۍ امنیه قوماندان ټاکلی. هغه چې د ننګرهار د اطلاعاتو او کلتور رییس و، دوه نیم کاله مخکې له دندې ګوښه شوی و.
سرچینو افغانستان انټرنشنل- پښتو ته ویلي، طالبانو په کندهار ښار کې د دغې ډلې د پخواني غړي معتصم اغاجان د مدرسې له کلابندولو وروسته، معتصم اغا جان هم نیولی دی. معتصم اغاجان له طالبانو سره له پخوا ترینګلې اړیکې لرلې او د روان کال د وري پر ۲۷مه هم د طالبانو له لوري نیول شوی وو.
د پاکستان د پنجاب ایالتي حکومت د ترهګریزو بریدونو د ګواښ له امله په دغه ایالت کې د پنځو ورځو لپاره له پنځو د ډېرو کسانو پر غونډو، لاریونونو او مظاهرو یې بندیز ولګاوه.
په هلمند کې د طالبانو رسنیز دفتر ویلي، د دغه ولایت په فرعي ګمرکونو کې یې ۱۶ زره او ۲۶۸ کیلوګرامه خوراکي او غیر خوراکي صادراتي او وارداتي توکي ترلاسه کړي دي. د دوی په وینا، دغه قاچاقي مواد په تېره یوه اونۍ کې ترلاسه شوي او د لېږد په تړاو یې ۱۶ کسان هم نیول شوي دي.
په کندهار کې دوو سرچینو افغانستان انټرنشنل - پښتو ته وویل، چې طالبانو په دغه ښار کې د خپل پخواني جګپوړي غړي معتصم اغاجان مدرسه محاصره کړې ده. د سرچینو په وینا، مدرسه نن ماسپښین د طالبانو د استخباراتو ځواکونو محاصره کړې او ځینې مېلمانه یې پلټلي هم دي.
د پاکستان د طبیعي پېښو او ژغورنې اداره وایي، د بلوچستان په هرنایي ولسوالۍ کې د ډبرو سکرو په یوه کان کې د چاودنې له امله ۴ کانکیندونکي مړه شوي او ۵ نور ټپیان دي. ویل کېږي چې پنځه تنه کانکیندونکي ژوندي له کان څخه ایستلي شوي دي.
د طالبانو د ترانسپورټ او هوايي چلند وزارت د هوا پوهنې ادارې د افغانستان په ۱۰ ولایتونو کې د سختو بارانونو، تالندې برېښنا، تېزو بادونو او ناڅاپي سېلابونو د راوتلو خبرداری ورکړی دی.
پر رسنیو د طالبانو له ګڼو محدودیتونو ترڅنګ د یکشنبې په ورځ د وږي ۲۲مه، په کابل کې د «اذان» په نوم ځانګړې تعلیمي راډيو خپل نشرات پيل کړل. د دغې راډیو مسوول وايي، موخه یې د معیاري تعلیمي خپرونو وړاندې کول او د بېلابېلو ټولنیزو موضوعاتو په اړه د عامه پوهاوي د کچې لوړول دي.
د طالبانو د مخالفې ډلې، مقاومت جبهې مشر احمد مسعود وايي، د طالبانو مشر هبتالله اخوندزاده واک ته د زور او غلبې له لارې رسېدل پر خلکو د حاکمیت مشروع لاره ګڼي، خو د نوموړي دا لیدلوری له اوسنۍ نړۍ او د افغانستان د خلکو له غوښتنو سره سمون نه لري.
د عوامي نشنل ګوند مشر ایمل ولي خان، د پاکستان د کورنیو چارو وزیر محسن نقوي څخه د استعفا غوښتنه کړې او د عمران خان د خوشې کېدو په اړه یې د سپټمبر پر ۲۷مه د اعتراضونو ادعاوې «ډرامه» بللې دي.
د امریکا ولسمشر ډونالډ ټرمپ د یکشنبې په ورځ له اوکرایني ولسمشر ولادیمیر زیلېنسکي وغوښتل چې د روسیې د تېلو پر تاسیساتو بریدونه ودروي. ټرمپ ویلي، چې پر روسیه د اوکراین د بریدونو له امله ډیزل کم شوي او «نړۍ ته زیان رسوي».
د کاناډا لومړی وزیر مارک کارني غواړي له اروپايي ټولنې سره د خپل هېواد اړیکې لا نږدې کړي او دا موضوع هم ارزوي چې کاناډا څنګه د اروپايي ټولنې «ملګری غړی» هېواد کېدای شي.
د افغانستان د خلکو اسلامي وحدت ګوند مشر محمد محقق طالبان «د امریکا لاسپوڅي» وګڼل او وايي، امریکا د یوې «دسیسې» له لارې دده په وینا، یوې «مزدورې» ډلې ته د افغانانو برخلیک وسپاره. محقق ویلي، چې مجاهدینو ځانګړی اعتبار درلود، خو د هغه په وینا، «د امریکا ظاهري زرق او برق دوکه کړل».
د طالبان ویاند ذبیح الله مجاهد په افغانستان کې د الـ.ـقـاعـده ډلې د حضور په اړه د امریکايي رسنیو رپوټونو ته په غبرګون کې ویلي، چې یاده ډله په افغانستان کې نشته.
د طالبانو د مخالفې ازادۍ جبهې مشر یاسین ضیا وايي، د طالبانو پر ضد د مخالفو جبهاتو د بریدونو په ډېرېدو سره د هېواد وضعیت د دې ډلې له کنټروله وتلی او طالبانو د روانو فشارونو د مخنیوي لپاره تبلیغاتي فعالیتونو ته مخه کړې ده.
جهادي مشر عبدالرب رسول سیاف وايي، طالبانو څو ځله د خبرو وړاندیزونه رد کړي او که په افغانستان کې د طالبانو پر ضد مخالفتونه او جګړه پراخه شي، د پایلو مسوولیت به یې د دې ډلې پر غاړه وي. سیاف د طالبانو له مخالفو جبهو وغوښتل، چې خپل یووالی وساتي او د تعصب مخه ډب کړي.
د طالبانو تر واک لاندې د افغاني سرې میاشتې ټولنه وايي چې په تېره یوه میاشت کې د کابل په قلبي روغتون کې د سوري زړه په ناروغۍ د اخته ۱۰۰ ماشومانو د زړه بریالي عملیات شوي دي.
د ایران په کهگیلویه او بویراحمد ولایت کې د یوه پژو موټر او ټېلر د ټکر له امله شپږ افغانان مړه شوي دي. پېښه د یکشنبې په سهار د دنا ولسوالۍ اړوند د یاسوج ـ اصفهان پر لویه لار شوې ده.