جهادي مشر عبدالرب رسول سیاف وايي، طالبانو څو ځله د خبرو وړاندیزونه رد کړي او که په افغانستان کې د طالبانو پر ضد مخالفتونه او جګړه پراخه شي، د پایلو مسوولیت به یې د دې ډلې پر غاړه وي. سیاف د طالبانو له مخالفو جبهو وغوښتل، چې خپل یووالی وساتي او د تعصب مخه ډب کړي.
د طالبانو تر واک لاندې د افغاني سرې میاشتې ټولنه وايي چې په تېره یوه میاشت کې د کابل په قلبي روغتون کې د سوري زړه په ناروغۍ د اخته ۱۰۰ ماشومانو د زړه بریالي عملیات شوي دي.
د ایران په کهگیلویه او بویراحمد ولایت کې د یوه پژو موټر او ټېلر د ټکر له امله شپږ افغانان مړه شوي دي. پېښه د یکشنبې په سهار د دنا ولسوالۍ اړوند د یاسوج ـ اصفهان پر لویه لار شوې ده.
طالبانو د اهل تشیع او هزاره وګړو د ولسي اړیکو دفتر مسوول صوفي ګردېزی او ددغه دفتر غړي سید حسن شریف بلخابي او محمدحسین سنگردوست له یوې اونۍ زندان وروسته، د یکشنبې په ورځ بېرته خوشې کړل.
د ملي جنبش ګوند مشر عبدالرشید دوستم طالبانو ته خبرداری ورکړی چې د خبرو غوښتنه «ټوکه» ونه ګڼي ځکه دده په وینا، که طالبان خبرو ته غاړه کښېنږدي، په افغانستان کې به جګړه له کنټروله ووځي. نوموړي ویلي، چې له طالبانو سره د خبرو لپاره پنځه کسیز پلاوی ټاکل شوی.
په کابل کې سرچینو د یکشنبې په ورځ ویلي، چې د پلازمېنې په فضا کې د نامعلومو بېپیلوټه الوتکو ګزمې زیاتې شوې دي. یو شمېر اوسېدونکو د هېواد په ځینو نورو ولایتونو کې هم د بېپیلوټه الوتکو د الوتنو راپور ورکړی دی. د طالبانو سرچینو هم د کابل په فضا کې د دغو الوتکو ګزمې تایید کړې دي.
د طالبانو د لوړو زده کړو وزیر ندا محمد ندیم د پنجشیر پوهنتون محصلانو ته ویلي، چې له سیاسي فعالیتونو او حزبي ډلو ځان وساتي. نوموړي زیاته کړې چې محصلان دې د حزبونو او ډلو دعوت ته د رد ځواب ورکړي.
د طالبانو دغزني او پکتیکا د کرنې مسوولان وايي، سږ کال په دواړو ولایتونو کې پر ۲۱ زره او ۳۸۰ هېکټاره ځمکه انګور کرل شوي چې ټول حاصلات یې نږدې ۵۳۲ زره مټریک ټنه اټکل شوی. خو بزګران د سړو خونو او مناسب بازار د نشتوالي له امله اندېښمن دي.
د طالبانو د ترانسپورټ او هوايي چلند وزارت یو پلاوي د لوګر د محمداغې ولسوالۍ په سرخاب سیمه کې د هغه ځای ارزونه کړې چې د داودخان حکومت او وروسته د جمهوري حکومت پرمهال د نړیوال هوايي ډګر د جوړولو لپاره ځانګړی شوی دی.
په کندهار کې د طالبانو اړوندو سرچینو افغانستان انټرنشنل ته ویلي، چې په تېرو دوو اونیو کې د کندهار د دامان او میوند ولسوالیو په ګډون د ښار په ځینو حوزو کې د طالبانو د نظامیانو او د امربالمعروف د محتسبانو ترمنځ لفظي شخړې شوې دي.
د جرمني د حکومت د تازه شمېرو له مخې، د ۲۰۲۶ کال په لومړۍ نیمایي کې د افغان پناه غوښتونکو لپاره د خوندیتوب کچه ۸۹،۳ سلنې ته رسېدلې ده. په همدې موده کې نږدې ۹۵ سلنه افغانانو ته د پناه غوښتنې په قضیو کې د خوندیتوب یو ډول قانوني حیثیت ورکړل شوی.
د طالبانو د شهیدانو او معلولانو چارو وزارت د مالي او اداري برخې رییس وايي، چې په تېر حکومت کې ځینې ژوندي کسان د شهیدانو په نوم ثبت شوي وو. نوموړی زیاتوي چې د مرسنو په وېش کې د شفافیت لپاره یې په ۱۳ ولایتونو کې بایومتریک سیستم فعال کړی دی.
د طالبانو د عدلیې وزارت ځانګړو ځواکونو د کابل په شیرشاه مېنه کې د افغانستان د شیعه وو د عالي کمیسیون مشر او یو شمېر غړي نیولي. د سرچینو په وینا، د کمیسیون مشر محمدعلي اخلاقي او څو تنه غړي سید نادرشاه بحر، حاجي بازل، سید محسن او سید عبدالله هاشمي د نیول شویو کسانو په ډله کې دي.
د کندهار ښار یو شمیر اوسېدونکي او صنعتکاران د برېښنا له زیاتېدونکو پرچاویو شکایت کوي او وايي، د برېښنا نشتوالي یې ورځنی ژوند او تولیدي چارې له ستونزو سره مخ کړې دي. بل خوا د کندهار د بریښنا مسوولان د کجکي بند د اوبو کموالی د پرچاوۍ اصلي لامل بولي.
نسرین متین د طالبانو له واکمنۍ وړاندې د کرنې وزارت د یوې برخې رییسه وه. د ښځو پر کار له بندیزونو وروسته یو کال په کور کښېناسته، خو وروسته یې د مرخیړیو کښت پیل کړ. اوس هغه د هغو ښځو لپاره د کار او زدهکړې زمینه برابروي چې د کورونو یوازینۍ نفقهګټونکې او له زدهکړو پاتې دي.
د طالبانو د مالیې وزارت وايي، د ثبت شویو متقاعدینو د معاشونو پنځلسم پړاو د وږي په ۲۴مه پیلېږي چې په دې پړاو کې به د بهرنیو چارو وزارت، علومو اکاډمۍ، اطلاعاتو او فرهنګ وزارت، تفتیش او له اداري فساد سره د مبارزې ادارو متقاعدینو ته معاشونه ورکړل شي.
د ملګرو ملتونو د بشري مېشتځایونو پروګرام «یواینهبیتات» وايي، په افغانستان کې لا هم میلیونونه کسان د څښاک اوبو باوري سرچینو ته لاسرسی نه لري او د اوبو د سرچینو ساتنې لپاره اغېزمن ښاري پلان جوړونې او د اوبو او کثافاتو د مدیریت اړتیا ده.
د بلوچستان حکومت په ټول ایالت کې په دولتي کالجونو کې پر هر ډول غونډو او سازماني فعالیتونو بندیز لګولی او امر یې کړی چې هېڅ کالج له مخکینۍ اجازې پرته د کوم پروګرام د جوړولو اجازه نه لري.
کندوز په علياباد ولسوالۍ کې د مسافرو یو بس چپه شوی چې له امله یې ۲۶ کسان ټپیان شوي دي.د پېښې په ټپیانو کې ښځې او ماشومان هم شامل دي.
په افغانستان کې، شاوخوا ۱،۵ میلیونه کسان پر سرطاني ناروغۍ اخته دي او هر کال نږدې ۵۰ زره نوې پېښې ثبتېږي. متخصصان ناسالم خواړه، د سګرټو او نسوارو استعمال، د هوا ککړتیا، د فزیکي فعالیت کموالی او ځینې انتاني ناروغۍ د سرطان له مهمو لاملونو څخه بولي.
عراقي چارواکو له ایران سره د درېیو سرحدي لارو د بېرته پرانیستلو لپاره یو نوی مهالوېش اعلان کړی دی. دا پرېکړه د سعودي عربستان د تېلو پر پایپلاین د ډرون بریدونو له امله د پولو له تړل کېدو یو ورځ وروسته شوې ده.