د طالبانو د لغمان ولایت امنیه قوماندانۍ د ترافیکو مدیریت د مهترلام ښار په مرکزي ساحو کې پر عمومي سړکونو د رېکشاوو پر تګ راتګ بندیز لګولی دی. یاد مدیریت ویلي، چې د دې پرېکړې موخه د ښاري نظم ټینګښت، د عامه تګ راتګ خوندیتوب، او پر سړکونو د بېنظمۍ مخنیوی دی.
د روسیې د ولسمشر ویاند دیمیتري پېسکوف تایید کړه، چې د کرملین کارمندان په پراخه کچه مصنوعي ځیرکتیا کاروي. نوموړي وویل چې ددوی کارکوونکي د روسیې اړوند مصنوعي ځیرکتیا کاروي.
په قرغیزستان کې د طالبانو د سفارت سرپرست عبدالشکور حقاني په دغه هېواد کې د هند د جمهوریت ورځې په نمانځغونډه کې ګډون کړی دی. حقاني د هند سفیر بیرېندر سِنگ ته د جمهوریت مبارکي ویلې او د طالبانو او هند تر منځ د اړیکو د لا پراختیا هیله یې څرګنده کړې ده.
فرانسوۍ ورځپاڼې لوموند ویلي، په افغانستان کې د چین ستراتیژي د پرلهپسې بریدونو له امله له جدي امنیتي ننګونو سره مخ ده. لوموند وايي، پر چینايي وګړو بریدونو دا پوښتنه ټوکولې چې که په کابل کې امنیت نه شي ټینګېدای، نو په لرې پرتو ولایتونو کې د لویو پروژو خوندیتوب به څنګه تضمین شي.
اسوشیېټډ پرېس خبر ورکړی چې روسیې ته دملکي دندو لپاره تللي یو شمېر بنګلهدېشي کارګر د اوکراین جګړې ته استول شوي دي. د اسوشیېټډ پرېس د راپور له مخې، دغه کارګران د دروغجنو ژمنو له لارې جذب شوي او وروسته د زور، ګواښ او تاوتریخوالي له لارې د روسیې په پوځ کې شامل کړل شوي دي.
د طالبانو د ریاستالوزرا اقتصادي مرستیال عبدالغني برادر په مشرۍ د تدارکاتو کمېسیون نوبتي غونډه کې له بحث وروسته د شاوخوا ۲،۵ میلیارده افغانیو په ارزښت ۲۱ پروژې منظورې شوې دي. په دې پرژو کې د کابل، هرات، ننګرهار، بلخ او خوست د هوايي ډګرونو د ګمرکونو د سکنرونو اخیستل شامل دي.
د طالبانو د احصایې او معلوماتو ادارې خبر ورکړی، چې د روان لمریز کال د مرغومي میاشتې پر مهال د هوايي ډګرونو او ځمکنيو بندرونو له لارې ټول دوه زره او ۳۹۶ بهرني وګړي هېواد ته داخل او یا ترې وتلي دي. په دې منځ کې یوازې ۹ تنو بهرنیانو د هوا له لارې افغانستان ته سفر کړی.
په قطر کې د طالبانو سفیر سهیل شاهین په دوحه کې د مسلمانو علماوو نړیوالې ټولنې له رییس شيخ علي محيي الدین القره داغي سره کتلي دي. په قطر کې د طالبانو سفارت وايي، چې شاهین له نوموړي سره د طالبانو د واقعي انځور په رسولو کې د ديني عالمانو پر رول خبرې کړې دي.
د طالبانو د کلیو د بیارغونې او پراختیا وزیر عبداللطیف منصور په افغانستان کې د سره صلیب نړیوالې کمېټې له مشرې کاتارینا ریټز سره په لیدنه کې له هغې غوښتنه کړې ده، چې سور صلیب دې په افغانستان کې د بشري مرستو ترڅنګ پراختیايي بنسټیزو پروژو ته هم پاملرنه وکړي.
د اوکراین ولسمشر ولادیمیر زېلېنسکي د دغه هېواد د بېپیلوټه الوتکو (ډرونونو) د واحدونو د فعالیتونو د ارزونې د یوې نوې طرحې د پیل پر مهال وویل چې روسیه په اوکراین که په یوه میاشت کې تر هغو ډېر سرتېري له لاسه ورکوي چې شوروي اتحاد په افغانستان کې په ۱۰ کلونو کې وړکړي وو.
په ننګرهار ولایت د طالبانو د کرنې، اوبولګولو او مالدارۍ ریاست وایي، د ډنمارک کډوالو ادارې په تخنیکي همکارۍ او د اروپایي ټولنې او سویس پراختیایي ادارې په مالي ملاتړ یې د سپین غر او اچین ولسوالیو په بېلابېلو کلیو کې ۲۳۹ اړمنو کورنیو ته ۴۷۸ مېږې وېشلې دي.
د طالبانو د ټولګټو وزارت وايي، چې سالنګ لویه لار د سې شنبې په ورځ، د ماسپښین پر دوه بجو د مسافر وړونکو موټرو پر مخ پرانېستل شوه. دا لویه لاره د تېرې چارشنبې پر سهار د درنو واورو او سختو توپانونو له امله تړل شوې وه.
د طالبانو تر کنټرول لاندی میدان وردګو ولایت د کرنې، اوبولګولو او مالدارۍ ریاست وایي، چې په دغه ولایت کې یې د ژمي د سړې هوا له امله د مرغانو د ملاتړ او ساتنې په موخه د خوراکي دانو د شیندلو کمپاین پیل کړی دی.
د تېر جمهوري نظام پرمهال د ملي پخلاینې شورا مشر عبدالله عبدالله له افغانانو غوښتي، چې په غیرقانوني لارو له سفر کولو ډډه وکړي او کورنۍ هم اجازه ورنه کړي چې د خپلو عزیزانو ژوند یې له خطر سره مخ شي. عبدالله هغه ځوانان ستایلي، چې د ترکیې او ایران په لاره کې یې افغانان ژغورلي دي.
د افغانستان د پخواني ولسمشر مرستیال امرالله صالح ادعا کړې چې متحده ایالاتود جنورۍ پر۱۳مه طالبانو ته په کابل کې ۴۵ میلیونه ډالر نغد سپارلي دي. د صالح په وینا، متحده ایالاتو ژمنه کړې چې د جنورۍ په میاشت کې به ټولټال ۹۰ میلیونه ډالر طالبانو ته وسپاري.
د اسراییل پوځ د دوشنبې په ورځ اعلان وکړ، چې تر ۸۴۳ ورځې جګړې وروسته ټول اسراییلي یرغملي او د هغوی جسدونه د غزې له تړانګې اسراییل ته لېږدول شوي دي. د اسراییل پوځ لهخوا په خپرې شوې ویډیو کې ښکاري، چې په غزه کې د وروستي یرغملي جسد ترلاسه شوی او اسراییل ته لېږدول شوی دی.
د طالبانو د عامې روغتیا وزارت وايي، چې په کابل ښار کې یې د درملیزو تاسیساتو او خوراکي توکو پلورنځيو څخه د څار پر مهال دوه درملتونونه له روغتیايي قوانیونو د سرغړونې له امله تړلي دي.
په افغانستان کې د ملګرو ملتونو د نشهيي توکو او جرمونو پر ضد د مبارزې ادارې (UNODC) ویلي، چې د ملګرو ملتونو د ځانګړي صندوق (UN STFA) په مالي ملاتړ یې په پکتیا او پکتیکا ولایتونو کې ۱۴۶۰ کورنیو ته د دوامداره قانوني عایداتي لارو د پیاوړتیا لپاره کرنیزې مرستې برابرې کړې دي.
د طالبانو تر واک لاندې د احصايې او معلوماتو ادارې خبر ورکړی، چې په تېرې مرغومي میاشت کې د هوايي ډګرونو او ځمکنیو لارو افغانستان ته ۲زره او ۳۶۹ بهرنیو وګړو تګراتګ کړی. دغه ادارې زیاته کړې، چې په دې کې ۶۸ ښځې هم شاملې دي.
په افغانستان کې د ملګرو ملتونو د بشري مرستو همغږۍ اداره (اوچا) وایي، له ناروې څخه یې شاوخوا ۹۹۰زره امریکایي ډالره نوې مرسته ترلاسه کړې چې د افغانستان د بشري مرستو صندوق له لارې به د بېړنیو حالاتو پر مهال د مرستندویه ادارو فعالیتونه چټک او اغېزمن کړي.
د برېتانیا ګارډین ورځپاڼې د دوشنبې په ورځ (د سلواغې ۶مه) په یوه راپور کې د څارونکو په حواله لیکلي، چې ایران ته نږدې د «یو.اېس.اېس» ابراهام لېنکلن الوتکه وړونکې بېړۍ تر لېږد وروسته امریکا او اسراییل د یوه نوي برید لپاره چمتوالی نیسي.