القاعدې د سپټمبر د ۱۱مې د بریدونو د ۲۵مې کلیزې په مناسبت په خپره کړې ۵۲ دقیقې ویډیو کې د خپل پخواني مشر اسامه بن لادن زوی، حمزه بن لادن، دوه ځله ښودلی، چې افغاني پټکی یې په سر دی. امریکا په ۲۰۱۹ کال کې د هغه د وژل کېدو خبر ورکړی و.
د پاکستان د بلوچستان ایالت د قلعه عبدالله ولسوالۍ په باغونو کې د افغان کډوالو له ستنېدو وروسته د بڼوالۍ پر چارو د ماهرو افغان کارګرانو د کمښت اغېز زیات شوی او باغداران د حاصلاتو د راټولولو او نورو موسمي کارونو پر مهال له کاري ځواک د کمښت له ستونزې سره مخ دي.
د پاکستان نړیوال هوايي شرکت «پي اې ای» او د افغانستان «کام ایر» ترمنځ د هوايي سفرونو د اسانتیا لپاره نوی تړون لاسلیک شوی چې له مخې به له کابل څخه د اسلاماباد له لارې د سعودي عربستان دمام ښار ته د مسافرو د سفر زمینه برابره شي.
د افغانستان متحده جبهه وایي، د دغې جبهې د اطلاعاتي برخې غړو د هرات ښار په ۲۸ بېلابېلو سیمو کې د دغې جبهې د رهبرۍ وروستي پیغامونه او د یو شمېر دیني عالمانو هغه فتوا یې خپره کړې ده چې د طالبانو پر وړاندې د مبارزې په تړاو صادره شوې ده.
د «پي بي اېس نیوز» په یوه ځانګړي راپور کې د افغانستان د شل کلنې جګړې درې ښکېل لوري وايي، جګړه پای ته رسېدلې، خو د سلګونو زرو قربانیو، پراخو تاوانونو او د جګړې د پایلو په اړه مهمې پوښتنې لا هم بېځوابه پاتې دي.
د خیبر پښتونخوا اسمبلۍ د پنجاب د اعلی وزیرې مریم نواز پر وړاندې د پاکستان د اساسي قانون د شپږمې مادې له مخې د قانوني اقدام غوښتنه کړې. دا پرېکړه د هغې د هغو څرګندونو په غبرګون کې شوې چې پکې یې د پنجاب امنیتي ګواښونه له ګاونډیو ایالتونو سره تړلي بللي دي.
د افغانستان د سوداګرۍ او پانګونې خونې خبر ورکړی چې، د افغانستان د نفتو د تصفیې او پروسس په برخه کې د یوه ګډ سهامي شرکت د جوړولو لپاره پرېکړه شوې چې د یوې فابریکې په جوړولو سره به د ورځې د پنځه زره ټنه ډیزلو او پټرولو د تولید ظرفیت ولري.
د رسنیو او بشري حقونو ۹ نړیوالو سازمانونو د پاکستان لومړي وزیر شهباز شریف ته په یو ګډ لیک کې د رسنیو د ازادۍ پر خرابېدونکي وضعیت اندېښنه ښودلې ده. دوی غوښتنه کړې چې د خبریالانو د ځپلو مخه دې ونیول شي.
د پاکستان د بلوچستان ایالت د شیراني ولسوالۍ پولیس وايي، د پنجشنبې په ورځ یې د دنه سر په غرنیزه سیمه کې د خان بهادر په نوم د کونړ د یوه اوسېدونکي مړی موندلی او ژوب دولتي روغتون ته یې انتقال کړی دی. هم مهاله ځايي فعالان د هغه د کورنۍ د موندلو هڅې کوي.
د جنوبي کوریا د لوړ پوړو پوځي قوماندانانو او لوی درستیز ګډه کمېټه وایي، شمالي کوریا شنبې سهار، د وانسان له سیمې د دغه هېواد ختیځ ساحل ته څېرمه سمندر ته څو لنډ واټن ویشتونکي بالستیک توغندي توغولي دي.
د هند لومړي وزیر نریندرا مودي، د روسیې ولسمشر ولادیمیر پوتین او د ایران ولسمشر مسعود پزشکیان د بریکس د سوداګریز فورم په غونډه کې د سوداګرۍ لپاره د محلي اسعارو د پراخ استعمال او په ډالرو د اتکا د کمولو غوښتنه کړې ده.
د امریکا پخوانۍ مرستیالې ولسمشرې کماله هریس ویلي، د سپټمبر د ۱۱مې ترهګریز بریدونه د دغه هېواد په تاریخ کې د لومړنیو ژغورونکو د ژوند تر ټولو ستره ضایعه وه او د دغو اتلانو یاد باید تل ژوندی وساتل شي.
د ښځینهوو شل اوریز اسیا جام په دویمه نیمه پایلوبه کې سریلانکا پاکستان ته په ۴ وېکټو ماتې ورکړه. سریلانکا د پاکستان د ښځینه کرېکټ لوبډلې له لوري ورکړل شوی د ۱۳۰ منډو هدف په ۱۹م اور کې پوره کړ او د پاکستان له ماتې سربېره یې پایلوبې ته لاره ومونده.
د روسیې ولسمشر ولادیمیر پوتین د هند په پلازمېنه نوي ډیلي کې د برېکس د سوداګریز فورم غونډې ته په وینا کې وویل، چې لوېدیځ هېوادونه هڅه کوي، په هر ډول ممکنه وسیلو سره خپل پخوانی نړیوال مشرتوب بېرته ترلاسه کړي.
د سعودي عربستان د بهرنیو چارو وزارت وايي، چې د دغه هېواد له ختیځ څخه لوېدیځ ته غځېدلې د نفتو نللیکه د هغو بېپيلوټه الوتکو له لوري په نښه شوي، چې له عراق څخه توغول شوي وو. د عراق لومړي وزیر بیا د همدې برید په تړاو خپل یو لوړ پوړی پوځي قومندان له دندې ګوښه کړ.
د افغانستان د فوټبال د اتلانو لیګ د شپږم پړاو د لومړۍ اونۍ سیالیو په دوام د جمعې په ورخ (د وږي ۲۰مه) د کابل په کوربتوب دوه لوبې ترسره شوې چې په پایله کې یې عمر ځواک او طوفان هرات خپلو سیالو لوبډلو ته ماتې ورکړه.
په امریکا کې یوې تازه څېړنې موندلې چې د شپې مهال له ډېرې رڼا سره مخامخ کېدل ښايي د زړه په جوړښت او دندو کې د بدلونونو لامل شي. د څېړنې له مخې، د زړه د دېوالونو غټېدل او د زړه د عضلې د عادي راټولېدو او بېرته ارامېدو د وړتیا کمېدل له هغو بدلونونو څخه دي چې له شپنۍ رڼا سره تړاو لري.
د هند لومړي وزیر نرېندرا مودي د نوي ډیلي په کوربهتوب د برېکس په سرمشریزه کې وویل، چې د نړیوالې سوداګرۍ د ودې او د مالونو د لېږد رالېږد لپاره د سمندري لارو امنیت او د کښتیو د کارکوونکو خوندیتوب ډېر مهم دی.
د ایران ولسمشر وايي، چې د ایران ولس به وسله پر ځمکه کېنږدي او هېڅکله به امریکا او اسراییل ته تسلیم نهشي. نوموړي په نوي ډیلي کې د برېکس غونډې په څنډه کې په یوې غونډه کې د ایران پر یوه ښوونځي د امریکا او اسراییل د هغو بریدونو یادونه هم وکړه، چې پهکې ۱۶۸ ماشومان ووژل شول.
په تاجکستان کې د افغانستان د جمهوري نظام سفیر ظاهر اغبر دغه هېواد کې د سامانیان د عمومي تعلیماتو د ښوونځي د نوي تعلیمي کال د پیل مراسمو کې په افغانستان کې له زدهکړو د نجونو پر محرومیت له اندېښنې څرګندولو سربېره ټينګار وکړ، چې د افغانستان راتلونکی د ځوان نسل تعلیم پورې تړلی دی.
رویټرز راپور ورکړی، چې روسي ځواکونو د جمعې په ورځ (د وږي ۲۰مه) د اوکراین د پلازمېنې کېیف د تېلو پر دوو زېرمو جېټ ته ورته بېپیلوټه الوتکو په وسیله بریدونه کړي او په پایله کې یې دوه کسان هم وژل شوي دي. د اوکراین ولسمشر ولادیمیر زیلېنسکي بیا د روسیې دغه بریدونه «ترهګریز» بللي دي.