د حزب اسلامي د رهبري شورا غړي جمعه خان همدرد له غبرګون وروسته د یاد ګوند مشر ګلبدین حکمتیار د هغه څرګندونو ته په غیر مستقیم ډول غبرګون ښودلی دی. حکمتیار ویلي، چې په «څو تابعیت لرونکو او کرایي غړو» نه ګوند جوړېدای شي او نه هم سالم سیاست کېدای شي.
د کندهار د سپین بولدک ولسوالۍ اوسېدونکو افغانستان انټرنشنل ته ویلي، چې ډیورنډ کرښې ته څېرمه د عبدالله کنډک له سیمې ښکته، د کرښې دواړو غاړو ته مسافر د پیسو په بدل کې اړول کېږي. محلي سرچینې وايي، له مسافرو نه سړي سر له ۶۰ زرو تر ۱۰۰ زرو پورې پاکستانۍ روپۍ اخېستل کیږي.
اصلاح راډیو د یوې اعلامیې په خپرولو سره ویلي چې د طالبانو عدلیې وزارت د یادې راډیو پر فعالیت بندیز لګولی او دفتر یې مهرولاک کړی دی. د اصلاح غږ راډیو ادارې ویلي، چې یاده راډیو د هېڅ سیاسي ګوند او جریان اړوند نه ده، بلکې یوه خپلواکه او بې پرې راډیو ده.
د طالبانو د بهرنیو چارو وزیر د ملګرو ملتونو د سرمنشي له سیاسي او د سولې چارو مرستیالې روزمري ډیکارلو سره ټیلیفوني خبرې کړې دي. د طالبانو د بهرنیو چارو وزارت وايي، په دې خبرو کې دواړه لوري د همکاریو د پیاوړتیا او د دوحې پروسې په تړاو د راتلونکي تعامل پر څرنګوالي غږیدلي دي.
د پاکستان بلوچستان ایالت په مستونګ ولسوالۍ کې د ملي لویې لارې پر دوو بېلابېلو ځایونو کې په ډزو ویشتل شوي شپږ جسدونه موندل شوي دي.
د تمدن ټلویزیون د راپور له مخې، تېره شپه د طالبانو له لوري د خاتمالنبیین له مدرسې د نیول شویو استادانو، محصلینو او نورو کسانو شمېر ۲۸ تنو ته رسېدلی دی.
په لوېدیځ ایران کې د تېلو د یوه ټانکر د سختې چاودنې له امله لږ تر لږه ۱۱ کسان مړه شوي او ۷ نور ټپیان شوي دي. دا خونړۍ پېښه د ایران په سنندج سیمه کې رامنځته شوې ده.
په داسې حال کې چې له څه باندې پنځو کلونو راهیسې له شپږم ټولګي پورته د افغان نجونو پر زده کړو بندیز دوام لري، د طالبانو د پوهنې وزارت خبر ورکړی چې نن یکشنبه په ګرمسیرو ولایتونو کې نوی ښوونیز کال د یو لړ مراسمو په ترڅ کې پیل شو.
د افغانستان لپاره د ملګرو ملتونو ځانګړی راپور ورکوونکی رېچارډ بېنټ به د سپټمبر په اوومه د ملګرو ملتونو د بشري حقونو شورا ته د افغانستان د بشري حقونو د وضعیت په اړه خپل نوی راپور وړاندې کړي او د دغه هېواد پر روان بشري وضعیت به له غړو هېوادونو سره متقابل بحث وشي.
د طالبانو تر واک لاندې د المپیک، بدني روزنې او ورزش ریاست وایي،د غزني ولایت په کوربه توب د نهو ولایتونو د مویتای سرو زرو کمربند سیالیو په پای کې کابل ولایت د شپږو کمربندونو په ګټلو لومړی مقام خپل کړ.
د پاکستان ولسمشر آصف علي زرداري د افغانستان پر واکمنو طالبانو غږ کړی چې خپله خاوره د ترهګرۍ لپاره کارولو ته پرې نهږدي. زرداري ویلي چې د بهرنیو ملاتړو لرونکو ترهګرو شوم پلانونه به په هر قیمت ناکام کړي او د پاکستان د سرحدونو دفاع د دوی لومړیتوب دی.
د طالبانو د کرنې، اوبولګولو او مالدارۍ وزیر مولوي عطاءالله عمري وايي، په تېرو پنځو کلونو کې د هېواد د ځنګلونو د ساتنې او پراختیا په برخه کې د پام وړ کار شوی او د افغانستان په بېلابېلو سیمو کې ۱۱۰ میلیونه نیالګي کېنول شوي دي.
ایشین ایج ورځپاڼې په راپور کې ویل شوي، د تحریک طالبان پاکستان (ټي ټي پي) د فعالیتونو په اړه د افغانستان او پاکستان متقابلو تورونو د دواړو هېوادونو اړیکې له جدي کړکېچ سره مخ کړې دي.
د طالبانو عدلیې وزارت وايي، د کابل په بګرامۍ ولسوالۍ کې د «احسان مېنې» ښارګوټي د څه باندې ۳۶۴ جریبه ځمکې د اسنادو له ارزونې وروسته، ۶۹،۴۵ جریبه ځمکه دولتي تثبیت شوې ده.
د خیبر پښتونخوا د پولیسو مشر ذوالفقار حمید په مشرۍ غونډه کې په حساسو سیمو په ځانګړي ډول سویلي ولسوالیو کې د امنیتي ننګونو د مخنیوي لپاره پولیسو او د ترهګرۍ ضد ځواک ته د پرمختللو وسلو، ډرون الوتکو او زغره والو ګاډو پر ورکولو پرېکړه شوې.
د پاکستان د اطلاعاتو پخواني وزیر فواد چوهدري ویلي، په افغانستان او خیبرپښتونخوا کې روانې شخړې تر ډېره قبایلي ریښې لري او د دغو ستونزو پړه پر پنجاب او پنجابیانو اچول سراسر جهالت دی.
د طالبانو د کورنیو چارو وزارت وایي، د نشهيي توکو پر وړاندې د مبارزې ځواکونو یې په درېیو ولایتونو کې ۱۷۸۵ کیلوګرامه بېلابېل ډوله نشهيي توکي او ۴۵۰۰ نشهيي ګولۍ کشف او په تړاو یې څلور تنه نیولي دي.
هرات کې د طالبانو د ولایت مقام مطبوعاتي دفتر وایي، د دغه ولایت په صنعتي ښارګوټي کې یوه تولیدي فابریکه هره ورځ تر ۲۵ ټنو پورې د روميانو روب تولیدوي او کورنیو بازارونو ته یې وړاندې کوي.
د بلخ ولایت د طالبانو د اطلاعاتو او فرهنګ ریاست وایي، په دغه ولایت کې د قزاقانو د لاسي صنایعو نندارتون جوړ شوی، چې موخه یې د بېلابېلو قومونو د فرهنګونو او دودونو نندارې ته وړاندې کول او د هغوی دودېدل بلل شوې دي.
د جرمني په تورینګن ایالت جینا ښار کې د «پنځه کاله مقاومت؛ زموږ غږ لا هم لوړ دی» په نوم غونډه کې ګډونوالو ویلي چې نر واکي یو تاریخي ټولنیز جوړښت دی خو له منځه تللی شي.
د پاکستان پوځ اعلان کړی چې په خیبر پښتونخوا کې د سپټمبر له دویمې تر پنځمې نېټې په بېلابېلو نښتو کې لږ تر لږه ۲۱ وسله وال مخالفین وژل شوي دي. د پوځ د عامه اړیکو دفتر وایي چې د دغو کسانو لویه برخه په شمالي وزیرستان کې د ډیورنډ کرښې ته نږدې په نښتو کې وژل شوې ده.