د امریکا د مرکزي استخباراتو ادارې (سياېاې) پخوانۍ ماموره سارا اډمز وايي، په افغانستان کې د ښځو پر زدهکړو بندیزونه او روان وضعیت د جدي اندېښنې وړ دی. د نوموړې په وینا، افغان ځوانان د اوسني وضعیت پر ځای د بدلون او د طالبانو د واکمنۍ د پای ته رسېدو غوښتونکي دي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې تېره ورځ ۸۷۹ کډوالې کورنۍ چې ټول ۴۶۱۷ کسان کېږي، له ایران او پاکستان نه افغانستان ته ستنې شوې دي.
د سمندري څار راپورونو او د «ټانکر ټرکرز» د معلوماتو له مخې، چې د نفتو لېږد رالېږد څاري، د ایران د خامو تېلو د استخراج ملي شرکت یوه لویه کښتۍ چې له ۱.۹ میلیونو څخه ډېر بېرله خام تېل یې بار کړي، د امریکا د تعقیبي سیسټمونو له تېرېدو وروسته ختیځو اوبو ته رسېدلې ده.
د امریکا د مرکزي استخباراتو ادارې، په تازه خپور شوي راپور کې ویلي چې د القاعده پخوانی مشر اسامه بن لادن د ۲۰۱۱ کال د مې میاشتې له عملیاتو څو میاشتې مخکې نږدې شوی و چې د پاکستان په ایبټاباد کې خپل پټنځای پرېږدي، خو د همدې مودې په ترڅ کې یې لا هم د القاعده مشري او لارښوونه کوله.
د شمالي کوریا د بهرنیو چارو وزارت د امریکا هغه تورونه رد کړي چې ګواکې پیونګیانګ سایبري ګواښ رامنځته کوي او دا ادعاوې یې «جوړې شوې خبرې» بللي دي. دغه هېواد همداراز خبرداری ورکړی چې د خپلو ګټو د دفاع لپاره به په سایبري فضا کې لازم اقدامات ترسره کړي.
د ملګرو ملتونو د تعلیمي، علمي او کلتوري سازمان (یونسکو) د کابل دفتر وايي، په نړۍ کې د بیان ازادي له ۲۰۱۲ کال راهیسې ۱۰ سلنه راکمه شوې او د خبریالانو د ځانسانسور کچه ۶۳ سلنه لوړه شوې.ورته مهال په افغانستان کې پر رسنیو محدودیتونه او د خبریالانو نیونو رسنیز چاپېریال اغېزمن کړی.
د پاکستان تحریک انصاف ګوند او د هغه متحدینو اعلان کړی چې د ګوند د بنسټګر او د پاکستان پخواني لومړي وزیر عمران خان د خوشې کېدو لپاره به په ټول هېواد کې د لاریونونو لړۍ پیل کړي.
امریکایي رسنیو د سپنې ماڼۍ له قوله راپور ورکړی، نېک سټوارټ چې د امریکا د بهرنیو چارو وزارت پخوانی کارکوونکی دی او د ډونالډ ټرمپ د ولسمشرۍ په لومړۍ دوره کې یې د ایران په اړوند چارو کې کار کړی، اوس به له ایران سره د خبرو په بهیر کې برخه واخلي.
د امریکا د کرنیزو څېړنو خدمتونو ادارې نوې څېړنه ښيي، چې که څه هم د شاتو مچۍ کولی شي په خوړو کې ویروسونه وپېژني، خو کله ناکله بیا هم ککړ خوراک ته لومړیتوب ورکوي. دا موندنه کولای شي، د شاتو مچیو ترمنځ د ناروغیو د خپرېدو د څرنګوالي په ښه پوهېدو کې مرسته وکړي.
د امریکا ولسمشر، ډونالډ ټرمپ ویلي چې د ایران پر ضد د پوځي بریدونو د بیا پیل احتمال شته. هغه د خبریالانو د یوې پوښتنې په ځواب کې وویل: «دا امکان شته چې دا کار وشي.» نوموړي د ایران د سویلي بندرونو د محاصرې په اړه هم وویل: «دا یوه ډېره دوستانه محاصره ده.»
د رسنیو د ازادۍ نړیوالې ورځې په مناسبت په یوه خپور کړي پيغام کې د پاکستان ولسمشر اصف علي زرداري ویلي، چې اوس مهال د مطبوعاتو د ازادۍ پر وړاندې سترې ننګونې شتون لري.
ملګرو ملتونو ویلي، پر خبریالانو بریدونه د بیان ازادۍ پر ضد بریدونه دي او حکومتونه باید د مطبوعاتو د ازادۍ د خوندیتوب ژمنې عملي کړي. د ملګرو ملتونو په وینا، د مې درېیمه هر کال د رسنیو د ازادۍ نړیوالې ورځې په توګه نمانځل کېږي او د باوري معلوماتي سرچینو اړتیا تر هر وخت ډېره شوې.
د افغانستان لپاره د ملګرو ملتونو د بشري حقونو ځانګړي راپورونکي ریچارډ بېنېټ د اپرېل ۳۰مه په جینوا کې ویلي، چې له طالبانو غواړي ټول نیول شوي خبریالان پرته له کوم شرطه ژر تر ژره خوشې کړي او تضمین ورکړي چې د رسنیو کارکوونکي به له وېرې او غچ اخیستنې پرته خپل کار ته دوام ورکړي.
د امریکا د متحده ایالاتو د کانګرس دوه لوړپوړو جمهوريپالو غړو د پنتاګون هغه پرېکړه چې له مخې یې شاوخوا ۵زره امریکايي سرتېري له جرمني څخه ایستل کېږي، تر نیوکې لاندې راوستې ده.
د طالبانو د عامې روغتیا وزارت وایي، چې طالب وزیر مولوي نور جلال جلالي د هېواد شمالي زون ته سفر کړی او د شاوخوا ۳۰۰ میلیونه افغانیو په ارزښت یې د ۷ روغتیايي پروژو د بنسټ ډبرې اېښودې دي. د یاد وزارت په وینا، دغه پروژې په جوزجان، سمنگان او کندز ولایتونو کې پلي کېږي.
د پاکستان بهرنیو چارو وزارت د افغانستان لپاره د بریتانیا د ځانګړی استازي ریچارډ لېنډسي، وروستۍ څرګندونې رد کړې او دا یې «یو اړخیزې» او د ډیورنډ کرښې د ستونزو د ژور درک پرته بللي دي.
د افغانستان د کرکټ د کورنیو سیالیو په لړ کې د «امید وطن» د شلاوریز جام سیالۍ د افغانستان کرکټ بورډ تر څار لاندې روانې دي، چې په وروستیو لوبو کې یې د مس عینک او بُست لوبډلو بریاوې خپلې کړې دي.
د طالبانو د ترانسپورټ او هوايي چلند وزارت ویلي، تر دې مهاله د مسافروړونکو او باروړونکو موټرو د نوبت، احصایې او د عوایدو په برېښنايي سیستمونو کې، ټولټال ۱۰۷ زره او ۴۵۵ موټر ثبت شوي دي. د وزارت په وینا، دا بهیر د ټرانسپورټي چارو د شفافیت او د خدماتو د کیفیت د لوړولو لپاره روان دی.
د ایران د قضاییه قوې مشر، غلام حسین محسیني اژه یي ویلي، چې هېواد یې جګړه نه غواړي، خو که عزت یې وګواښل شي، جګړې ته به لاس واچوي.
په تهران کې د طالبانو د سفارت سرپرست مولوي فضلمحمد حقاني د ایران د عدلیې وزارت له مرستیال عسکر جلالیان سره لیدنه کړې ده. خبرپاڼه وایي، دې لیدنه کې د عدلي او قضايي همکاریو د پراخېدو او د افغان بندیانو د لېږد د بهیر د نوي پړاو پر پیل خبرې شوې دي.
د پاکستان کرکټ بورډ وایي، چې د پاکستان سوپر ليګ جام ۱۱ پړاو کرکټ سياليو پايلوبه ګټونکې لوبډلې لپاره د ۵۰۰زره ډالرو جایزه ټاکل شوی، او بايلونکې لوبډلې ته به ۳۰۰زره ډالره ورکړل شي.