آرشیف

خپاره شوي انځورونه ښيي، چې په قطر کې د طالبانو سفیر سهیل شاهین په دوحه کې د ازبکستان د یوه فرهنګي نندارتون د پرانیستې په مراسمو کې د ازبکستان او قطر له یوشمېر لوړپوړو ښځینه چارواکو سره یوځای ګډون کړی دی.

د افغانستان روغتیايي برخه چې د متخصصو روغتیاپالو له سخت کمښت سره مخ ده، دامهال په ختیځو ولایتونو کې د سختو، پېچلو جراحي او ان د ماشوم د زېږون لوی عملیاتونه روغتیاپالې او قابلې په ډېرې سختۍ او کمې تجربې سره ترسره کوي. په ننګرهار کې د ښځینه متخصصو شمېر کم او په نورستان کې صفر دی.

په برلین کې روسي ډیپلوماتانو خبرداری ورکړی، لکه څنګه چې په اروپا کې د پوځي کېدو لړۍ ګړندۍ کېږي؛ په جرمني کې د اوږد واټن وېشتونکو وسلو سیسټمونو ځای پرځای کېدو سیمې به د روسیې د پوځ لپاره مشروع پوځي موخې شي.

د هه‌نګاو په نوم د ایران د بشري حقونو څار سازمان خبر ورکړی، چې ایران د دوو افغانانو په ګډون درې کسان د مشهد په مرکزي زندان (وکیل‌اباد) کې د عمدي وژنې په تور اعدام کړي دي. یاد سازمان ویلي، چې دغه دوه افغانان په پټه او پرته له دې چې کورنۍ یې خبرې شي اعدام شوي دي.

په روزګان کې د طالبانو د کرنې ریاست د طبیعي سرچینو امر عبدالمنان فاروقي وايي، چې سږکال یې د دغه ولایت له ۶زره هکټاره باغونو څخه نږدې ۲۴زره ټنه بادام راټول کړي دي. د دغه ولایت بڼوال حاصلاتو ته د بازار موندنې غوښتنه کوي.

په هرات کې د طالبانو د کرنې او مالدارۍ ریاست د محصولاتو خونه وایي، چې سږکال په دغه ولایت کې د انځرو حاصلات د تېرکال پرتله ۵۰ سلنه زیات شوي او د دغه محصول لپاره کورنی بازار هم ښه شوی دی.

فایننشل ټایمز راپور ورکړی، منځګړي هڅه کوي د امریکا او ایران ترمنځ د خبرو اترو د نوي پړاو لپاره یو چوکاټ رامنځته کړي. د دغه راپور له مخې، امریکا د یوې نوې هوکړې په لټه کې ده چې د اسلام‌اباد د تفاهم یادښت څخه پراخه وي او د هرمز تنګي او اټومي مسلو په څېر موضوعات به په‌کې شامل وي.

پاکستاني رسنیو راپور ورکړی، چې د خیبر پښتونخوا د مانسهرې پولیسو د ولسوالۍ له ادارې سره په ګډو عملیاتو کې تر لسو ډېر افغانان د ناقانونه استوګنې په تور نیولي دي. ټاکل شوې، چې دغه کسان به د قانوني پړاوونو تر بشپړېدو وروسته افغانستان ته ولېږدول شي.

د طالبانو تر واک لاندې د افغاني سرې میاشتې ټولنې مشر شهاب‌الدین دلاور د روسیې د سور صلیب له رییس پاول ساوجوک سره په لیدنه کې له افغانستان سره د دغه هېواد د بشري مرستو د دوام او زیاتېدو غوښتنه کړې.

امریکایي چارواکو په لاس‌انجلس ښار کې د هغه ۴۰ کلن سړي د نیولو خبر ورکړی، چې د ډونالډ ټرمپ د وژلو ګواښ او د هغه د شخصي وکیل او د وکیل د کورنۍ د انلاین ځورونې تور پرې لګېدلی دی.

د ملګرو ملتونو د ماشومانو ملاتړ صندوق (یونېسف) په خپل تازه راپور کې ویلي، چې په جولای میاشت کې په افغانستان کې وروستیو سېلابونو په ۱۴ ولایتونو کې ۱۱۶۸ کورنۍ اغېزمنې کړې دي. د راپور له مخې، په دغه سېلابونو کې ۱۱۶۴ کورونه برسېرن یا په بشپړ ډول ویجاړ شوي دي.

د کډوالو لپاره د ملګرو ملتونو عالي کمېشنرۍ په خپل تازه راپور کې د پاکستان له‌خوا د افغانانو د بېرته ستنولو بهیر په اړه اندېښنه ښودلې او د پاکستان له حکومته یې د هغه افغانانو د جبري ستنولو لړۍ درولو غوښتنه کړې، چې له ګواښ سره مخ دي او نړۍوال خوندیتوب ته اړتیا لري.

اکسیوس راپور ورکړی، چې د امریکا مرکزي قوماندانۍ (سنټکام) د ډرونونو د انځورونو او د موخو د ټاکلو څرنګوالي په بیاکتنې سره په سیریک کې د واده پر مراسمو د خونړۍ چاودنې د سرچینې په اړه څېړنه کوي.

د بې‌ځایه شویو نړۍوال سازمان مشر‌ محمداشرف حیدري په افغانستان کې د ملي ژبو په اړه د راپورته شویو بحثونو په غبرګون ویلي، تبعیض افغانان اړ باسي چې خپل هېواد پرېږدي او ډېری هغه کسان چې له هېواده بهر کډوال شوي یا په کور دننه بې‌ځایه شوي؛ خپلو سیمو ته د بېرته ستنېدو په اړه اندېښمن دي.

د هرات پوهنتون د طب د غاښونو څانګې یو محصل افغانستان انټرنشنل ته په لیږلي پيغام کې ویلي، طالبانو د دغه څانګې شاوخوا ۷۰ محصلین د «سنت او شریعت» د نه مراعتولو په پلمه له پوهنځي‌ اېستلي او خبرداری یې ورکړی چې تر دویمې خبرتیا پورې دې پوهنتون ته نه ورځي.

د سرپل ولایت یو اوسېدونکي افغانستان انټرنشنل ته په لېږلي پیغام کې ویلي، چې په دغه ولایت کې د اوبو وضعیت د تېرو کلونو پرتله ډېر بدل شوی او د اوبو سرچینې په پراخه کچه کمې شوې دي.

د خیبر پښتونخوا د پېښور په کنفرانس کې لسګونه کارپوهانو او سیاسي فعالانو غوښتنه کړې، چې د افغانستان او پاکستان ترمنځ تړل شوې ټرانزیټي لارې دې ژر تر ژره پرانیستل شي. دوی ټینګار کړی، چې سوداګري باید له سیاسي او امنیتي ستونزو جلا وساتل شي.

د امریکا ولسمشر ډونالډ ټرمپ وایي، چې متحده ایالات د ایران د اټومي تاسیساتو اړوند فعالیت له نږدې څاري. نوموړي زیاته کړه، چې واشنګټن د دغه تاسیساتو شاوخوا د فعالیتونو په اړه کره معلومات لري.

په نورستان کې د طالبانو د امنیه قوماندانۍ ویاند محمد حسن ثاقب وايي، چې د دغه ولایت په نورګرام ولسوالۍ کې یې د یوې نجلۍ د وژنې په تور درې کسان نیولي دي. نوموړي ویلي، چې د یادې ولسوالۍ په پړيسو کلي کې یوه ۱۷کلنه نجلۍ د «چارایز» ډوله وسلې پرمټ وژل شوې ده.

د امریکا د خزانې وزیر سکاټ بسنټ اعلان کړی چې اروپايي ټولنه په رسمي ډول له هغه څه سره یوځای شوې چې نوموړي د اسلامي جمهوریت د «اقتصادي منزوي کولو» عملیات بللي دي. هغه ویلي، واشنګټن په دې برخه کې د اروپا د «قاطع او وختي دریځ» هرکلی کوي.

هندي سینما (بالیووډ) د سپټمبر له پیل سره سم د څو لویو فلمونو د خپرېدو لپاره چمتووالی نیسي. «میرزاپور » سبا سینماوو ته وړاندې کېږي، په داسې حال کې چې «کینګ»، «رامایانا» او «ډریشیم ۳» د ۲۰۲۶ کال له هغو فلمونو دي چې د مینه‌والو پام یې ځان ته اړولی دی.