د طالبانو د پوهنې وزیر حبیب الله اغا د عصري علومو پر زده کړې ټینګار کړی او وايي، چې په کلاشنکوف او زېړه بوشکه د «دښمن» دفاع نه شي کېدای. نوموړی وايي، په اوسني وخت کې «زېړه بوشکه» په کار نه ورځي او باید پرمختللی دفاعي سیستم ولري.
د طالبانو عدلیې وزارت خبر ورکړی، چې د مرکزي زون د غصب شویو ځمکو قضیو ته د رسیدګۍ ځانګړي محکمې په کابل کې د امید سبز ښارګوټي په نوم څه باندې ۱۵۰۰ جریبه ځمکه دولتي اعلان کړې ده.
د طالبانو عامې روغتیا وزارت ویلي چې په خوست ولایت کې یې شاوخوا ۵۰ ټنه نېټهتېر بېکیفیته درمل، خوراکي او طبي توکي سوځولي دي.
د افغانستان د رسنیو ملاتړ سازمان وايي، چې افغان خبریال حبیبالله عزیزي په متحده ایالاتو کې د یوې ترافیکي پېښې له امله مړ شوی دی. عزیزي له لسو کلونو راهیسې د افغانستان خصوصي رسنیو کې د ویډیو اخیستونکي په توګه کار کړی و.
د طالبانو د بلخ والي محمد یوسف وفا ادعا کړې، چې پخوانی جمهوري نظام د بن کنفرانس له لارې پر افغانانو «تپل شوی نظام» و او د خلکو له غوښتنو سره یې سمون نه درلود. هغه ادعا وکړه، چې د طالبانو اداره د خلکو له متن نه «انتخاب شوی نظام» دی.
د کونړ ځینو قومي مشرانو افغانستان انټرنشنل ته وویل، چې ددغه ولایت د سرکاڼو ولسوالۍ قومي مشرانو د ډیورنډ کرښې هغې غاړې مشرانو سره خبرې پیل کړې دي، چې پاکستاني ځواکونه پر کونړ بریدونه ودروي. د دوی په وینا، د طالبانو په اجازه د دایمي اوربند د څرنګوالي په تړاو دوه ناستې شوې دي.
د ملګرو ملتونو د بشري مرستو همغږۍ ادارې «اوچا» په خپل تازه راپور کې ویلي، چې طالبان په ځانګړې توګه د ددې ډلې د امربالمعروف اداره د بشري سازمانونو په فعالیتونو او د کارکوونکو په ګومارنه کې لاسوهنه کوي.
د ایران قضايي چارواکي وایي، یو کس چې د «جیش العدل» په نوم د سني وسلهوالې ډلې له غړیتوب او پر امنیتي ځواکونو د بریدونو په ترسره کولو تورن و، اعدام شوی دی.
د پاکستان روغتیايي چارواکي وایي، سږ کال د شري ناروغۍ له امله ۷۱ ماشومان مړه شوي او په ټول هېواد کې له ۴۵۰۰څخه زیاتې پېښې ثبت شوې دي. ډاکټران وایي، د واکسین د کم پوښښ له امله د دې ناروغۍ د پراخېدو په اړه اندېښنې زیاتې شوي.
د طالبانو د کانونو او پټرولیم وزارت وايي، د جوزجان ولایت د یتیمتاق د سمنټو فابریکې عملي چارې به سبا په رسمي ډول پیل شي.
د طالبانو د امر بالمعروف وزارت وایي، د غزني، بغلان او میدان وردګ ولایتونو کې یې پنځه مېرمنې له کورني تاوتریخوالي او نورو ستونزو ژغورلې دي.
د سپینې ماڼۍ د خبریالانو په مېلمستیا کې د ډزو له پېښې وروسته، د نړۍ یو شمېر مشرانو د ډونالډ ټرمپ د خوندیتوب په اړه خوښي څرګنده کړې او ټینګار یې کړی چې سیاسي تاوتریخوالی باید په کلکه وغندل شي.
د طالبانو د سرحدونو قومونو او قبایلو چارو وزیر نورالله نوري سمنګان ولایت ته د خپل سفر په ترڅ کې یوې ولسي غونډې ته د وینا پر مهال له خلکو غوښتي چې له دوی څخه ملاتړ وکړي.
هرات کې د طالبانو چاپېریال ساتنې ریاست مسولین وايي چې، له عامو خلکو راټول شوي ۳۶ ډوله بېلابېل مرغان یې طبیعت ته خوشې کړي.
د پاکستان تحریک انصاف ګوند په یوه پراخه ولسي غونډه کې د خیبر پښتونخوا اعلی وزیر سهیل اپریدي ویلي، چې د ګوند بنسټګر او پخواني لومړي وزیر عمران خان د خوشې کېدو لپاره به خپل لاریونونه دوامداره کړي او دا لړۍ به له کشمیره پیل کړي.
غزني کې د طالبانو اطلاعاتو او فرهنګ ریاست وایي، د دې ولایت په بېلابېلو سیمو کې د مسلکي ټیمونو له لوري ۲۴ تاریخي اثار موندل شوي چې ۲۳ سفالي (خټین) توکي او یو ډبرین لیکلی اثر پکې شامل دي او ټول د ولایت موزیم ته انتقال شوي دي.
د طالبانو د بهرنیو چارو وزیر مولوي امیرخان متقي په کابل کې د دودیزې غیږنیونې نړیوالې جشنوارې د ګډون کوونکو هېوادونو له استازو سره د لیدنې پر مهال ویلي چې د ورزشي ډیپلوماسي له لارې هڅه کوي له نړۍ سره اړیکې نورې هم پراخې او پیاوړې کړي.
په اسټرالیا کې د افغانستان سفارت د انزاک ورځې په مناسبت ویلي چې د افغانستان په جګړه کې د وژل شویو ۴۱ اسټرالیایي او ۱۰ نیوزیلنډي سرتېرو قربانۍ ته درناوی کوي او هغوی یې د یاد وړ بللي دي.
د هند په اندرا ګاندي نړیوال هوايي ډګر کې د سویس هوايي شرکت یوې مسافر وړونکې الوتکې د پورته کېدو پر مهال د انجن د تخنیکي خرابۍ له امله اور اخیستی چې په پایله کې یې شپږ مسافر ټپیان شوي دي.
د طالبانو تر کنټرول لاندې د غوښو او لبنیاتو دولتي شرکت (مسلخ) مسوولین وايي، د کابل ښار قصابیو او ځینو دولتي ادارو ته د معیاري او صحي غوښې د برابرولو بهیر پراخ شوی او دا اداره د غوښې د کورني تولید ترڅنګ د وارداتي اړتیاوو د کمولو هڅه کوي.
د امریکا ولسمشر ډونالډ ټرمپ ویلي، داسې انګېرنه نه لري چې د سپینې ماڼۍ د خبریالانو په مېلمستیا کې د ډزو پېښه دې د ایران له جګړې سره تړاو ولري، خو ټینګار یې کړی چې د پلټنو له بشپړېدو پرته په بشپړ یقین سره څه نه شي ویل کېدای.