د ایران د بهرنیو چارو وزارت مرستیال کاظم غریبابادي وايي: «د هرمز تنګی تړلی دی او که کومه کښتۍ له دې لارې تېرېږي، دا کار به د تهران په همغږۍ او اجازې ترسره کېږي». د سپینې ماڼۍ د دفتر مرستیال سټېفن مېلر بیا وايي، د هرمز تنګی د امریکا لپاره پرانیستی او د ایران لپاره تړلی دی.
د بلجیم د لیژ پوهنتون څېړونکو موندلې چې د خوب پر مهال لنډ او پرلهپسې ویښېدل ښايي د الزایمر ناروغۍ له زیات جنیټیکي خطر سره تړاو ولري.الزایمر یوه مخ پر زیاتېدو د مغزو ناروغي او د هېرېدنې تر ټولو عام ډول دی، چې په تدریجي توګه د انسان حافظه، د فکر کولو وړتیا او ذهني فعالیت اغېزمنوي.
د اسلامي وحدت ګوند مشر محمد محقق له افغانستان انټرنشنل سره په مرکه کې ویلي، چې طالبان په بنسټیز ډول په افغانستان کې د هزاره او شیعه ټولنې له حضور سره مخالف دي.
متحده جبهه وايي، د هلمند په نوزاد سیمه او د کونړ د مرکز پر لومړۍ امنیتي حوزې په دوو جلا بریدونو کې یې ۸ طالبان وژلي دي. دغه جبهه وايي، له یادو طالبانو یې یو شمېر وسلې هم ترلاسه کړې دي. طالبانو لا تر اوسه په دې تړاو څه نهدي ویلي.
د خیبرپښتونخوا اعلی وزیر سهیل اپریدي په هریپور کې د وژل شوې پنځه کلنې ماشومې ایت نور کورنۍ ته د انصاف ورکړې ژمنه وکړه. هغه ګواښ وکړ، چې د دې پېښې عاملینو ته به داسې سزا ورکړل شي، چې د نورو لپاره «عبرت» شي. دغه ماشومه تېره میاشت له تښتول کېدو او پرې له جنسي تېري وروسته وژل شوې ده.
د طالبانو د المپیک، بدني روزنې او سپورټ ریاست وايي، چې په کندوز کې د شمال او شمالختیځ زونونو او د هېواد د یو شمېر نورو ولایتونو د کیکبوکسینګ لسم پړاو سیالۍ د کوربه ولایت په اتلولۍ پای ته ورسېدې. په دغو سیالیو کې بلخ او تخار په ترتیب سره دویم او درېیم مقامونه وګټل.
د پاکستان د بلوچستان ايالت د کورنيو چارو وزير ضيا لانګو ادعا کړې، چې د بلوچستان ازادي غوښتونکې (بياېلاې) ډلې لهخوا د ځانمرګو بریدونو لپاره چمتو شوې ۲ کم عمره نجونې د امنیتي ځواکونو له لوري ژغورل شوې دي. بياېلاې لا تر اوسه د لانګو د دغې ادعا په اړه څه سپیناوی نهدی کړی.
د هرات لپاره د طالبانو والي نور احمد اسلامجار وايي، په هرات کې به د ټاپي پروژې چارې تر دوو میاشتو پورې بشپړې شي. نوموړي له صنعتکارانو او د هرات له خلکو وغوښتل، چې د ښار په کچه فابریکو او کورونو ته د ګازو د لېږد لپاره لازم چمتووالی ونیسي.
په جاکارتا کې د طالبانو د سفارت سرپرست سعدالله بلوچ او د دغې ډلې د بهرنیو چارو وزارت لومړي سیاسي رییس شعیب بریالي د اندونیزیا د دیني چارو له وزیر او د استقلال جومات له ملا امام نصیرالدین عمر سره په لیدنه کې د دوه اړخیزو اړیکو، د دیني او کلتوري همکاریو پر پیاوړتیا خبرې کړې دي.
د طالبانو تر کنټرول لاندې د افغانستان برېښنا شرکت وايي، د لومړي ځل لپاره د پکتیا په مرکز او زرمت ولسوالۍ کې ۱۱۰۰ کورنۍ د برېښنا له رڼایۍ برخمنې شوې. خو ملګري ملتونه وايي، د افغانستان شاوخوا ۶۰ سلنه وګړي لا هم برېښنا ته لاسرسی نهلري.
د طالبانو د رېل پټلۍ ادارې رییس عبدالکریم فاتح په کابل کې د ایران له سفیر علی رضا بیکدلي سره لیدنه کې د دواړو هېوادونو او د هرات–مزارشریف د رېل پټلۍ د جوړولو په اړه خبرې کړې دي.
د طالبانو د امارتي شرکتونو یو درې کسیز پلاوی د دغه شرکت د اجرایوي رییس رحمت الله مکي په مشرۍ د اسیا پوستي اتحادیې په ۱۴مه کنګره او د اجرایوي رییسانو په عمومي ناسته کې د ګډون لپاره د ټایلنډ پلازمېنې بنکاک ته تللی دی.
د طالبانو مخالفې ډلې «مقاومت جبهې» ویلي، چې ځواکونو یې تېره شپه د هرات ولایت په شیدایي سیمه کې پر طالبانو برید کړی، چې په پایله کې یې د الفاروق قول اردو د کشف قوماندان «ټپي شوی او دوه ساتونکي یې وژل شوي» دي.
د روسیې د بېپیلوټه الوتکې برید د اوکراین پلازمېنې کییف ته څېرمه یو وسله تون په نښه کړی، چې له امله یې لږ تر لږه ۳۷ کسان وژل شوي دي. په دغه وسله تون کې د توپونو مرمۍ، ماینونه، بېپیلوټه الوتکې او نور مهمات ساتل کېدل.
د بدخشان ولایت د بهارک ولسوالۍ سیمهییزې سرچینې وايي، د طالبانو د فراه والي ملا حافظ مجاهد او د بهارک ولسوالۍ د امنیه قوماندان ابراهیم ملنګاب د وسلهوالو ساتونکو ترمنځ په نښته کې یو ملکي وګړی وژل شوی دی.
د طالبانو د لوړو زده کړو وزیر ندا محمد ندیم وایي، د هېواد په پوهنتونونو کې د فوق لېسانس پروګرامونو په رامنځته کېدو سره به افغانستان ډېر ژر «د بهرنیو استادانو له احتیاجه» خلاص شي او ځوانانو ته به د مسلکي زده کړو ترڅنګ «فکري او عقیدوي روزنه» هم ورکړل شي.
د اروپايي پارلمان د بشري حقونو د فرعي کمېټې غړي راتلونکې پنجشنبه له اروپايي ټولنې څخه افغانستان ته د کډوالو او پناه غوښتونکو د بېرته ستنولو په اړه بحث کوي. په غونډه کې به د طالبانو له استازو سره د بروکسل پر وروستۍ ناسته او د افغانستان د بشري حقونو پر وضعیت هم خبرې وشي.
د طالبانو د صنعت او سوداګرۍ وزارت مرستیال احمدالله زاهد د ازبکستان د قشقه دریا ولایت له مرستیال والي شهرت مرادوف سره په لیدنه کې د مستقیمو اقتصادي همکاریو، ګډې پانګونې، کرنې، پنبې او نساجۍ او صنایعو په برخو کې د همکاریو پر پراختیا خبرې کړې دي.
د طالبانو ویاند ذبیحالله مجاهد له رشیا ټوډې سره په یوه مرکه کې ویلي، چې کابل له واشنګټن سره د عادي ډیپلوماتیکو اړیکو غوښتنه کوي او غواړي په افغانستان کې د امریکا سفارت بېرته پرانیستل شي او په واشنګټن کې د افغانستان دیپلوماتیک ماموریت هم بیا فعال شي.
د طالبانو ویاند ذبیح الله مجاهد ویلي، چې د سعودي عربستان، ترکیې او پاکستان ترمنځ د مکې درې اړخیز پوځي تړون د افغانستان لپاره نه د اندېښنې وړ دی او نه هم ګواښ دی. نوموړي په یوه مرکه کې دغه تړون د ټولې اسلامي نړۍ په ګټه وباله.
د نایجر په پلازمېنه نیامي کې د شنبې په سهار هوايي ډګر او ولسمشرۍ ماڼۍ ته نږدې د څو ساعتونو لپاره درنې ډزې او چاودنې وشوې. رویټرز د څلور سرچینو په حواله ویلي چې برید یاغي سرتېرو کړی او امنیتي وضعیت لا هم ترینګلی دی.