د افغانستان لپاره د روسیې د ولسمشر استازی ضمیر کابلوف وايي، چې د پاکستان او طالبانو ترمنځ کړکېچ په افغانستان کې د روسیې په مشارکت د سیمهییزو پروژو پلي کول ځنډوي. هغه وویل، چې د دوی ترمنځ له میاشتو راهیسې کړکېچ په سیمه کې نازک امنیتي وضعیت لا کمزوری کړی دی.
د چهارشنبې په ورځ (د وري ۲۶مه) د خیبر پښتونخوا ولسوالۍ بنو ټاون شپ ته اړوند داوړ کالوني جهنډوخېل سیمه کې ناپېژاندو وسلهوالو د ګوزڼ ضد واکسینو کمپاین پرمهال درې واکسیناتوران تښتولي دي.
په هرات کې د طالبانو د والي ویاند محمدیوسف سعیدي وایي، د دغه ډلې والي اسلام جار د ایران له مرستیال سفیر حسن مرتضوي سره په لیدنه کې د اسلامکلا بندر له لارې د سوداګرۍ کچې پر لوړولو او د دوغارون او اسلامکلا پر پوله د ترانسپورټي ستونزو د حل په اړه خبرې کړې دي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ ۸۲۴ کډوالې کورنۍ چې ټولټال ۴زره او ۴۴۱ کسان کېږي؛ له ایران او پاکستان نه افغانستان ته ستنې شوې دي.
د طالبانو د کډوالو او بېرته راستنېدونکو چارو وزارت د پنجشنبې په ورځ (د وري ۲۷مه) خبر ورکړی، چې په روانه اونۍ کې ۸۲ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته بېرته افغانستان ته ستانه شوي دي.
د بلوچستان د کویټې ښار د ډیګاري سيمې د سکرو په یوه کان کې د چهارشنبې په ورځ د زهرجن ګاز د خپرېدو له امله درې کان کېندونکي مړه شوي دي. د ځايي سرچینو په وینا؛ پېښه هغه مهال رامنځته شوه، چې کان کېندونکي په دغه کان کې په کار بوخت و.
د ناټو سرمنشي مارک روټه ویلي، چې دغه ټلواله به اوکراین ته د دفاعي مرستو مالي لګښتونه تمویل کړي. هغه وویل: «باید ډاډ ترلاسه کړو، چې اوکراین هغه څه ته لاسرسی پيدا کوي چې د جګړې د دوام لپاره ورته اړتیا لري؛ نو په دې برخه کې د اتلانتیک دواړه غاړو ترمنځ پراخه هوکړه شته».
د بلوچستان ایالت د چمن ولسوالۍ مرستیال کمېشنر حبیب احمد بنګلزي په مشرۍ د یادې ولسوالۍ د پاکستاني پېژندپاڼو ارزونې کمیټې غونډه وشوه. په غونډه کې هغه ګڼ شمېر ځايي اوسېدونکي چې د افغان کډوالو شک پرې وو؛ د خپل پاکستاني تابعیت تاييد لپاره د کره اسنادو وړاندې کولو لپاره ورغوښتي وو.
په لغمان کې د طالبانو تر کنټرول لاندې د طبیعي پېښو پر وړاندې د مبارزې او چمتووالي رییس قاري خیرمحمد غازي خبر ورکړی، چې تېره شپه د دغه ولایت په دولت شاه ولسوالۍ کې د یوه کور چت پرېوتو له امله یو کس مړ او د ښځو په ګډون پنځه نور ټپیان شوي دي.
د طالبانو تر کنټرول لاندې د هواپوهنې ادارې خبر ورکړی، چې نن (د وري ۲۷مه) په ۲۱ ولایتونو کې د شړکنده باران، تالندې برېښنا، تېزو سېلیو او سېلابونو راوتو اټکل شوی دی.
د ځوانانو د تکواندو نړۍوال جام په ۱۵م پړاو کې د منفي ۶۸ کیلوګرام وزن په کټګورۍ کې د افغانستان ملي لوبغاړی عليرضا جامي به نن په شیاپچانګ کې سیالي وکړي.
د طالبانو د المپيک بدني روزنې او ورزش رياست وايي، د یوه خیریه بنسټ په مالي ملاتړ په کابل کې د بډمنټون د ۴ منتخبو لوبډلو تر منځ سیالۍ پیل شوې. د دغو سیالیو په پرانېسغونډه کې له طالب مسوولینو سربېره ځينو بهرنیو ډيپلوماټانو هم حضور درلود.
د طالبانو د المپیک، بدني روزنې او سپورټ رييس وايي، د جوجېتسو او پهلوانۍ څلور لوبغاړي د جوجېتسو اسیایي او ساحلي غېږ نیونې سیالیو کې د ګډون په موخه د چهار شنبې په ورځ (د وري ۲۶مه) چین ته لاړل.
د خوړو نړۍوال پروګرام د لوګر په مرکز له ۲۳۳۳ بېوزلو او مستحقو کورنیو سره د چهارشنبې په ورځ د نغدو پیسو د وېش بهیر پیل کړ. د لوګر ولایت لپاره د طالب مسوولینو په وینا، هرې کورنۍ ته ۲۹۰۰ افغانۍ په پام کې نیول شوې دي.
پاکستاني رسنیو د دغه هېواد د امنیتي سرچینو له قوله ویلي، چې د چهارشنبې په ورځ افغان طالبانو د هاوان یوه مرمۍ د پاکستان خاورې ته توغولې، چې له امله یې لږ تر لږه ۳ تنه وژل شوي او ۳ نور ټپیان دي.
باخبره سرچینو افغانستان انټرنشنل ته ویلي، چې د طالبانو استخباراتو په بدخشان ولایت کې د دې ډلې ۷غړي د داعش خراسان ډلې سره د همکارۍ په تور نیولي او د څېړنو لپاره یې کابل ته لېږدولي دي.
د پاکستان د بهرنیو چارو وزیر اسحاق ډار وايي، شهباز شریف د سعودي عربستان له ولیعهد محمد بن سلمان سره په کتنه کې د دوه اړخیزو همکاریو د زیاتولو پر لارو چارو خبرې کړي. نوموړي د دغې لیدنې په تړاو نور جزییات نهدي ورکړي.
د بښنې نړیوال سازمان او د «جنسیت، سولې او امنیت» شبکې په یوه ګډ راپور کې له برېتانیا غوښتي چې هغه سیاستونه ودروي چې له امله یې د افغان ښځو او نجونو د پناه غوښتنې ډیری قضیې رد کېږي.
افغانستان انټرنشنل ۳ ورځې مخکې د نورستان د ځينو قومي مشرانو په حواله راپور ورکړ، چې د کامدېش او برګمټال ولسوالیو د لارو بندېدو له امله ځايي خلک له قحطۍ سره مخ دي. نن د طالبانو تر واک لاندې د نورستان راډيو ټلویزیون یادو ولسوالیو ته د خوراکي توکو له لېږده خبر ورکړ.
د پاکستان په سند ایالت کې د جمعیت علمای اسلام ګوند عمومي منشي راشد محمود سومرو وايي، چې دغه ګوند د پاکستان اوسنی حکومت او پارلمان په رسمیت نهپېژني. هغه همداراز ادعا وکړه، چې د پولیسو په ځينو موټرو کې د وسلو او نشهيي توکو قاچاق روان دی.
د ملګرو ملتونو د نشهيي توکو او جرمونو پر وړاندې د مبارزې دفتر ویلي، چې د جاپان د نړیوالې همکارۍ ادارې(جیکا)په ملاتړ په افغانستان کې د کرنیزو حاصلاتو د ښهوالي لپاره مهم پرمختګونه شوي دي، چې له امله یې په کرنیزو حاصلاتو کې زیاتوالی راغلی.