د پاکستان د بهرنیو چارو وزارت ویاند طاهر اندرابي ویلي، چې د ارومچي خبرې پای ته رسېدلې دي او اسلام اباد ټینګار لري چې له کابل څخه د ترهګرۍ د مخنیوي په برخه کې «لیکلی او تایید وړ ډاډ» ترلاسه کړي.
د خیبر پښتونخوا د خیبر ولسوالۍ د تیرا بې ځایه شوې کورنۍ وایي، حکومت ورسره ژمنه کړې وه چې د اپریل له پنځلسمې نېټې به خپلو مېنو ته د ټولو بې ځایه شویو ستنېدنه پیل شي، خو د هغوی په وینا، تر اوسه د ستنېدو هېڅ نښه نه لیدل کېږي.
د ملګرو ملتونو د بشري چارو همغږۍ دفتر (اوچا) وایي، په افغانستان کې ویجاړوونکو سېلابونو له ۷۰ زرو څخه ډېر خلک اغېزمن کړي دي. د اوچا د راپور له مخې، درې زره کورنۍ یوازې په ننګرهار کې اغیزمنې شوې دي.
طالبان وایي سرحدي ځواکونو یې د هرات ولایت په اسلامکلا بندر کې ایران ته د ۲۵۰ زره امریکایي ډالرو د قاچاق هڅه شنډه کړې او په تړاو یې یو کس نیولی دی.
طالبانو ویلي، چې ازبکستان پلان لري په ننګرهار کې د ازبکـافغان دوستۍ په نوم پر ۲۰۰ جریبه ځمکه بڼ جوړ کړي. د ازبکستان د کرنې وزارت مرستیال ننګرهار ته سفر کړی او د بڼ لپاره یې ځمکه په نښه کړې ده.
د طالبانو تر واک لاندې له افغان شخصیتونو سره د اړیکو کمېسیون مشر شهاب الدین دلاور، د پارلمان له پخوانۍ غړې فوزیه کوفي، پخواني جهادي عبدالرب رسول سیاف، ، محمد محقق او عبدالرشید دوستم وغوښتل چې افغانستان ته ستانه شي.
له کندهار او دوبۍ نه دریو سرچینو افغانستان انټرنشنل ته ویلي، چې د طالبانو استخباراتو په کندهار کې ددې ډلې پخوانی جګپوړی غړی ملا معتصم اغا جان نیولی. د سرچینو په وینا، نوموړی د افغان او پاکستاني دیني عالمانو د یوه پلټفارم د جوړولو د هڅو له امله نیول شوی.
د افغانستان لپاره د پاکستان ځانګړي استازي محمد صادق د پنجشنبې په ورځ ویلي چې د افغانستان لپاره د اروپايي ټولنې ځانګړي استازي ګیلز برټرنډ سره په لیدنه کې یې د سیمې د سیاسي او امنیتي وضعیت، ترهګرۍ اړوند ګواښونو او سوداګرۍ په تړاو خبرې کړې دي.
د اوکراین پر پلازمېنه کیېف، اودیسا او دنیپرو ښارونو د روسیې په توغندیزو او ډرون بریدونو کې لږترلږه ۱۷ تنه وژل شوي او لسګونه نور ټپیان دي. د چارواکو په وینا، په وژل شویو کې یو ۱۲ کلن ماشوم هم شامل دی.
له میرویس روغتون وروسته د کندهار اوسېدونکي د عینومېنې دولتي روغتون له ټیټو خدماتو شکایت کوي. د ناروغانو خپلوان وايي، چې په روغتون کې مسلکي روغتیاپالان کم دي او درمل هم په خپل لګښت پېري.
د ازبکستان د سوداګرۍ او صنایعو خونې مشر داوران وهابوف ویلي، هېواد یې غواړي افغانستان ته دویم لاس یا زاړه موټر صادر کړي. هغه د افغانستان نفوس شاوخوا ۴۰ میلیونه ښودلی او ویلي یې دي چې د زړو موټرو کلنۍ تقاضا ۲۵۰ تر ۳۰۰ زره موټرو ته رسیږي.
په ایران کې د جګړې له پیلېدو وروسته په افغانستان کې هم د تېلو بیې لوړې شوې دي. سره له دې، چې له ایران څخه افغانستان ته د تېلو صادرات دوام لري، د کندهار اوسېدونکي وايي چې یوې ځانګړې کړۍ د تېلو بیې لوړې کړې دي.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو په تېره یوه اونۍ کې د افغانستان په بېلابېلو ولایتونو کې ۹ کوډګر نیولي دي. د یاد وزارت په خبرپاڼه کې راغلي، چې نیول شوي کوډګر عدلي او قضایي ارګانونو ته ور پېژندل شوي دي.
د نورستان د برګمټال او کامدېش یو شمېر قومي مشران او اوسېدونکي وايي، چې له پاکستان سره په سرحدي سیمو کې لاهم د طالبانو یو شمېر پخوانۍ پوستې تشې پرتې دي او ددې ډلې جنګیالي په کلیو او جوماتونو کې دیره دي. د قومي مشرانو په وینا، طالبانو د جګړې په لومړیو ورځو کې لس پوستې پرېیښې دي.
د طالبانو سترې محکمې خبر ورکړی، چې د کابل ولایت په شکر درې ولسوالۍ او د ننګرهار په دره نور ولسوالۍ کې یې له «کوره د تېښتې، زنا او اخلاقي فساد» په تور درې ښځې او دوه نارینه په عام محضر کې په دُرو وهلي دي.
د طالبانو د بهرنیو چارو وزیر امیرخان متقي په کابل کې یوې غونډې ته د وینا پرمهال ویلي، چې د طالبانو په اداري جوړښت کې بېلابېلې قومي ډلې شاملې دي او له همدې امله د دوی په اداره کې توازن رامنځته شوی دی.
په سمنګان کې د طالبانو د امنیې قوماندانۍ ویاند حشمتالله رحماني ویلي، چې په ایبک ښار کې یې د دوه مېلیونه افغانیو په ارزښت ۱۰۰ امنیتي کامرې لګولې دي. نوموړي زیاته کړې، چې د دغه اقدام موخه د احتماليامنیتي پېښو مخنیوی او ټولنیز خوندیتوب دی.
د طالبانو د ریس الوزرا اقتصادي مرستیال ملا عبدالغني برادر په فاریاب کې د یوه جومات او روغتیايي مرکز د جوړېدو په مراسمو کې وویل، چې «اوسنی نظام په تېرو ۵۰۰ کلونو کې بېمثاله دی». نوموړي له خلکو غوښتي، چې باید «شکر ادا او د نظام قدر» وکړي؛ کنه دا هر څه له لاسه ځي.
د افغان کډوالو له پراخو شکایتونو وروسته د خیبر پښتونخوا په خیبر ولسوالۍ کې پولیسو د افغان کډوالو لپاره د لنډي کوتل په لنډمهاله پنډغالي کې ستنېدونکو کډوالو ته د نوبت «ټوکن» ورکولو په بدل کې د بډې اخیستنې په تور درې کسان نیولي دي.
د افغانستان لپاره د روسیې د ولسمشر استازی ضمیر کابلوف وايي، چې د پاکستان او طالبانو ترمنځ کړکېچ په افغانستان کې د روسیې په مشارکت د سیمهییزو پروژو پلي کول ځنډوي. هغه وویل، چې د دوی ترمنځ له میاشتو راهیسې کړکېچ په سیمه کې نازک امنیتي وضعیت لا کمزوری کړی دی.
د چهارشنبې په ورځ (د وري ۲۶مه) د خیبر پښتونخوا ولسوالۍ بنو ټاون شپ ته اړوند داوړ کالوني جهنډوخېل سیمه کې ناپېژاندو وسلهوالو د ګوزڼ ضد واکسینو کمپاین پرمهال درې واکسیناتوران تښتولي دي.