د ملګرو ملتونو د بشري مرستو د همغږۍ دفتر (اوچا) په یوه راپور کې ویلي، په ۲۰۲۵کال کې په افغانستان کې د طبیعي پېښو ناورینونو له امله د بشري مرستو اړتیا زیاته شوې وه او شاوخوا ۲۲.۹ مېلیونه خلکو بشري مرستو ته اړتیا لرله.
په میدان وردګ کې د طالبانو رسنیز دفتر خبر ورکړی، چې د دغه ولایت د جغتو ولسوالۍ اړوند په دېوالک کلي کې د یوه دېوال نړېدو له امله یو ماشوم مړ او یو بل ټپي شوی دی. دا په داسې حال کې ده، چې څو ورځې وړاندې هم په جغتو ولسوالۍ کې سېلابونو او بارانونو شپږو کسانو ته مرګ ژوبله اړولې وه.
د ملګرو ملتونو د سرمنشي ویاند ویلي، چې انتونیو ګوترېش «په څرګنده توګه» د چهارشنبې په ورځ (د وري ۱۹مه) پر لبنان د اسراییل پراخ بریدونه وغندل. په اعلامیه کې راغلي، چې د ملګرو ملتونو سرمنشي په لبنان کې د ملکي تلفاتو د زیاتوالي له امله «ژوره اندېښنه» څرګنده کړې.
په تېرو ۲۴ ساعتونو کې د خیبر پښتونخوا او د پاکستان په پنجاب ایالت کې د سختو ورښتونو او تېزو بادونو له امله پنځه کسان مړه او ۲۶ نور ټپيان شوي دي. د پنجاب ایالت بهکر ولسوالۍ کې د کورنو چتونو پرېوتو په دوو جلا پېښو کې یو کس مړ او څلور نور ټپیان شوي دي.
د پنجشنبې په سهار (د وري ۲۰مه) د لبنان حزبالله ویلي، چې د اسراییل پر شمال یې توغندیز برید کړی دی. دا د امریکا او ایران ترمنځ د اوربند له هوکړې وروسته پر اسراییل د یادې ډلې لومړی برید دی.
افغان سوک وهونکې فرشته خاني یو ځل بیا وځلېده او د سرو زرو مډال یې وګاټه. هغې د پاکستان د سوک وهنې په ملي لوبو کې اتلولي خپله کړه. په دغه سیالۍ کې د سند، پنجاب او اسلاماباد په ګډون د پاکستان د بېلابېلو ښارونو ورزشکارانو پهکې برخه اخیستې وه.
د طالبانو او پاکستان تر منځ له تېر اختر وروسته اوربند پای ته رسېدلی او دواړو لوریو ترمنځ د نښتو دوام خلکو ته زیانونه اړولي دي. د چین په منځګړیتوب ارومچي کې خبرې وشوې، خو دواړو لورو یوازې خپلې غوښتنې مطرح کړې او کومه وروستۍ پرېکړه ونه شوه.
د طالبانو کورنیو چارو وزارت وايي، ۲۵ کسان یې په څلورو ولایتونو کې د بېلابېلو جنايي جرمونو په تړاو نیولي دي. یاد کسان پر غلا، درغلۍ، قتل او د نشهيي توکو پر کاروبار تورن دي.
د طالبانو د ۲۰۵ البدر قول اردو وايي، د کندهار د سپین بولدک له لارې یې پاکستان ته د درېیو ډرون کمرو، ۲ زره میلیونه ایراني تومان او ۱۶۹ کیلوګرامه سپینو زرو له قاچاق کېدو مخنیوی کړی دی. د یادې قول اردو په وینا، د دغو توکو د قاچاق په تړاو ۳ کسان هم نیول شوي دي.
د ماشومانو د خوندیتوب بنسټ خبرداری ورکړی، چې په افغانستان کې وروستیو پراخو سېلابونو د ماشومانو پر ژوند سخت اغېز کړی او د ماشومانو په ګډون څه باندې ۱۰۰کسانو خپل ژوند له لاسه ورکړی دی.
د طالبانو ستره محکمه وایي، چې په خوست ولایت کې یې یوه ښځه «له کوره د تېښتې» په تور په عام محضر کې په دُرو وهلې ده.
پخوانۍ سناتورې راحله دوستم د کابل پوهنتون د یوه ازبک محصل د ویډیو په خپرولو سره ویلي، د طالبانو د لوړو زدهکړو وزیر یاد محصل د ازبکي خولۍ په سر کولو له امله توهین کړی دی. یاد محصل هم په خپله ویډیو کې وايي، د همدې خولۍ په سر کولو له امله رټل شوی او ان په څپېړه هم وهلی شوی دی.
د روسیې د بهرنیو چارو وزارت ویاندې، ماریا زاخاروا، ویلي چې هغه اروپايي هېوادونه چې اوکرایني بېپیلوټه الوتکو ته یې د خپل هوايي حریم د کارولو اجازه ورکړې، د روسیې پر وړاندې په «ترهګریزو بریدونو» کې د جرم شریک بلل کېږي.
په هرات کې یو شمېر ښځې وايي، چې طالبانو په دې ښار کې پر مانتو اغوستونکو ښځو محدودیتونه زیات کړي او له عامه ټرانسپورټ څخه د هغوی د ګټې اخیستنې مخه نیسي. د سرچینو په وینا، طالبان د ښار په څو مهمو ځایونو په ځانګړې توګه د موټرو په اصلي تمځایونو کې د ښځو د څارنې لپاره حضور لري.
د طالبانو د امر بالمعروف او نهی عن المنکر وزارت اعلان کړی چې یوه ډله یې د خلکو د شخصي انځورونو او ویډیوګانو د ناوړه استفادې او باج اخیستنې په تور نیولې ده.
طالبانو د چهارشنبې په ورځ وویل، چې د فراه د شیخ ابونصر فراهي په بندر کې پراخه اورلګېدنه د ایران په همکارۍ کابو شوه. افغانستان انټرنشنل ته د سیمهییزو سرچینو له لوري په رالېږل شویو ویډیوګانو کې ښکاري چې په یاد بندر کې د اور لمبې او لوګي پورته کېږي.
الجزیزه وايي، د دغې شبکې یو خبریال په غزه کې د اسراییل په برید کې وژل شوی دی. دغې شبکې د یاد خبریال نوم محمد وشاح یاد کړی دی.
په پاکستان کې د جمعیت علمای اسلام د جمعې ورځې لاریون په اسلاماباد کې د امریکا او ایران تر منځ د سولې د پیلېدونکو خبرو له امله ځنډول شوې دي. دغه لاریون د پاکستان حکومت له لوري د نفتي موادو د بیو د لوړولو او همداراز د بهرني پالیسۍ پر وړاندې د غبرګون ښودنې په موخه پلان شوی وو.
په هرات کې یوه ځوان د ۵۰۰ زره افغانیو په پانګونې سره د «پیک کتاب» په نوم یو ګرځنده کتابتون جوړ کړی دی. دغه ځوان له دغې چارې موخه د کتاب لوستنې کلتور وده بولي. د دغه ولایت ډېریو فرهنګپالو د یاد ځوان دغه نوښت ستایلی دی.
د اسراییل او ایران تر منځ د دولس ورځنۍ جګړې او همدارنګه په دغه وروستۍ جګړه کې امریکا او اسراییل د ایران یو شمېر لوړپوړي نظامي او امنیتي چارواکي په نښه کړي او وژلي یې دي. د راپورونو له مخې د ایران د جمهوري دولت ۵۲ لوړ رتبه چارواکي په روانو جګړو کې وژل شوي دي.
د طالبانو د هوا پوهنې ادارې وايي، په راتلونکو ۲۴ ساعتونو کې د هېواد په یو شمېر ولایتونو کې د نسبي ډېرو بارانونو، توپانونو، قوي بادونو او ناڅاپي سېلابونو د رامنځته کېدو احتمال شته.