د پاکستان کورنیو چارو وزیر محسن نقوي د ناروې د بهرنیو چارو له وزیر اسپن بارت ایدې سره په لیدنه کې ادعا کړې چې د پاکستان پر ضد د ترهګریزو بریدونو لپاره د افغانستان خاوره کارول کېږي او د ترهګرۍ د له منځه وړلو لپاره یې د نړیوالو ګډو هڅو غوښتنه کړې ده.
د ښځو د عدالتغوښتنې نړیوالې شبکې د ۲۰۲۶ کال د اګست ۱۵مې په مناسبت، د طالبانو حکومت او د هغوی «ځپونکي او تبعیضي سیاستونه» رد کړي او په افغانستان کې یې د یوه مشروع، ټولشموله، ځوابویونکي او د بشري حقونو پر بنسټ د نظام غوښتنه کړې ده.
د پاکستان د بهرنيو چارو وزير اسحاق ډار په دې د خوښۍ څرګندونه کړې، چې افغانستان ته یې د ملګرو ملتونو له لوري د مرستو د لېږد زمينه برابره کړې ده. ویل کېږي اوس اوس پر بشري مرستو بار ۷۲۴ لارۍ د تورخم له لارې افغانستان ته اوښتي دي.
د افغانستان لپاره د پاکستان پخوانی سفیر منصور احمد خان په خپله تازه مقاله کې چې د طالبانو د واک ته رسېدو د ۵مې کلیزې په مناسبت یې لیکلې، د کابل او اسلاماباد اړیکې، افغانستان کې امنیتي وضعیت، د ډیورند کرښې هاخوا د بریدونو زیاتوالی او سیمه کې د اقتصادي همکاریو راتلونکی ارزولی دی.
د تېر جمهوري نظام د ولسي جرګې پخوانۍ غړې فوزيې کوفي له ملګرو ملتونو او غړو هېوادونو څخه غوښتي، چې پر طالبانو د فشار او ځواب ورکړې ته د اړ کولو لپاره له یوازې څرګندونو څخه عملي اقداماتو ته واوړي.
د صلاحالدین رباني په مشرۍ د جمعیت اسلامي ګوند د طالبانو واک ته د بېرته رسېدو د پنځمې کلیزې په مناسبت یوه اعلامیه کې د دې ډلې پر کړنو سختې نیوکې کړي او ویلي یې دي، چې د ۲۰۲۱ کال د اګست د ۱۵مې پېښو افغانستان د «خطرناک زوال» یوې نوې مرحلې ته داخل کړی دی.
تحریک طالبان پاکستان (ټيټيپي) د پاکستان د ازادۍ په ورځ (د اګست ۱۴مه) په خیبرپښتونخوا، کوېټه او سویلي پنجاب کې پر امنيتي ځواکونو او د دوی پر پوستو د ۷۴ بريدونو او پهکې یې د ۱۹ امنیتي سرتېرو او د امن کمېټې د دوو غړو د وژلو په ګډون د ګڼو نورو د ټپي کولو ادعاوې کړې دي.
د طالبانو ویاند ذبیحالله مجاهد په یوه تازه ویډیویي پېغام کې د زمري ۲۴مه د طالبانو بریا او د دوی په اصطلاح د «فتحې ورځ» وبلله. هغه ویلي، چې د دوی غړو د بهرنیو ځواکونو د اېستلو لپاره قربانۍ ورکړي او افغانان باید «منندوی» واوسي او له دوی سره ودرېږي.
د ناروې د کډوالو شورا (NRC) عمومي منشي یان اېګلنډ خبرداری ورکړی، چې افغانستان له یوه ژور بشري، اقتصادي او اقليمي ناورین سره مخ دی او د ناټو غړو هېوادونو له افغان ولس سره د ملاتړ په برخه کې خپلې مهمې او اخلاقي ژمنې هېرې کړې دي.
د امریکا ولسمشر ډونالډ ټرمپ د جمعې په ورځ (د زمري ۲۳مه) د نیویارک په ناساو کانټي کې په خپله وینا کې وویل: «په نږدې وخت کې به د هرمز تنګی د امریکا خاوره [برخه] اعلان کړم». د ایران د پارلمان یوه ویاند وليالله بیاتي بیا ویلي، امریکايي چارواکې په دې وروستیو کې یوازې «تشې» خبرې کوي.
د کاناډا بهرنیو چارو وزارت د جمعې په ورځ (د زمري ۲۳مه) اعلان وکړ، چې د ایران د سپاه پاسداران په ګډون د دغه هېواد ۵ لوړپوړي چارواکي په هرمز تنګي او د هغې په شاوخوا کې د بېړۍ چلونې د حقونو په اخلالولو کې د دوی د رول له امله تحریم شوي دي.
د پاکستان ولسمشر اصف علي زرداري او لومړي وزیر شهباز شریف په دغه هېواد کې په بشپړ ډول د «ترهګرۍ» د ناورین پر لهمنځه وړلو ټینګار کړی دی. دغه ټینګار په داسې حال کې دی، چې په دې وروستیو کې په خیبرپښتونخوا او بلوچستان کې د نا امنیو لمن ډېره پراخه شوې ده.
د تېر جمهوري نظام د کورنیو چارو پخواني وزیر علياحمد جلالي د افغانستان اوسنی وضعیت کړکېچن بللی او د هغه په خبره، هغه رژیمونه چې د ځان د بقا لپاره وحشت خپروي، هېڅکله دوام نهشي کولای. هغه زیاتوي، چې طالبان په ۲۱مه پېړۍ کې ژوند کوي، خو چلند یې د ۷مې پېړۍ له زمانې سره ورته دی.
د خيبرپښتونخوا په سویلي ټانک ولسوالۍ کې د ناپېژانده وسلهوالو په بريد کې د امن کمېټې دوه غړي چې سره وروڼه هم وو، له یوه بل لاروی سره یو ځای وژل شوي دي. بریدګر له پېښې وروسته په تېښته بریالي شوي دي.
د ملګرو ملتونو ۵۶ غړو هېوادونو په یوې ګډې اعلامیې کې د افغانستان د خلکو په ځانګړې توګه د ښځو او نجونو پر وړاندې د طالبانو د تبعیضي فرمانونو او پالیسیو د سمدستي لغوه کېدو غوښتنه وکړه. هغوی د ښځو او نجونو د زده کړو د حق پر بیا احیا او په ټولنه کې یې پر معنالرونکې ګډون ټینګار وکړ.
د افغانستان، پاکستان او منځني ختیځ په چارو کې د بریتانیا د دولت وزیر سټېفن ډاوتي د طالبانو له لوري د افغان ښځو او نجونو پر زدهکړو او ټولنیز ژوند کې د هغوی پر ګډون لګېدلي «سخت» بندیزونه د نهمنلو وړ بللي دي. هغه وايي، بریتانیا به د افغان ښځو د بنسټیزو ازادیو دفاع ته دوام ورکړي.
په ملګرو ملتونو کې د افغانستان د استازولۍ سرپرست نصیر احمد فایق ويلي، د طالبانو د واکمنۍ د پنځم کال د پوره کېدو په درشل کې د اروپايي ټولنې په ګډون ۵۶ هېوادونو له افغانانو سره خپل پیوستون څرګند کړی او دغو هېوادونو ويلي، چې افغانستان باید د نړیوالې ټولنې د اجنډا په سر کې پاتې شي.
د افغانستان لپاره د بریتانیا ځانګړي استازي ریچارډ لېنډسي د طالبانو د ۵ کلنې واکمنۍ پر مهال د افغان ښځو او نجونو مقاومت ته په اشارې سره وویل، چې دا زغم او استقامت باید د هغوی د اساسي حقونو ځای ونهنیسي. هغه ټینګار وکړ، چې افغانستان د ښځو له ګډون پرته بشپړ پرمختګ ته نهشي رسېدلی.
د طالبانو د کورنیو چارو وزیر سراجالدین حقاني وایي، دوی کابل ته «فاتحانه» راننوتي او په وینا یې، دوحه کې له امریکا سره تړون د «اشغالګرو ځواکونو» لپاره د «اوړو پوزه» وه. هغه دا څرګندونې د زمري ۲۴مه د خپلې ډلې د بیا ځلي واکمنۍ د ۵مې کلیزې په مناسبت په یوه ویډیويي پېغام کې کړې دي.
د پاکستان د بلوچستان د کورنيو چارو وزير ضیا لانګو په مستونګ سيمه کې له یوه وسلهوال بریده روغ رمټ وتلی، خو په یاد برید کې د درېیو پولیسو په ګډون شپږ کسان ټپیان شوي دي. د دغه برید مسوولیت تر اوسه هېڅ یوې ډلې نهدی منلی.
د طالبانو دفاع وزیر محمد یعقوب مجاهد ویلي، چې دوی به په کور دننه او بهر کې هېڅ چا ته اجازه ورنهکړي چې امنیتي وضعیت خراب کړي. هغه دا څرګندونې د زمري ۲۴مې د جمهوري نظام د ړنګېدو او د طالبي امارت د بیا واکمنېدو د پنځمې کلیزې په مناسبت په یوه ویډيويي پیغام کې کړې دي.