د افغان ښځو د عدالت او ازادۍ غورځنګ وایي، له څلورو کلونو راهیسې، د طالبانو له لوري د نجونو له زدهکړو محرومیت دوام لري، چې دا د دوی په وینا، د بشري حقونو ښکاره سرغړونه او د یو بشپړ نسل راتلونکي ته ګواښ دی.
د امریکا د بهرنیو چارو وزیر مارکو روبیو د شنبې په ورځ وویل، چې د دغه هېواد د کډوالۍ ادارې حمیده سلیماني افشار او د هغې لور چې د سپاه پاسداران د قدس څانګې د وژل شوي قومندان قاسم سلیماني خپلوانې دي، نیولې دي.
د ملګرو ملتونو د روغتیا نړیوال سازمان (ډبلیواېچاو) خبرداری ورکړی، چې په انټرنېټ کې ښځې او نجونې له ځورونو او ګواښونو سره مخ دي. دغه سازمان خلکو ته سپارښتنه کړې، چې د قربانیانو ملاتړ وکړي.
په بلخ کې د معلولینو ترمنځ د بسکېټبال دوستانه سیالۍ، چې د طالبانو د بدني روزنې او سپورټ ادارې له لوري تنظیم شوې وې، پای ته ورسېدې.
د ښځو او بشري حقونو د ملاتړ او ودې بنسټ خبرداری ورکړی، چې په ګاونډیو هېوادونو کې د افغان کډوالو وضعیت ورځ تر بلې خرابېږي او زرګونه کسان له جدي امنیتي او بشري ګواښونو سره مخ دي.
د افغان مدني ټولنې راپور ښيي، چې د پاکستان د بریدونو او د طالبانو د غفلت له امله لږ تر لږه ۲۸۹ ملکیان وژل شوي یا ټپیان شوي او شاوخوا ۴۰ زره خلک بې ځایه شوي. دغې ټولنې له امنیت شورا غوښتي چې د دغې جګړې د پایته رسولو لپاره بېړنی اقدام وکړي.
په داسې حال کې چې په منځني ختیځ کې د روانو جګړو له امله د هُرمز تنګي له لارې د تېلو عرضه ګډوډه شوې، د هند د نفت وزارت د شنبې په ورځ (د وري ۱۵مه) وویل، چې د دغه هېواد د نفتي موادو چاڼځایونو ایراني تېل پېرلي دي.په دې سره هند له اوو کلونو وروسته له ایران څخه تېل وپېرل.
په پاکستان کې مېشت یو شمېر افغان کډوال وايي، چې په افغانستان کې د کار او روزګار نشتوالي دې ته اړ کړي، چې بیا ځلي پاکستان ته، په ځانګړي ډول کراچۍ ښار ته د مزدورۍ لپاره لاړ شي، خو په دغه ښار کې هم له ګڼو ستونزو، فشارونو او د پولیسو له خوا د نیول کېدو له ګواښ سره مخ دي.
د پاکستان بهرنیو چارو وزارت وایي، د دغه هیواد بهرنیو چارو وزیر محمد اسحاق ډار د ایران له بهرنیو چارو وزیر عباس عراقچي سره د سیمې د روان وضعیت په اړه په خبرو کې پر دې یې ټینګار کړی، چې ستونزې باید د خبرو او ډیپلوماټیکو لارو حل شي.
د پاکستان د پارلمان پخواني مشر اسد قیصر د پاکستان او طالبانو ترمنځ د خبرو د بیا پیل په تړاو د چین له هڅو ستاینه کړې ده. هغه ویلي، په روان نړیوال او سیمهییز حساس وضعیت کې، یوازې د صبر، رغنده همکارۍ او پراخې ډیپلوماسۍ له لارې شونې ده، چې سیمه کې باور او همکاري بېرته وغوړېږي.
د ملګرو ملتونو د ماشومانو ادارې (یونېسف) استازی تاجالدین اویوال وایي، له پاکستان څخه افغانستان ته د ماشومانو او کورنیو راستنېدو په بهیر کې د یونېسف ټیمونه فعال دي، څو معلومات او ملاتړ وړاندې کړي او د ټولو راستنو شویو ماشومانو خوندیتوب او غوره ګټې خوندي شي.
د طالبانو د کډوالو ستونزو ته د رسېدنې کمېسیون وايي، نن شنبه (د وري ۱۵مه) هم لږ تر لږه ۲۸۴ افغان کورنۍ او تر ۲۲۰۰ زیات کسان له ګاونډیو هېوادونو او په ځانګړې توګه له پاکستان او ایران څخه په جبري ډول افغانستان ته راستانه کړل شوي دي.
د طالبانو د ویاند مرستیال حمدالله فطرت وایي، ټاکل شوې چې سبا (یکشنبه د وري ۱۶مه) په کابل کې د «افغانستان او منځنۍ اسیا د مشورتي خبرو اترو» غونډه ترسره شي. د نوموړي په وینا، په دې غونډه کې به پر سیاسي، اقتصادي او امنیتي مسایلو خبرې وشي.
د افغان کرېکټ ستوري محمد نبي په هېواد کې له وروستیو سېلابځپلو سره د خپلې خواخوږۍ له شریکولو سربېره ویلي، د «ادې ګروپ» روغتیايي مرکزونه په وړیا توګه د سېلابځپلو ټپیانو درملنه کوي.
طالبانو ویلي، چې د کانونو او پټرولیم وزارت ۱۸ مسلکي کارکوونکي یې د وړتیاوو لوړونې او جیوفزیکي زدهکړو لپاره ازبکستان ته واستول.
روسي رسنیو راپور ورکړی چې د روسیې دولتي اټومي شرکت «روس اټوم» د شنبې په ورځ د ایران له بوشهر اټومي بټۍ څخه خپل ۱۹۸ نور کارکوونکي وایستل. د روسي کارکوونکو د ایستلو دا لړۍ پر ایران د امریکا او اسراییل له بریدونو وروسته پیل شوې ده.
د امریکا د بهرنیو چارو وزیر ویلي، چې د دغه هېواد د کډوالۍ ادارې چارواکو د قاسم سلیماني ورېره حمیده سلیماني افشار له خپلې لور سره یوځای نیولې ده. روبیو ویلي، چې د سلیماني ورېرې او د هغې د لور ګرین کارتونه لغوه شوي او دواړې د کډوالۍ ادارې له لوري بندي شوي دي.
د اوکراین ولسمشر ولادیمیر زېلېنسکي د ترکیې له ولسمشر رجب طیب اردوغان سره د امنیتي مسایلو په اړه د خبرو اترو په موخه استانبول ته رسېدلی دی. زېلېنکسي ویلي چې په دغه لېدنه کې به پر سیمهییز ثبات او له منځني ختیځ سره د امنیتي همکاریو پر پراختیا خبرې وشي.
د طالبانو د امر بالمعروف وزیر خالد حنفي ویلي، چې ځوانان باید د عصري علومو او ټکنالوجۍ زدهکړې ته وهڅول شي او په دې برخه کې دې اړین فرصتونه برابر شي. نوموړي وړاندې عصري زده کړې «مباح» ګڼلې وې.
په کونړ ولایت کې ډیورنډ کرښې ته د نږدې پرتو سیمو اوسېدونکي وايي، چې د پاکستاني ځواکونو هاوان بریدونو له امله یې خپل کورونه پرېښي او د ځان ژغورنې لپاره اسعداباد ته بېځایه شوي دي.
د طالبانو د ټولګټو وزارت وايي، چې د تېرو څو ورځو سختو بارانونو، سېلابونو او غره ښویېدنې له امله په بېلابېلو ولایتونو کې یو شمېر لویې لارې د ترافیکو پر مخ تړل شوې دي. د دغه وزارت په وینا، د کابل–جلالاباد لویه لاره هم د "تنګي غارو" په سیمه کې د غره د راپرېوتو له امله بنده ده.