د طالبانو تر واک لاندې ملي ټلوېزیون راپور ورکړی، چې د فراه په فراه رود ولسوالۍ کې د یوه کور دېوال نړېدو له امله یو ماشوم مړ او یو بل ټپي شوی دی. له بل پلوه په فراه ولایت کې د وروستیو سېلابونو له کبله تر ۴۰۰ ډېر کورونه ویجاړ شوي دي.
د طالبانو ویاند ذبیحالله مجاهد د یادې ډلې تر واک لاندې د افغاني سرې میاشتې ټولنې له قوله د شنبې په ورځ (د وري ۱۵مه) خبر ورکړی، چې د افغانستان په بېلابېلو ولایتونو کې د وروستیو ورښتونو او سېلابونو له امله ۶۱ کسان مړه او ۱۱۶ نور ټپیان شوي دي.
په کابل کې د «افغان معیار» په نوم د هګیو یو خصوصي فارم د ورځې شاوخوا ۲۰۰زره هګۍ تولیدوي، چې د افغانستان د هګیو بازار نږدې ۱۰ سلنه اړتیا پوره کولای شي. د یاد فارم مشر احمدتمیم جلالزی وایي، چې دوی هڅه کوي په راتلونکو څو میاشتو کې دغه شمېره له ۱۰ تر ۲۵سلنې پورې لوړه کړي.
د ټېلګراف ورځپاڼې تازه څېړنې ښيي، چې له چین نه ایران ته د توغندیو د جامدو سون توکو (سوډیم پرکلورایټ) پنځه سترې بار وړونکې بېړۍ لېږدول شوې دي. دغه بېړۍ چې تر بندیزونو لاندې هم دي، د جګړې له پیل راهیسې د دغه هېواد د بندرونو پر لور روانې شوې دي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ (د وري ۱۴مه) ۵۳۳ کډوالې کورنۍ چې ټولټال ۳زره او ۹۰۵ کسان کېږي؛ له ایران او پاکستان نه افغانستان ته ستنې شوې دي.
د ملګرو ملتونو د ماشومانو ملاتړ صندوق (یونېسف) خبرداری ورکړی، چې په افغانستان کې خلک له پراخو بشري ناورینونو سره مخ دي او دغه بنسټ په ۲۰۲۶کال کې د ۱۲ مېلیونه کسانو لپاره چې ۶.۵ مېلیونه یې ماشومان دي؛ د اړتیاوو پوره کولو لپاره ۹۵۰ مېلیون ډالرو بشري بودجې ته اړتیا لري.
د جمعې په ماښام او د شنبې په سهار د سعودي عربستان په ختیځو ولایتونو او بحرین کې د خطر زنګونه وکړنګېدل. د بحرین د کورنیو چارو وزارت اعلان کړی، چې د دغه هېواد په سیترا سیمه کې د یوې ایرانۍ بېپیلوټه الوتکې د پاتې شونې له امله ۴کسان ټپیان شوي او څو کورونو ته زیان رسېدلی دی.
د پاکستان په بلوچستان ایالت کې د تېرو څو ورځو پرلهپسې سختو بارانونو او سېلابونو له امله ۹ کسان مړه او لسګونه نور ټپیان شوي دي. د بلوچستان د ناورینونو مدیریت ادارې په وینا؛ د دغه سېلابونو له امله سلګونه کورنۍ بېځایه شوې هم دي.
د ماشومانو ژغورنې اداره وایي، په افغانستان کې د ماینونو او ناچاوده توکو د چاودنو ۷۰ سلنه قربانیان ماشومان دي. یادې ادارې د جمعې په ورځ (د وري ۱۴مه) د یوې خبرپاڼې په خپرولو سره ویلي، د ۲۰۲۵ او ۲۰۲۶ کلونو ترمنځ ۳۳۸ افغان ماشومانو ته د جګړې د پاتې شونو له امله مرګژوبله اوښتې ده.
د بېځایه شویو نړۍوال سازمان په یوه اعلامیه کې ویلي، د پاکستان له لوري د افغان کډوالو د جبري ستنولو روانه لړۍ زیان منونکي کسان بېرته هغه هېواد ته ستنوي چې له ناامنۍ، فشار او اقتصادي ستونزو ډک دی. یاد سازمان له پاکستان نه د افغان کډوالو د جبري اېستلو لړۍ درولو غوښتنه کړې ده.
د امریکا د ملي امنیت پخواني سلاکار جان بولټن خبرداری ورکړی، که د ایران اوسنی حکومت په واک کې پاتې شي؛ نو د دغه هېواد اټومي پروګرام به بېرته راژوندی شي. هغه وایي، که چېرې اسلامي جمهوري نظام په واک کې پاتې شي؛ نو خپل اټومي پروګرام به له سره ورغوي.
د افغانستان د ۱۷کلنو فوټبال ملي لوبډله د اسیا جام اتلولۍ سیالیو کې د ګډون په موخه د ازبکستان پلازمېنې تاشکند ته ولاړه. ټاکل شوې، چې دغه سیالۍ د افغانستان، قرغزستان، ازبکستان، تاجکستان او ترکمنستان لوبډلو ترمنځ ترسره شي.
په خوست کې د طالبانو رسنیز دفتر خبر ورکړی، چې په دغه ولایت کې له څو ورځو راهیسې پرلهپسې ورښتونو خلکو ته درانه مالي زیانونه اړولي دي. د یاد دفتر په خبرپاڼه کې راغلي، چې په دغه ولایت کې د بارانونو او ږلۍ له امله ۶۳ کورونه زیانمن شوي او دوه ښځې ټپيانې شوې دي.
د ترکیې ولسمشر رجب طیب اردوغان له خپل روسي سیال ولادیمیر پوتین سره د ټلیفون پر کرښه په خبرو کې ویلي، انقره پر ایران د امریکا او اسراییل د بریدونو او یا هم د ایران د ګاونډیو هېوادونو پر وړاندې د تهران د غچ اخیستونکو بریدونو ملاتړ نهکوي.
د ترکیې د کورنیو چارو وزارت اعلان کړی، چې د روان زېږدیز کال له پیل راهیسې د دغه هېواد په بېلابېلو سیمو کې د ۹زرو افغانانو په ګډون له ۳۰زرو ډېر بېاسناده کډوال نیول شوي دي. د شمېرو لهمخې؛ له ۲۰۲۱کال راهیسې په دغه هېواد کې د نیول شویو افغان کډوالو شمېر له ۳۷۰زرو اوړي.
طالبانو په تېره یوه اوونۍ کې په بېلابېلو ولایتونو کې د ښځو په ګډون ۶۰ کسان په دُرو وهلي دي. د طالبانو سترې محکمې د جلا-جلا خبرپاڼو په خپرولو سره ویلي، چې دغه کسان یې په غور، نیمروز، بلخ، ننګرهار، پکتیکا، سمنګان، فاریاب، دایکنډي، جوزجان، هرات او کابل ولایتونو کې په دُرو وهلي دي.
رویټرز خبري اژانس لیکلې، چې د ایټالیا مرکزي بانک په خپل تازه راپور کې ویلي، چې د دغه هېواد اقتصادي وده به سږ کال ۰،۶ سلنه او په ۲۰۲۷ کال کې ۰،۵ سلنه وي، چې دا د پخوانیو اټکلونو پرتله کموالی ښيي.
امریکا کې د طبیعت ساتنې نړیوالې علمي ادارې څېړونکو موندلې چې د نړۍ درېیمه برخه خلک په هغو سیمو کې ژوند کوي، چې سخته ګرمي یې ورځني فعالیتونه په جدي ډول محدودوي. دغه څېړنه خبرداری ورکوي، چې د تودوخې زیاتوالی به د اوړي په موسم کې د ورځنیو چارو ترسره کول لا نور ستونزمن کړي.
د پاکستان حکومت پرېکړه کړې، چې د روانې میاشتې تر پایه به متحده عربي امارات ته ۳،۵ میلیارده ډالره پور بېرته ورکړي. یوه لوړپوړي چارواکي ویلي، دا پرېکړه د «ملي وقار» د ساتلو لپاره شوې، خو ورسره به د هېواد په مالي زیرمو کې د پام وړ کمښت هم راشي.
د افغانستان مسلکي سوک وهونکی محمد ذکریا زماني د هېواد د سوک وهنې فدراسیون په مشرتابه کې د بدلون غوښتنه کړې او د دې فدراسیون د سرپرست قدیر سلطاني د لرې کېدو غوښتونکی شوی دی.
د پاکستان حکومت تېره ورځ د پټرول بیه لوړه کړه، خو نن یې په هر لیټر کې ۸۰ روپۍ کمښت راوست او ورسره بیه یې له ۴۵۸ روپیو څخه ۳۷۸ روپیو ته راورسوله. د پاکستان لومړي وزیر شهباز شریف د دې اقدام هدف پر خلکو د اقتصادي فشار کمول او د عادي ژوند د لګښتونو اسانه کول بللي دي.