په داسې حال کې چې د طالبانو او پاکستان ترمنځ د چين په ارومچي ښار کې مذاکرات روان دي، سيمهييزو سرچينو خبر ورکړی چې د خوست ولايت د ګربزو ولسوالۍ اړوند په غلام خان سیمه کې د طالبانو او پاکستاني سرحدي ځواکونو ترمنځ تازه نښته رامنځته شوې ده.
د طالبانو او پاکستان ترمنځ اړیکې، چې په وروستیو کې د خونړیو بریدونو، سرحدي نښتو او سیاسي تورونو له امله سختې ترینګلې شوې وې، یو ځل بیا د خبرو مېز ته راګرځېدلې دي؛ مګر ښکاري چې دا مذاکرات به عملي نتیجه ونه لري.
سرچینې وايي، طالبانو پر کونړ د پاکستان له بریدونو وروسته نن ماښام انتقامي بریدونه پیل کړي دي. طالبان وايي، په تېرو ۲۴ ساعتونو کې د کونړ پر سرکاڼو او مرورې ولسوالیو په بریدونو کې دوه کسان وژل شوي او ۱۰ نور ټپیان شوي دي.
د طالبانو مرستیال ویاند حمدالله فطرت ویلي، چې پاکستاني ډرون الوتکو یو ځل بیا د خوست او پکتیکا ولایتونو پر یو شمېر سیمو هوایي بریدونه کړي دي. د هغه په وینا، د دې بریدونو له امله د پکتیکا په شکین کې ۳ ملکي وګړي او د خوست په ځاځي میدان کې ۲کسان ټپیان شوي دي.
د طالبانو د ویاند مرستیال حمدالله فطرت وایي، چې د پاکستان پوځ په تېرو دوو ورځو کې د کونړ، پکتیکا او خوست ولایتونو پر بېلابېلو سیمو د هاوان، توپچي او د ډرون بریدونه کړي. هغه ویلي، د دغو بریدونو په پایله کې ۲۵ تنه ملکیان، چې ډېری یې ماشومان دي، ټپیان شوي او دوه تنه وژل شوي دي.
د طالبانو د صنعت او سوداګرۍ وزیر نورالدین عزیزي وايي چې په تېر لمریز کال کې د هېواد په بېلابېلو صنعتي سیمو کې نږدې ۵۰۰ شرکتونو ته څه باندې ۲۵۰۰ جریبه ځمکه وېشل شوې ده. هغه وویل چې ۱۵۰۰ نورو شرکتونو ته هم ځمکې وېشل کیږي.
د ازبکستان د بهرنیو چارو وزیر بختیار سعیدوف د پاکستان د بهرنیو چارو وزیر اسحاق ډار سره د طالبانو او پاکستان ترمنځ شخړې په اړه ټیلیفوني خبرې کړې دي او له ډیپلوماټیکو لارو یې د ستونزو پر حل ټینګار کړی دی.
د متحده عربي اماراتو د بهرنیو چارو وزارت په افغانستان کې د وروستیو ورښتونو او سېلابونو له قربانیانو سره خپله خواخوږي څرګده کړې ده. طالبانو ویلي، چې په تېره یوه اونۍ کې د ورښتونو او سېلابونو له امله ۵۶ کسان مړه او ۸۹ نور ټپیان شوي دي.
د ارجنټاین حکومت د ایران شارژدافیر محسن تهراني «نامطلوب کس» اعلان کړ او په ۴۸ ساعتونو کې یې د وتلو امر ورته کړی. د ارجنټاین د بهرنیو چارو وزارت ویلي چې تهراني د ارجنټاین ولسمشر او د بهرنیو چارو وزیر تورن کړي، چې ګواکې پر ایران په پوځي بریدونو کې ښکېل دي.
طالبانو اعلان وکړ، چې د هبتالله په لارښوونه یې د بیړنیو حالاتو کمېټه جوړه کړې او دغه کمېټه به د واورې ورېدو، بارانونو او نورو طبیعي پېښو پرمهال د خلکو د ژغورنې په برخه کې بېړنی اقدام کوي. نوې کمېټه داسې مهال جوړیږي، چې د ج د اضطرار کمېټې فعالیت درلود.
د طالبانو مخالفې وسله والې ډلې د افغانستان ازادۍ جبهې ویلي، چې د چارشنبې پر ماښام یې د کابل ښار د ۱۱ مې حوزې په سرای شمالي سیمه کې د طالبانو د تلاشۍ پر یوه پوسته برید کړی او درې طالبان یې وژلي او دوه نور یې ټپیان کړي دي.
د افغانستان د بشري حقونو په برخه کې د ملګرو ملتونو ځانګړي راپور ورکوونکي ریچارډ بېنېټ د ماینونو له امله د ملکي وګړو په ځانګړې توګه د ماشومانو د زیاتي مرګژوبلې په اړه اندېښه ښودلې او په دې برخه کې یې د افغانستان لپاره د بېړنۍ بودجي غوښتنه کړې ده.
د فرانسې ولسمشر ایمانویل مکرون د پنجشنبې په ورځ وویل چې د زور له لارې د هرمز تنګي پرانېستل واقعي نه دي. مکرون رسنیو ته ویلي، چې دوی د پوځي انتخاب ملاتړ نه دی کړی او څوک چې له تنګي تېریږي د ایران د سپاه پاسداران د بالستیک توغندیو له ګواښ سره مخامخ وي.
د پاکستان لومړي وزیر شهباز شریف ویلي، چې هېواد یې په سیمه کې د جګړې د پای ته رسولو لپاره خپلې هڅې روانې ساتلې دي، خو په سیمه کې روانو شخړو د اسلام اباد پر اقتصادي وضعیت منفي اغېز کړی دی.
طالبانو داسې مهال ډنیس کوییل خوشې کړ، چې د امریکا متحده ایالاتو سیاسي، رسنیز او ډیپلوماټیک فشارونه په څرګند ډول زیات شوي وو. واشنګټن دا اقدام «د سمې لار پر لور یو ګام» وباله، خو په ورته وخت کې یې ټینګار وکړ چې دا بدلون هېڅکله هم د کړکېچ د پای معنا نه لري.
د طالبانو د بهرنیو چارو وزارت ویلي، چې د چین په غوښتنه له پاکستان سره د متقابل درناوي او رغنده تعامل پر بنسټ خبرې کوي. یاد وزارت ویلي، چې د ارومچي په ناستو کې د متوازن او اصولي دریځ لهمخې ګډون کوي او له پاکستان سره به هر اړخیزې مسوولانه خبرې اترې وکړي.
د دوبۍ په زاړه ښاردوبۍ کریک کې ځینې افغان سوداګر وایي چې د ایران د توغندیو او ډرون بریدونو له امله د دوی سوداګري او ژوند له خطر سره مخ شوي دي. ۳۴ کلن افغان سوداګر محمد انور وویل: «جګړه باید ودریږي چې موږ خپله سوداګري وکړو».
د طالبانو د پېښو پر وړاندې د مبارزې ادارې ویلي، چې په تېرو ۲۴ ساعتونو کې په ۱۹ ولایتونو کې د سختو بارانونو او سیلابونو په پایله کې ۳ کسان مړه شوي او ۱۶ نور ټپیان دي.
د چین د بهرنیو چارو وزارت وايي، چې بیجنګ د تاوتریخوالي کمولو او د کابل او اسلام اباد ترمنځ د ستونزو د سوله ییز حل په موخه په فعاله توګه د افغانستان او پاکستان ترمنځ د منځګړيتوب هڅې کوي. د چین ارومچي ښار دمګړۍ د دواړو اړخونو د خبرو کوربه توب کوي.
د طالبانو د اقتصاد وزیر ویلي، چې د پاکستان د وروستیو بریدونو له امله په نهو ولایتونو کې څه باندې ۲۷ زره کورنۍ بېځایه شوې او دمګړۍ بېړنیو مرستو ته اړتیا لري. دین محمد حنیف پر ملګرو ملتونو او کورنیو او بهرنیو موسسو غږ کړی چې له بېځایه شویو کورنیو سره بېړنۍ مرستې وکړي.
د خیبر پښتونخوا د ناورينونو مدیریت ادارې په دغه ایالت کې د ورښتونو له امله د رامنځته شوي ځاني او مالي زیانونو راپور خپور کړی. په راپور کې راغلي، چې د دغه ایالت په بېلابېلو ولسوالیو کې د سختو ورښتونو له امله ۲۵ کسان مړه او ۷۷ نور ټپیان شوي دي.