د پېښور عالي محکمې له پاکستان نه د یوې افغان مېرمنې چې څو کاله وړاندې یې له یوه پاکستاني وګړي سره واده کړی و، د اېستلو مخه نیولې ده. محکمې حکم کړی، چې د پاکستان د تابعیت ملي اداره (نادرا) باید په شپږو میاشتو کې د نوموړې د پاکستاني تابعیت ټولې چارې بشپړې کړي.
په کندوز کې د طالبانو د کډوالو او بېرته راستنېدونکو چارو ریاست خبر ورکړی، چې د روان کال له پیل راهیسې تراوسه نږدې ۱۶زره کډوالې کورنۍ له ایران او پاکستان نه دغه ولایت ته ستنې شوې دي.
د طالبانو د واکمنۍ پنځمې کلیزې په درشل کې د یادې ډلې د ارشاد، حج او اوقافو ریاست دا ځل په کندهار کې یوې غونډه کې له دیني عالمانو غوښتنه کړې، چې د جمعې په خطبو کې د طالبي نظام په ملاتړ پیغامونه ورکړي.
د ازبکستان او قزاقستان سوداګرو د تاشکند په یوې سوداګریزه غونډه کې هوکړه کړې، چې خپل توکي به په ګډه د درېیمو هېوادونو بازارونو او په ځانګړي ډول افغانستان، سوریې او عراق ته صادر کړي.
په هلمند کې د طالبانو د اطلاعاتو او فرهنګ ریاست په یوه خبرپاڼه کې ویلي، چې د طالبانو ځواکونو په تېرو پنځو میاشتو کې د عملیاتو پرمهال ۹۱ بېلابېلې وسلې او ګڼ شمېر مهمات نیولي دي. خبرپاڼه زیاتوي، چې په دې تړاو یې ۳۰ کسان هم نیولي چې اړوندو قضايي ادارو ته ور پېژندل شوي دي.
په امریکا کې د وسلو د مهمو زېرمو د کمښت سره هممهاله وال سټریټ ژورنال راپور ورکړی، د امریکا نوې استخباراتي ارزونې ښيي چې د روسیې ولسمشر ولادیمیر پوتین ښايي په راتلونکو څو کلونو کې د ناټو پر یوه غړي هېواد محدود اقدام وکړي؛ څو د یادې ټلوالې عزم وازمويي.
د پاکستان د بلوچستان ایالت د تربت ولسوالۍ پولیسو د یو لړ عملیاتو پرمهال ۲۲ بېاسناده افغان کډوال نیولي دي. پولیسو ویلي، دغه کسان د یوه مساپر وړونکي موټر د پلټنې پرمهال نیول شوي دي.
په بلخ کې د طالبانو امنیې قوماندانۍ خبر ورکړی، چې د کابل-مزارشریف پر لویه لار د تېلو د یو ټېلر او مازدا ډوله موټرونو د ټکر له کبله درې کسان مړه او دوه نور ټپيان شوي دي. طالبانو د پېښې لامل د موټر چلوونکو بېاحتیاطي یاده کړې ده.
ګلابالدین خپلواک د عمومي اسمبلۍ د غړو لهخوا د ډېرو رایو په اخیستلو د افغانستان د سنوکر او بلیارډ فدراسیون د سرپرست په توګه وټاکل شو. دغه ټاکنه د روان کال د غويي میاشتې په ترڅ کې د فدراسیون پخواني رییس وحیدالله اصغري تر وژل کېدو وروسته شوې ده.
د اسلاماباد سترې محکمې د پاکستان د تحریک انصاف ګوند بنسټګر او پخواني لومړي وزیر عمران خان او د هغه د مېرمنې بشرا بيبي د انفرادي بندخونو په اړه د شکایتونو او راپورونو تر اورېدو وروسته خپله پرېکړه وځنډوله.
د طالبانو د سیاسي مخالفانو او وسلهوالو ډلو تر بحثونو او نیوکو وروسته اوس پر یادې ډلې په خواله رسنیو کې د نیوکو او نارضایتۍ څپه پراخه شوې ده. په دې وروستیو کې عام خلک، د طالبانو پلویان او د یادې ډلې یوشمېر غړي د یادې ډلې پر اقتصادي، اداري او ټولنیزو پالیسیو نیوکې کوي.
د پاکستان سترې محکمې د پولیسو لهخوا د هغه افغان کډوال تر نیولو وروسته د نوموړي ضمانت منظور کړ، چې له یوې پاکستانۍ مېرمنې سره یې واده کړی دی. نوموړی د باجوړ د ناوګۍ تاڼې اړوند د ویزې او د مېشتېدو قانوني اسنادو نهلرلو له امله نیول شوی و.
د بلوچستان د قلات ولسوالۍ ځایي ادارې د امنیتي وضعیت د خرابېدو له امله د شپې له لسو بجو د سهار تر اوو بجو پورې ګرځبندیز اعلان کړی. د یادې ادارې د خبرپاڼې له مخې؛ ګرځبندیز به د اګست له اتمې تر ۲۱مې نېټې او دارنګه د اګست په ۲۵مه او ۲۶مه نېټه نافذ وي.
په پاکستان کې د افغان کډوالو د بېرته ستنولو لړۍ روانه ده او په بېلابېلو سیمو کې د مېشتو افغان کډوالو پر ضد د پولیسو عملیات هم پراخ شوي دي. د خیبر پښتونخوا د مانسهرې ولسوالۍ په اوګي سیمه کې پولیسو د یو لړ عملیاتو پرمهال ۹ افغان کډوال نیولي دي.
په کندهار کې یو پخواني مامور عبدالولي رشیدي پر فېسبوک پاڼه لیکلي، د شپې یې د بېکارۍ او کورنۍ ته د نفقې برابرولو لپاره موټر چلاوه؛ خو د طالبانو ترافیکو ترې اخیستی. کندهار کې ترافیک له ټکسي او د دوی له اجازې پرته بل چاته اجازه نه ورکوي چې سپرلۍ پورته کړي.
د ملګرو ملتونو سرمنشي انتونیو ګوترېش د اوکراین پر پلازمېنه کیف د روسیې برید غندلی او هغه یې د روسیې لهخوا پر اوکراین د روان کال تر ټولو خونړی برید بللی دی. په دغه برید کې لږترلږه ۱۷ کسان وژل شوي دي.
د جرمني د کورنیو چارو وزارت یو ویاند افغانستان انټرنشنل ته ویلي، دغه وزارت د افغان کډوالو د منلو ژمنې لغوه کولو په اړه د اساسي قانون محکمې پرېکړه څېړي. هغه ویلي، چې د جرمني د اساسي قانون محکمې پرېکړه لانورو څېړنو ته اړتیا لري او دغه څېړنې او ارزونې روانې دي.
په ایران کې مېشت یوشمېر افغان کډوالو افغانستان انټرنشنل ته ویلي، سره له دې چې بایومټریک شوي او اړوند لګښتونه یې ورکړي؛ د دوی د اوسېدو اسنادو غځولو بهیر لاهم ناروښانه دی. د دوی په وینا؛ د ډېرو افغانانو د استوګنې موده پای ته رسېدو ته نږدې شوې ده.
د امریکا ولسمشر ډونالډ ټرمپ ویلي، د هغه په اند د امریکا او ایران جګړه به «ډېر ژر» پای ته ورسېږي. ټرمپ د پنجشنبې په ورځ په سپینه ماڼۍ کې خبریالانو ته وویل: «فکر کوم چې دغه جګړه به ډېر ژر پای ته ورسېږي. فکر نهکوم چې هغوی به وکولای شي د اوږدې مودې لپاره دې جګړې ته دوام ورکړي».
د خوړو او کرنې نړیوالې ادارې خبرداری ورکړی چې د کیمیاوي سرې د بیو لوړېدو د افغانستان د ۲۰۲۷ کال د غنمو حاصلات له ګواښ سره مخ کړي. دوی له مرستهکوونکو د ۳۸،۳ میلیون ډالرو مرستې غوښتنه کړې، څو ۶۰۰ زرو کورنیو ته د ژمني غنمو د کرکېلې له پیل مخکې تصدیق شوې تخمونه او کیمیاوي سره ورسوي.
د هند د چندیګړ یوې محکمې د بالیووډ مشهور لوبغاړی سلمان خان، د هغه خور الویرا خان اګنیهوتري او د «سټایل اېنډ کانټنټ جولري خصوصي شرکت» مدیران د «بیینګ هیومن» د ګاڼو له یوه نندارتون سره د تړلې نږدې ۳۰ میلیونه هندي روپیو د ادعا شوې درغلۍ په قضیه کې محکمې ته احضار کړي دي.