د طالبانو د احصايي او معلوماتو ملي اداره وايي، چې په ۱۴۰۴کال کې د هوايي ډګرونو او ځمکنیو بندرونو له لارې افغانستان ته ۲۸زره او ۴۷۴ بهرنیو وګړو تګراتګ کړی دی. یادې ادارې ویلي، چې په دې کې ۸۸۶ ښځې هم شاملې دي.
په سمنګان کې د طالبانو د امنیې قوماندانۍ ویاند حشمت الله رحماني وایي، چې د دغه ولایت په فیروزنخچیر ولسوالۍ کې د وروستیو سېلابونو له امله یوه ښځه او دوه ماشومان مړه شوي دي. نوموړي زیاته کړې، چې د یادو سېلابونو له امله لسګونه جریبه ځمکه ویجاړه شوې ده.
د طالبانو د هواپوهنې ادارې د چهارشنبې په ورځ خبر ورکړی، چې په ۳۳ ولایتونو کې (د روانې وري میاشتې له ۱۲مې تر ۱۵مې) د شړکنده باران، تالندې برېښنا، تېزو سېلیو او سېلابونو راوتو اټکل شوی دی.
د ناروې د کډوالو شورا راپور ورکړی، چې په ایران کې د شخړو له زیاتېدو سره هممهاله له ۲۸زره زیات افغانان خپل هېواد ته ستانه شوي. یادې شورا ویلي، چې دوی افغانستان ته تش لاسونه ستانه شوي او دا مهال د ژوند جوړولو لپاره بېړنیو مرستو ته اړتیا لري.
په کونړ کې د طالبانو د اطلاعاتو او کلتور رییس نجیب الله وايي، چې له پاکستان سره د جګړې له پیله د دغه ولایت ډیورنډ کرښې ته څېرمه ولسوالیو کې شاوخوا ۹زره کورنۍ بېځایه شوې دي. نوموړي زیاته کړې، چې د پاکستان پوځ د جګړې له پیله د ملکي خلکو کورونه په نښه کړي دي.
د پاکستان تحریک انصاف ګوند بنسټګر او د پخواني لومړي وزیر عمران خان خور علیمه خان له زندانه د نوموړي او د هغه د مېرمنې بشرا بيبي د خلاصون لپاره د یاد ګوند پر غړو او پلویانو غږ کړی، چې د احتجاج لپاره سړکونو ته راووځي.
د طالبانو تر واک لاندې ملي ټلوېزیون د یوې ویډیو په خپرولو سره خبر ورکړی، چې د سمنګان ولایت په فیروزنخچیر ولسوالۍ کې د سختو سېلابونو راوتلو له امله یوه ښځه او دوه ماشومان تري تم شوي دي.
د پاکستان د پنجاب ایالت په قصور ولسوالۍ کې د تېرې سېشنبې په ورځ تر سختو ورښتونو او تېزو بادونو وروسته د واده تالار یو دېوال نړېدو له امله دوه ماشومان مړه او پنځه نور ټپيان شوي دي. پولیس وايي، یاده پېښه د قصور ولسوالۍ شیخوم کلي ته څېرمه شوې ده.
وال سټریټ ژورنال د سېشنبې په ماښام (د وري ۱۱مه) د عربي چارواکو په حواله راپور ورکړی، متحده عربي امارات چمتووالی نیسي چې د پوځي فشار په کارولو سره د هرمز تنګي په پرانیستلو کې له امریکا او نورو متحدینو سره مرسته وکړي.
د ملګرو ملتونو د بشري چارو همغږۍ دفتر (اوچا) وایي، چې په افغانستان کې (د مارچ له ۲۶مې تر ۳۱مې نېټې) د سختو ورښتونو او سېلابونو له کبله ۱۹ کسان مړه شوي دي. د یادې ادارې په وینا؛ په دغه موده کې تر ۹۰۰ ډېرې کورنۍ اغېزمنې شوې هم دي.
د کډوالۍ نړۍوال سازمان وایي، چې په ۲۰۲۵کال کې د اسیا-پاسفیک هېوادونو له ۲زره او ۷۰۰ څخه زیات کسان د کډوالۍ لارو په اوږدو کې مړه او یاهم تري تم شوي دي. د یاد سازمان په وینا؛ له ۱۳۰۰ زیات افغانان د افغانستان او ایران پر خطرناکو ځمکنیو لارو مړه شوي دي.
د امریکا د بهرنیو چارو وزیر مارکو روبیو ویلي، چې امریکا په جګړه کې د ایران پر وړاندې د هغوی د توغندیو او بېپیلوټه الوتکو پروګرام، د هوايي او سمندري ځواک لهمنځه وړلو او د توغندیو توغولو سیستمونو کمزوري کولو هڅه کړې او اوس د دغه اهدافو لویه برخه ترلاسه شوې ده.
په بلخ کې د طالبانو مرستیال والي نورالهادي ابو ادریس وايي، چې د افغان او ازبک سوداګرو لهخوا په ګډې پانګونې سره د ۶۰ مېلیونه ډالرو په لګښت د چرګانو د پالنې، هګیو او چرګانو د غوښې د تولید یوې فابریکې د رغولو چارې پیل شوې.
په غور کې د طالبانو امنیې قوماندانۍ خبر ورکړی، چې د غور- هرات لویې لارې د شهرک ولسوالۍ په کوتل صلاح خانه سیمه کې د یوې ټرافیکي پېښې له امله ۸ تنه ټپیان شوي دي. د یادې پېښې ټپیان د درملنې په موخه د دره تخت روغتیايي مرکز ته لېږدول شوي دي.
د امریکا دفاع وزیر پېټ هېګسټ یو ځل بیا د ایران د جګړې پر وړاندې د واشنګټن د متحدینو پر دریځ نیوکه وکړه او ټینګار یې وکړ، چې د هرمز تنګي کړکېچ د امریکا له ګټو پورته موضوع ده او نور هېوادونه هم پر وړاندې یې مسوولیت لري.
د امریکا د متحدو ایالتونو د مرکزي قوماندانۍ (سنټکام) ویاند کپتان ټیم هاوکینز ویلي، چې په منځني ختیځ کې د بریدونو له پیل راهیسې تر اوسه ۳۴۸ امریکايي سرتېري ټپیان شوي دي، چې له دې ډلې د ۶ کسانو ټپونه جدي بلل شوي دي.
د ههنګاو په نوم د ایران د بشري حقونو یو سازمان وایي، د ۲۰۲۶ کال په لومړیو درېیو میاشتو کې د ایران په بېلابېلو زندانونو کې لږ تر لږه ۱۶۰ بندیان اعدام شوي دي. یاد سازمان د یوه راپور په خپرولو سره زیاته کړې، چې دا شمېره د ۲۰۲۵ کال د همدې مودې پرتله ۳۱ سلنه کموالی ښيي.
د بښنې نړۍوال سازمان خبرداری ورکړی، چې د فوټبال په میلیونونو مینهوال چې غواړي د ۲۰۲۶ کال په نړۍوال جام کې ګډون وکړي، د «بشري حقونو د پام وړ ګواښونو» سره مخ دي. دغه بنسټ وايي، دا سیالۍ له هغو «خوندي، ازادو او ټولګډونه» معیارونو څخه لرې شوې دي، چې وړاندې یې ژمنه شوې وه.
د بښنې نړۍوال سازمان په ایران کې د څلورو سیاسي بندیانو «خپلسرو او پټو» اعدامونو او د لږ تر لږه اوو نورو اعتراضکوونکو د اعدام د نږدې ګواښ په غبرګون کې له ایراني چارواکو وغوښتل، چې د دغو اوو کسانو د اعدام هر ډول پلان سمدستي ودروي.
د امریکا د بهرنیو چارو وزارت د یوې بیانیې په خپرولو سره په عراق کې د یوې امریکایۍ خبریالې تښتول کېدل تایید کړل او اعلان یې وکړ، چې له دغې تښتونې سره په تړاو یو تن نیول شوی، چې د ایران تر ملاتړ لاندې وسلهوالې ډلې «کتایب حزبالله» سره تړاو لري.
اسوشېټېډ پرېس خبري اژانس د امریکايي چارواکو له قوله لیکلي، که څه هم امریکا د ایران په کړکېچ کې د منځګړیتوب لپاره د پاکستان د لېوالتیا هرکلی کړی، خو اوس له ایران سره د غېرمستقیمو مذاکراتو او د خبرو اترو د ځای په توګه د اسلاماباد پر غوره کېدو بېباوره شوې ده.