د بښنې نړۍوال سازمان په ایران کې د څلورو سیاسي بندیانو «خپلسرو او پټو» اعدامونو او د لږ تر لږه اوو نورو اعتراضکوونکو د اعدام د نږدې ګواښ په غبرګون کې له ایراني چارواکو وغوښتل، چې د دغو اوو کسانو د اعدام هر ډول پلان سمدستي ودروي.
د امریکا د بهرنیو چارو وزارت د یوې بیانیې په خپرولو سره په عراق کې د یوې امریکایۍ خبریالې تښتول کېدل تایید کړل او اعلان یې وکړ، چې له دغې تښتونې سره په تړاو یو تن نیول شوی، چې د ایران تر ملاتړ لاندې وسلهوالې ډلې «کتایب حزبالله» سره تړاو لري.
اسوشېټېډ پرېس خبري اژانس د امریکايي چارواکو له قوله لیکلي، که څه هم امریکا د ایران په کړکېچ کې د منځګړیتوب لپاره د پاکستان د لېوالتیا هرکلی کړی، خو اوس له ایران سره د غېرمستقیمو مذاکراتو او د خبرو اترو د ځای په توګه د اسلاماباد پر غوره کېدو بېباوره شوې ده.
د افغانستان د فوټبال ملي لوبډلې د ۲۰۲۷ کال د اسیا جام د غوراوي پړاو په شپږمه او وروستۍ لوبه کې د سوریې پر وړاندې د ۵–۱ په درنې پایلې سره ماتې وخوړه. افغان لوبډلې په دغو سیالیو کې یوه بریا هم ترلاسه نهکړه او په دې سره بل پړاو ته له رسېدو پاتې شوه.
د امریکا ولسمشر ډونالډ ټرمپ په سپینه ماڼۍ کې له خبریالانو سره په خبرو کې وویل، چې امریکا به په دوو یا درېیو اوونیو کې له ایران څخه ووځي. نوموړي ټینګار وکړ، چې له دغې جګړې وتل به ایران له هوکړې سره مل نه وي.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارډ بېنېټ په ملګرو ملتونو کې د افغان ښځو د کار بندیز دوام "تبعیضي" وباله او د لغوه کېدو غوښتنه یې وکړه.
د ایران د بهرنیو چارو وزیر عباس عراقچي له الجزیرې شبکې سره په خبرو کې وویل، هغه څه چې اوس روان دي مذاکرات نه، بلکې په مستقیم ډول او یا په سیمه کې د ملګرو هېوادونو له لارې د پیغامونو تبادله ده.
د اسراییل لومړي وزیر بنیامین نتنیاهو ادعا کړې، چې د ایران پر وړاندې د وروستیو پوځي عملیاتو په پایله کې یې یو سټراټیژیک بدلون رامنځته کړی او د "ایتاللهګانو رژیم" یې تر بل هر وخت کمزوری کړی دی.
د عراق د کورنیو چارو وزارت په یوه خبرپاڼه کې تایید کړې، چې په دغه هېواد کې یوه ښځینه خبریاله تښتول شوې، خو د هغې د هویت په اړه یې نور جزییات نه دي ورکړي. ورته مهال، د عراق دوو امنیتي چارواکو اسوشېټېډ پرېس خبري اژانس ته ویلي، چې تښتول شوې خبریاله د امریکا تابعیت لري.
د نړۍ د کاتولیکانو مشر پاپ لیو د سېشنبې په ورځ له ډونالډ ټرمپ وغوښتل، چې د ایران جګړې د پای ته رسولو لپاره د "وتلو لارې" په لټه کې شي او دا هغه کمساری اقدام دی، چې پهکې د کاتولیکانو مشر په مستقیم ډول د امریکا له ولسمشر څخه غواړي، چې روانې سیمهییزې نښتې پای ته ورسوي.
په هلمند کې د طالبانو والي امانالدین منصور د "افغانستان انټرنشنل" رسنۍ پر اغېزو خبرې کړي او ویلي یې دي، چې د دغه ټلوېزیون لیدونکي ترې اغېزمن کېږي. نوموړي له ولس څخه وغوښتل، چې د دغې رسنۍ له کتلو ډډه وکړي.
د امریکا د کورني امنیت وزارت اعلان کړی، چې افغانستان لا هم د "لوړ خطر" لرونکو هېوادونو په ډله کې شامل دی او د دغه هېواد پر وګړو لګول شوي سخت امنیتي محدودیتونه او څېړنې لا هم پر خپل ځای پاتې دي.
د امریکا د استازو جرګې غړې سیډني کاملاګر ډوو د سېشنبې په ورځ اعلان وکړ، چې کانګرس د افغان ښځو د حقونو د خوندیتوب په تړاو د بهرنیو اړیکو د کمېټې هغه طرحه تصویب کړه، چې د دواړو ګوندونو ملاتړ ورسره و.
د طالبانو تر ادارې لاندې د باختر خبري اژانس رییس هدایتالله هدایت د ازادې اروپا مشال راډیو د خپرونو پر بندېدو خوښي څرګنده کړې او دغه رسنۍ یې "شیطاني ځاله" بللې ده. نوموړي پر اېکسپاڼې لیکلي: «یوه لویه د مسلمانانو دوښمنه او شیطاني رسنۍ وتړل شوه».
یو شمېر افغان فعالانو د یوه نوي کمپاین په پیلولو سره له اروپایي ټولنې غوښتي، چې طالبان د یوه ترهګر سازمان په توګه وپېژني. د دغه کمپاین تنظیموونکي وایي، چې تر دې دمه لسګونه لاسلیکونه راټول شوي او دوی پلان لري چې د اروپایي پارلمان مخې ته پرلت ووهي.
د افغانستان لپاره د برېتانیا ځانګړي استازي ریچارډ لېنډسي وايي، د افغانستان په اړه د ملګرو ملتونو وروستی راپور د لا ډېرې اندېښنې وړ وضعیت په ډاګه کوي او د بشري حقونو په برخه کې د شاتګ نښې پهکې څرګندې دي.
د ملګرو ملتونو یو شمېر کارپوهانو نن د مارچ په ۳۱مه په یوه خبرپاڼه کې یو ځل بیا له طالبانو وغوښتل، چې په افغانستان کې د دغه سازمان د ښځینه کارکوونکو پر وړاندې لګول شوي بندیزونه ژر تر ژره پای ته ورسوي.
د کانونو او پټرولیم وزیر ملا هدایتالله بدري د هرات ولایت د غوریان ولسوالۍ د "نمکسار" سیمې د مالګې د استخراج تړون له یوه خصوصي شرکت سره لاسلیک کړ. په خپره شوې خبرپاڼه کې راغلي، چې د دغه تړون ارزښت ۵ میلیونه او ۳۴۲ زره امریکايي ډالره دی.
په مسکو کې د طالبانو سفیر مولوي ګل حسن حسن د روسیې د نړۍوال امنیتي فورم په مقدماتي غونډه کې ګډون کړی دی. په مسکو کې د طالبانو سفارت ویلي، چې په دې مقدماتي ناسته کې د راتلونکي فورم د مهمو موضوعاتو په اړه لومړني معلومات او جزییات ګډونوالو ته وړاندې شول.
د طالبانو سترې محکمې ویلي چې د سمنګان ولایت په حضرت سلطان ولسوالۍ او د بلخ په شورتپه کې یې شپږ کسان په مختلفو تورونو په درو وهلي او ځینو ته یې د بند سزا اورولې ده.
په پاکستان کې مېشت یو شمېر افغان محصلان چې پياوار کارتونه لري او په بېلابېلو پوهنتونونو کې په زده کړو بوخت دي، شکایت کوي چې پولیس یې نیسي، توقیف کیږي او حتا یو شمېر محصلان بېرته افغانستان ته اېستل کیږي.