د بریتانیا د دفاع وزارت وايي، د سعودي عربستان د ښارونو او مهمو زیربناوو د ساتنې لپاره ټایفون جنګي الوتکې استوي، څو د یمني وسله والو د ډرونونو او توغندیزو بریدونو مخه ونیسي. لندن ټینګار کوي چې الوتکې به یوازې دفاعي ماموریتونه ترسره کوي او د برید موخه نه لري.
د طالبانو د ټولګټو وزارت ویاند وايي، چې د حیرتان او مزارشریف ترمنځ د نایب اباد تمځای د ۱۶۹۴ متره رېل پټلۍ چارې بشپړې شوې او پرانیستل شوې ده. دا پروژه له ازبکستان سره د څه باندې ۱۶۹ میلیونه افغانیو د تړون یوه برخه ده.
د طالبانو د دفاع وزارت د خپرو شویو شمېرو له مخې، دې ډلې په تېرو اتو میاشتو کې لږ تر لږه ۷۸ زغروال موټر او ټانکونه بېرته رغولي دي. وزارت د دغو وسایطو د خرابېدو لاملونه نه دي په ډاګه کړي، خو شنونکي یې د مراقبت نشتوالی او د طالبانو د سرتېرو بېاحتیاطي ګڼي.
د طالبانو د ریاستالوزرا اداري مرستیال عبدالسلام حنفي د خصوصي روغتونونو د درجه بندۍ او د اعتبار ورکولو د پايلو په ناسته کې له بهر مېشتو افغان ډاکټرانو وغوښتل چې د هېواد د روغتیايي چارو په پیاوړتیا کې برخه واخلي.
په ریاض کې د طالبانو د سفارت سرپرست عبدالفتاح رحیمي د سعودي عربستان له امنیتي چارواکو سره د افغان بندیانو د وضعیت او د هغوی د ستونزو پر حل خبرې کړې دي. رحیمي همدارنګه په سعودي کې له یو شمېر افغان بندیانو سره له نږدې کتلي او هغوی ته یې د سفارت له اړخه د ملاتړ ډاډ ورکړی دی.
د افغانستان، ایران او ترکیې ترمنځ د سوداګریز او ترانزیټي اورګاډي فعالیت بېرته پیلیږي. دغه سوداګریز اورګاډی به په اونۍ کې یو ځل له هرات څخه خواف ته حرکت کوي او له هغه ځایه به د ایران د رازي سرحدي تمځای له لارې ترکیې ته ننوځي.
د طالبانو د ریاست الوزرا اقتصادي مرستیال ملا عبدالغني برادر په مشرۍ د اقتصادي کمېسیون په غونډه کې په افغانستان کې د توکو د نرخونو او کیفیت پر جدي څارنې ټینګار شوی دی. برادر خبرداری ورکړی، چې له ګران پلورونکو او د کیفیت له معیارونو سرغړوونکو کسانو سره به قانوني چلند وشي.
اروپايي ټولنه د نجونو پر زدهکړو او د ښځو پر حقونو د طالبانو محدودیتونه غندي او د دغو تبعیضي تګلارو د لغوه کولو غوښتنه کوي. دغه ټولنه وايي، له شپږم ټولګي پورته نجونو پر زدهکړو بندیز له ۲،۲ میلیونو ډېرې نجونې اغېزمنې کړې دي.
د پاکستان تحریک انصاف ګوند مشر بېرسټر ګوهر خان وايي، په خیبرپښتونخوا کې والي واکمني او بېړنی حالت د اساسي قانون پر ضد لګول شوی او دوی به یې په پېښور عالي محکمه کې ثابت کړي. هغه زیاته کړه چې تحریک انصاف او ایتلافیان یې له محکمې څخه د قانوني مرستې او پرېکړې تمه لري.
د سياېناېن مشهورې خبریالې کریستین امانپور اعلان کړی چې د ۱۴۰۶ کال په غبرګولي کې له ۴۳ کلنې همکارۍ وروسته له دې رسنۍ ځي. هغې په خپل مسلکي ژوند کې د افغانستان د جګړو، د طالبانو د لومړۍ واکمنۍ او را وروسته حالاتو ګڼ رپوټونه ور کړي دي.
د ایران د بهرنیو چارو وزارت ویاند اسماعیل بقایي ویلي، چې هېواد یې د خپلو ختیزو پولو د امنیت خوندیتوب په موخه له افغانستان او پاکستان سره پرلهپسې تعاملات کړي دي. هغه زیاته کړه، چې د پولو امنیت د تهران د کارونو په لومړیتوب کې دی.
په کندوز او نیمروز کې د دوو جلا ترافیکي پېښو له امله درې کسه مړه او ۹ نور ټپیان شوي دي. په کندوز کې د طالبانو د امنیه قوماندانۍ ویاند جمعه الدین خاکسار وايي، په دغه ولایت کې د یوې ترافیکي پېښې له کبله دوه کسان مړه او څلور نور ټپيان شوي دي.
د ایران د بهرنیو چارو وزارت ویاند اسماعیل بقايي ویلي، په سیمه کې د روانو کړکېچونو او ناامنۍ اصلي لامل د امریکا او ځینو اروپايي هېوادونو په ملاتړ د اسراییل د پراختیاپاله تګلارو دوام دی.
د قاشوغو نڅا د افغانستان د ازبکانو د کلتوري میراث یوه ځانګړې برخه ده. مینهوال یې وايي، دغه ولسي هنر د قاشوغو له غږونو، سیمهییزې موسیقۍ او «نای نای» ترانې سره له یوه نسل څخه بل ته لېږدول شوی دی.
واشنګټن پوسټ ورځپاڼې د دوشنبې په ورځ (د تلې ۲۷مه) راپور ورکړی، د امریکا یوشمېر اوسني او پخواني پوځي چارواکي باور او تمه لري چې پنټاګون ښايي تر منځمهاله ټاکنو مخکې له افغانستان نه د امریکايي ځواکونو د وتلو د ارزونې راپور خپور کړي. خو د دغه راپور د خپرېدو کره نېټه لا روښانه نهده.
د طالبانو د عامې روغتیا وزارت وايي، په کابل کې د ۱۱۵ ارزول شویو خصوصي روغتونونو له ډلې یوازې دوه روغتونونه د دغه وزارت د معیارونو له مخې په لومړۍ درجه (اې) کې راغلي دي او معیاري پېژندل شوي؛ خو پاتې ۶۵ روغتونونه نامعیاري اعلان شوي دي.
د فرانسې حکومت په وروستیو لاریونونو کې د تاوتریخوالي او د هټیو تر لوټلو وروسته په څو ښارونو کې د شپې لهخوا ګرځبندیز لګولی دی. د فرانسې لومړي وزیر سیباستین لوکارنو د تاوتریخوالي د بیا تکرار د مخنیوي لپاره په ځانګړو سیمو کې د تګراتګ محدودیتونو غوښتنه کړې ده.
په هرات کې د طالبانو والي نوراحمد اسلام جار د ترکیې او ترکمنستان له جنرال قونسلانو سره په لیدنه کې د یوه افغان ـ ترک معیاري روغتون او د تورغونډۍ په پوله د یوه ګډ افغان ـ ترکمن روغتون جوړولو په اړه خبرې کړې دي.
د پېښور عالي محکمه سېشنبه (د تلې ۲۸مه) په خیبر پښتونخوا کې د بېړنې حالت او د والي واکمنۍ پر وړاندې د څو عریضو اورېدنه کوي. تحریک انصاف ګوند له محکمې غوښتي، چې د خپلې عریضې د تعدیل اجازه ورکړي؛ څو د پارلمان، ملي اسمبلۍ او سنا لهخوا د حکومت د اقدام ملاتړ پرېکړه هم وننګوي.
د طالبانو د کورنیو چارو وزارت د نشهيي توکو پر وړاندې د مبارزې مرستیال عبدالرحمان منیر د نشهيي توکو د تولید او قاچاق په تړاو د پاکستان وروستۍ ادعاوې بېبنسټه بللې او په دې اړه یې د خپلواکې او بېپرې څېړنې غوښتنه کړې ده.
د ملګرو ملتونو پراختیايي پروګرام (UNDP) وايي، د «ابادۍ» پروګرام په مالي ملاتړ او د لمریزې برېښنا په برابرولو سره یې په کندوز ولایت کې ۷۰ ښځو ته د عاید ترلاسه کولو زمینه برابره کړې ده.