د طالبانو تر چتر لاندې د پېښو سره د مبارزې امادګۍ اداره وایي، چې د افغانستان د ماینپاکۍ پروګرام د معلوماتو د ثبت انلاین سیسټم د لومړي ځل لپاره فعال شوی او له مخې یې د ماینونو او ناچاوده توکو اړوند معلومات، سروې او د پاکولو بهیر په معیاري او ډیجیټلي ډول مدیریت کېږي.
د جمهوریت پر مهال د کانونو او پټرولیم وزیره نرګس نهان وایي، چې په افغانستان کې ښځې او نجونې یوازې د خپل جنسیت له امله له تبعیض، دوامدار نفرت او بېپایانه ظلم سره مخ دي او ټینګار کوي چې نړیواله ټولنه باید د هغوی غږ شي او د حساب غوښتنه روانه وساتي.
په پروان کې د طالبانو د اطلاعاتو او کلتور ریاست د توپدرې تاریخي استوپې د ساتنې او د هغې د ارزښت په اړه یوه ځانګړې ناسته کړې ده. د اطلاعاتو او کلتور ریاست مسوولانو د سیمې له اوسېدونکو وغوښتل چې د دغو تاریخي اثارو په ساتنه او خوندیتوب کې له اړوندو ادارو سره هراړخیزه همکاري وکړي.
د افغانستان د کورش ۱۲ کسیزه لوبډله د کورش په پنځلسم پړاو اسیايي سیالیو کې د ګډون په موخه تاجکستان ته لاړه. دغه افغان لوبغاړي او ورسره پلاوی به د اسیايي کورش کنفدراسیون کلني کانګرس او یوه روزنیزه دوره کې هم ګډون وکړي.
د امریکا د ارلینګټن ولسوالۍ د اور وژنې او بېړنیو مرستو چارواکو ویلي، اور وژونکو د پنجشنبې په ورځ د پنټاګون ودانۍ کې د خطرناکو موادو اړوند د یوې پېښې څېړنه کړې. یادې رسنۍ د سرچینو په حواله راپور ورکړی چې پنټاګون د احتیاطي تدابیرو په توګه قرنطین شوی او د ودانۍ څو پوړونه تخلیه شوي.
د امریکا د کانګرس لسګونو غړو د ولسمشر ډونالډ ټرمپ له ادارې غوښتي چې هغه افغان وګړو ناامنو درېیمو هېوادونو ته د لېږد له پلانونو تېر شي، کومو چې د افغانستان د جګړې پر مهال له امریکايي ځواکونو سره کار کړی و.
د بشري حقونو د څار سازمان پخواني اجراییوي مشر کینیټ روټ ادعا کړې، چې د طالبانو امنیتي ځواکونو د هرات په ښار کې د اعتراض کوونکو پر ضد له حده زیات زور کارولی، ډزې یې پرې کړې، یو ماشوم یې وژلی او یو شمېر نور کسان یې ټپیان او نیولي دي.
د بښنې نړیوال سازمان د اروپايي ټولنې څانګه وایي، د دې ادارې د افغانستان څېړونکې زهره سلطاني د بلجیم له چارواکو او د اروپايي ټولنې له بنسټونو سره د لیدنو لپاره بروکسل ته تللې، څو افغانستان ته د بېرته ستنېدونکو کسانو پر وړاندې د شته جدي ګواښونو او ځورونو په اړه اندېښنې شریکې کړي.
د امریکا د بهرنیو چارو وزارت وایي، هغه امریکايي وګړي چې د ۲۰۲۶ کال فیفا نړیوال جام د لوبو لیدلو لپاره مېکسیکو او کاناډا ته سفر کوي، باید د خوندیتوب او امنیتي معلوماتو څخه ځانونه خبر وساتي او د اړتیا په صورت کې د امریکا له سفارتونو او قونسلګریو سره اړیکه ونیسي.
د افغانستان لپاره د سعودي عربستان سفارت وایي، چې د ملک سلمان د بشري مرستو مرکز په همکارۍ یې په نیمروز او فراه ولایتونو کې راستنېدونکو کډوالو کورنیو ته ۱۶۳۷ د خوراکي توکو کڅوړې وېشلې دي.
د افغانستان د ولسي جرګې پخوانۍ غړې فوزیه کوفي وایي، چې طالبان د ښځو پر وړاندې د «منظمو جرمونو او ورځ تر بلې زیاتېدونکي ظلم» له امله د خلکو له پراخ نفرت سره مخ شوي. هغه زیاتوي چې د مدنيت تر نوم لاندې نمایشي فعالیتونه د دې وضعیت حقیقت نه شي بدلولای او دا به بالاخره پای ته ورسېږي.
د روسیې د «اګريمیر» شرکت رييس د طالبانو د کانونو وزارت له مسوولینو سره په کتنه کې د هېواد پر کاني زیرمو او په ځانګړې توګه د کرومایټ او جست پر کانونو پانګونو ته لېوالتیا ښودلې ده. طالب چارواکو له یادې لېوالتیا هرکلی کړی او د همکاریو ژمنه یې کړې ده.
د ملګرو ملتونو د بشري حقونو کارپوهانو په افغانستان کې د بشري حقونو د وضعیت په اړه ژوره اندېښنه څرګنده کړې او ویلي یې دي چې په هرات ولایت کې د جامو د اصولو د سرغړونې په تور د ښځو نیول او د اعتراض کوونکو پر ضد د زور زیاتي کارول له نړیوالو قوانینو ښکاره سرغړونه ده.
د ملګرو ملتونو سرمنشي انتونیو ګوترېش د منځني ختیځ د کړکېچ پر زیاتېدو «ژوره اندېښنه» ښودلې او پر تهران او واشنګټن یې غږ کړی، چې بېرته اوربند ته را وګرځي.
په دوحه کې د طالبانو سفارت ویلي چې سهیل شاهین او د ملګرو ملتونو د کډوالو عالي کمېشنرۍ د بهرنیو اړیکو مسوول چارلي ګوډل لیک له پاکستان او ایران څخه د راستنېدونکو افغان کډوالو د ستونزو په اړه خبرې کړې دي.
د بشري حقونو د څار نړیوال سازمان ویلي چې د طالبانو امنیتي ځواکونو د ۲۰۲۶ کال د جون په ۹مه په هرات ښار کې پر مظاهرهچیانو له حده زیات زور کارولی دی. یاد سازمان ویلي، چې د طالبانو ځواکونو کورونه تلاشي کړي، موبایلونه یې پلټلي او هغه کسان یې نیولي، چې د لاریون ویډیوګانې یې لرلې.
پخواني ولسمشر محمد اشرف غني د پاډکاسټونو درول شوې لړۍ له شاوخوا شپږ میاشتو وروسته یوځل بیا پیل کړې ده. نوموړي ویلي چې د پاډکاسټونو لړۍ یې د معلومو دلایلو له امله درول شوې وه.
ایراني چارواکي وايي، د ایران او افغانستان ترمنځ سوداګري له ۳،۲ میلیارده ډالرو زیاته شوې، خو له افغانستان نه یې واردات د ۳۰ میلیونه ډالرو په ارزښت دي. د ایران د دوغارون بندر یوه چارواکي وویل، چې د ایران او افغانستان مجموعي تجارت له اروپایي اتحادیې سره د ایران له تجارت ډېر دی.
اروپايي ټولنې په هرات کې د طالبانو لهخوا د ښځو نیولو او د لاریون والو پر وړاندې د زور زیاتي کارول غندلي او وايي، طالبان دې د بشري حقونو اړوند خپلو نړۍوالو مکلفیتونو ته درناوی وکړي.
په ایټالیا کې ولسي دایمې محکمې د افغان کډوالو د ستنولو پر سر د خبرو اترو لپاره بروکسل ته د طالبانو د استازو بلل غندلي او له اروپايي ټولنې یې غوښتې، چې خپله بلنه بېرته واخلي. محکمې ویلي، چې اروپايي ټولنه دې افغانستان ته ټولې جبري ستنونې ودروي.
د طالبانو د کابل امنیه قوماندانۍ ویاند وايي، چې د پلازمېنې په شپږمه حوزه کې پر نجونو د موټر برید عامل، چې څو تنې یې ټپي کړې، تثبیت شوی او د نیولو هڅې یې روانې دي. خالد ځدراڼ ویلي، چې د ټپي شویو نجونو روغتیايي وضعیت ډاډ وړ دی.