په پاکستان کې د روسیې سفیر افغانستان انټرنشنل ته وویل، چې مسکو چمتو دی د افغانستان او پاکستان ترمنځ د کړکېچ کمولو کې مرسته وکړي، خو د اسلام ابادځواب ته په تمه دي. هغه د پاکستان د بریدونو له امله د ملکي وګړو د مرګژوبلې او له افغان خاورې د وسلهوالو د نفوذ په اړه اندېښنه وښوده.
د طالبانو د لوړو زده کړو وزیر ندا محمد ندیم له خصوصي پوهنتونونو غوښتي چې د ټولنې اړتیاوو ته په کتو پوهنځي او څانګې جوړې کړي، څو افغانستان له ستونزو خلاص او په ځان بسیا شي. نوموړي ټینګار کړی چې خصوصي پوهنتونونه باید د طالبانو احکام او پالیسۍ عملي کړي.
د اکتوبر په پنځلسمه او شپاړسمه نېټه په مسکو کې د منځنۍ اسیا او افغانستان د امنیت په اړه د (CSTO, CIS & SCO) له خوا یو ګډ کنفرانس جوړ شوی و. په دغه کنفرانس کې د روسیې د بهرنیو چارو وزیر سرګي لاوروف یوه مهمه وینا درلوده.
سرچینو افغانستان انټرنشنل ته وویل، چې طالبانو په کابل کې د ودانیو ساتونکو او د سیمو چوکیدارانو ته امر کړی چې مخابرې واخلي او د دوی پولیسو ته د ورځنیو پېښو خبر ور کړي. د سرچینو په وینا، طالبانو دغه راز له ساتونکو غوښتي چې ځانونو ته یونیفورم چمتو کړي.
د ملګرو ملتونو د بشري چارو د همغږۍ دفتر (اوچا) وايي، د افغانستان په سوېل کې خلک د خوړو ناامنۍ، خوارځواکۍ، بېکارۍ، بېوزلۍ، د اوبو کمښت او زدهکړو ته د لاسرسي له خنډونو سره مخ دي او د بشري اړتیاوو او شته مرستو ترمنځ واټن ورځ تر بلې پراخېږي.
د امریکا د بهرنیو چارو وزیر مارکو روبیو د دوشنبې په ورځ په ازبکستان کې د منځنۍ اسیا د پنځو هېوادونو له چارواکو سره ولیدل. د هغه سفر تر اوسه د پام وړ عامه پایلې نه دي لرلې، خو امریکايي چارواکي یې له سیمې سره د امریکا د نرم ځواک د پراختیا لپاره مهم بولي.
د طالبانو د هرات ولایت د یوولسمې امنیتي حوزې مسوولان وايي، په تېره یوه میاشت کې یې د بېلابېلو کشفي عملیاتو په ترڅ کې د غلاوو په تور ۲۰ کسان له غلا شویو توکو سره نیولي دي. د طالبانو په وینا، نیول شوي کسان د خلکو له کورونو او موټرو څخه په غلاوو تورن دي.
په کابل کې د طالبانو باخبره سرچینو افغانستان انټرنشنل ته وویل، چې ددې ډلې مشر مولوي هبت الله په کابل کې د رییس الوزرا محمد حسن اخوند په مشرۍ د کابینې غونډې محدودې کړي دي. د سرچینو په وینا، د ریاست الوزرا ټول مرستیالان خپلې پرېکړې د تایید لپاره د هبت الله دفتر ته لېږي.
د لیبیا د پلازمېنې طرابلس لوېدیز پلو په زاویه ښار کې د یکشنبې په وروستیو ساعتونو کې د روزنیز تمرین پر مهال د هاوان مرمۍ د چاودېدو له امله د یوې امنیتي ادارې لږ تر لږه نهه غړي وژل شوي او څو نور ټپیان شوي دي.
د پاکستان د لومړي وزیر مرستیال او د بهرنیو چارو وزیر اسحاق ډارد شانګهای همکاریو سازمان په دوه ورځنۍ غونډه کې ګډون لپاره تاجکستان ته تللی. په دې غونډه کې د سیمهییزو همکاریو او اقتصادي اړیکو د پراختیا په اړه خبرې کیږي.
د نایجریا په بورنو ایالت کې د پوځ پر کاروان د ماین چاودنې او وسلهوال برید له امله ۱۰ تنه پوځیان او د ملکي ګډې عملیاتي ډلې پنځه غړي وژل شوي او شپږ پوځیان ټپیان دي. د سرچینو په وینا، دغه ماین ښايي د بـ.ـوکــو حـرام وسلهوالو ایښی وي.
د پاکستان د پوځ د عامه اړیکو ادارې مشر جنرال احمد شریف چوهدري ویلي چې پاکستان د سعودي عربستان د دفاع لپاره هر ډول اړین ملاتړ برابروي او که اړتیا وي، په راتلونکي کې به یې هم برابر کړي.
د یونان لېسبوس او ساموس ټاپوګانو ته څېرمه د کډوالو د دوو کښتیو د چپه کېدو په دوو جلا پېښو کې، چې د دوشنبې په ورځ شوې، د یوه ماشوم په ګډون ۱۲ کسان مړه شوي دي. د یونان ساحلي ساتونکو او چارواکو ویلي، چې دغه کښتۍ د ساحلي ساتونکو د تعقیب پرمهال چپه شوې.
باوري سرچینې وايي، چې د ناامنیو له پراخېدو او په بدخشان کې د طالبانو د والي پر دفتر د بریدونو له زیاتېدو وروسته د کلهمنار پر غونډۍ د والي دفتر ته څېرمه د دې ډلې د بېپیلوټه الوتکو دویم عملیاتي مرکز په دې وروستیو کې خپل فعالیت پیل کړی دی.
د طالبانو ویاند ذبیحالله مجاهد وايي، د ځینو مطالبو نه خپراوی چې له ملي مصلحتونو سره په ټکر کې وي د رسنیو د سانسور معنا نهلري. نوموړي دغه څرګندونې نن له غرمې مخکې په کندهار ولایت کې له خبریالانو سره د لیدنې پرمهال کړې دي.
د طالبانو د کورنیو چارو وزارت خبر ورکړی، چې په نهو ولایتونو کې یې د نشهيي توکو د قاچاق په تړاو ۲۸ تنه نیولي دي. دا کسان په لغمان، سمنګان، جوزجان، خوست، نیمروز، پروان، کاپیسا، بامیان او بلخ کې د جلاجلا عملیاتو پر مهال نیول شوي دي.
د غزې د روغتیا وزارت د شمېرو له مخې، د ۲۰۲۳ کال له اکتوبر راهیسې د اسراییل په بریدونو کې لږ تر لږه ۷۴ زره او ۴۸۰ فلسطینیان وژل شوي او ۱۷۵ زره او ۵۳۹ نور ټپیان شوي دي.
په کندهار کې د ګڼو کورنیو لپاره اوسمهال د بېکارۍ ترڅنګ لویه ستونزه د سبا لپاره د یوې مړۍ ډوډۍ پيدا کول دي. زرګونه ځوانان هر سهار د کار په تمه له کوره وځي؛ خو ډېری یې ماښام تش لاس بېرته ستنېږي او ان د سل افغانۍ لاسباړې په بدل کې هم ورته په ورځو، ورځو کار نه پیدا کېږي.
د امریکا د بهرنیو چارو وزیر مارکو روبیو له «بریټبارټ» رسنۍ سره په مرکه کې ویلي، چې حزبالله «سل په سلو کې د ایران عامل» دی او دغه هېواد د عراق د شیعه وسلهوالو ملاتړی هم دی. د نوموړي په وینا، دغه ډلې د عراق له خاورې پر عربستان او اسراییل د توغندیزو بریدونو وړتیا تر لاسه کړې.
د پاکستان د پلان جوړونې، پراختیا او ځانګړو نوښتونو وزیر احسن اقبال ویلي، چې د دغه هېواد لومړنی ستورمزلی به په راتلونکې یوه میاشت کې د چین له فضايي مرکز څخه فضا ته واستوي.
هرات کې د طالبانو د اطلاعاتو او فرهنګ رییس عتیقالله عزیزي وايي، د کوترو د تاریخي کوټنیو د خوندي کولو، ساتنې، ترمیم او بیارغونې لپاره له همکارو ادارو سره خبرې کوي. نوموړي زیاته کړې، دغه تاریخي کوټنۍ د کرنې او مرغانو د ساتنې په برخه کې د پخوانیو نسلونو پوهه، هنر او نوښت څرګندوي.