د ایران له دولتي سرچینو سره تړلي، تسنیم خبري اژانس راپور ورکړی چې ټاکل شوې ده چې د پاکستان د پوځ مشر عاصم منیر د سېشنبې په ورځ تهران ته سفر وکړي. د دغه سفر په اړه تر اوسه پاکستاني او ایراني چارواکو رسمي تایید نه دی کړی.
د طالبانو د قبایلو چارو وزارت چارواکو ادعا کړې، چې خلکو په یوه غونډه کې، د دوی په واکمنۍ د خدای « شکر» ادا کړی او ویلي یې دي چې اوس د «ازادۍ» په خوند پوه شوي، خو فریډم هاوس سازمان، د ۲۰۲۶ راپور کې افغانستان د « غیر ازادو» هېوادونو په ډله کې د « تر ټولو ټیټ» مقام لرونکی ګڼلی.
د روسیې د بهرنیو چارو وزیر سرګي لاوروف وايي، د اوکراین ولسمشر ولودیمیر زیلینسکي نه غواړي له روسیې سره خبرې اترې وکړي. هغه پر زیلینسکي تور پورې کړ چې د خبرو اترو د بیا پیل لپاره د هیلو له رامنځته کېدو وروسته یې پر ملکي موخو بریدونه کړي.
د ملګرو ملتونو د ښځو اداره وايي، د سولې په ټینګښت کې د ښځو د مشرتابه لپاره پانګونه کمېږي او ښځې د سولې له خبرو څخه په زیاتېدونکي ډول لرې کېږي. په افغانستان کې هم د طالبانو له واک ته بیا رسېدو وروسته ښځې د سولې، امنیت او د هېواد د راتلونکي په اړه له مهمو پرېکړو څخه څنډې ته شوې.
د عوامي نېشنل ګوند د پښتونخوا مشر میاں افتخار حسین وايي، ګوند به یې د هېچا سیاسي لارښوونې ونه مني او د پښتنو د حقونو، د ایالت د خپلواکۍ او د تلپاتې سولې لپاره به پر خپل اصولي دریځ ولاړ وي.
افغانستان کې د پاکستان پخوانی سفیر سید ابرار حسین وایي، د تحریک طالبان پاکستان د فعالیتونو په اړه د اسلاماباد امنیتي اندېښنې د طالبانو او پاکستان ترمنځ د روان کړکېچ اصلي لامل دی. نوموړي ټینګار کړی چې د دغو اندېښنو تر حل کېدو پورې به پاکستان خپلو اوسنیو سیاستونو ته دوام ورکړي.
د هلمند طالب والي امانالدین منصور د یوناما د سویل لوېدیځ زون له مسوول البرټو سره په لیدنه کې غوښتنه کړې، چې نړیوالو ته دې «واقعي راپورونه» وړاندې شي او بشري مرستې دې نه سیاسي کېږي. د طالبانو د بشري سرغړونو په اړه د یوناما وروستي راپور، طالب چارواکي سخت قهرولي دي.
د طالبانو له پېښو سره د مبارزې او امادګۍ ادارې او په اسیا کې د نړیوالو ټولنیزو خدمتونو موسسې د ۹۶۹ زره او ۷۵۲ ډالرو په ارزښت د ګډو همکاریو هوکړه کړې، چې له مخې به یې په بامیان کې ۲۵۰۰ کورنیو ته نغدي مرستې ورکوي.
د پاکستان د پوځ د عامه اړیکو څانګې ویلي د بلوچستان د ګوادر ولسوالۍ په شادي کور سیمه کې د عملیاتو پر مهال د لاسي جوړو شويو چاودېدونکو توکو په چاودنه کې د پاکستان د پوځ یو جګړن، وجاهت وحید وژل شوی دی.
په کندهار کې د طالبانو مرستیال والي سیفالدین تایب، له خبریالانو غوښتي چې خپل استعدادونه دې دوی د ملاتړ لپاره په «فکري جګړه» کې وکاروي.په دې ناسته کې د طالبانو ویاند ذبیحالله مجاهد هم له خبریالانو غوښتي، چې د دوی ادعا شوې« لاسته راوړنې» خپرې کړي.
د ایران ولسمشر مسعود پزشکیان په تهران کې د روسیې د بهرنیو چارو له وزیر سرګي لاوروف سره کتلي او د دواړو هېوادونو د اړیکو، سیمهییزو او نړیوالو بدلونونو په اړه یې خبرې کړې دي.
د افغانستان د خبریالانو مرکز د طالبانو له خوا په اېف ام څپو د بيبيسي راډیو د خپرونو بندول غندلي او دا پرېکړه یې معلوماتو ته د خلکو د لاسرسي پر حق برید بللی. دغه مرکز له طالبانو غوښتي، چې دا پرېکړه بېرته واخلي او پر رسنیو لګول شوي بندیزونه لرې کړي.
د طالبانو د فراه امنیه قومانداني وايي، چې په هرات کې یې د ۳۲ میلیونه او ۲۵۰ زره پاکستانۍ کلدارو د غلا په تور یو کس نیولی دی. دغه پیسې څو ورځې مخکې د فراه په ګلمېخ سیمه کې پنځو تنو د یوه صراف له موټره وړې وې، چې د طالبانو په وینا، بېرته خپل اصلي څښتن ته سپارل شوې دي.
د ایران د بهرنیو چارو وزیر عباس عراقچي د روسیې د بهرنیو چارو له وزیر سرګي لاوروف سره په ګډه خبري ناسته کې وویل، چې تهران او مسکو د افغانستان او پاکستان ترمنځ د کړکېچ د کمولو او د ترهګریزو ګواښونو پر وړاندې د همغږۍ په اړه ګډ نظر لري.
د افغانستان متحدې جبهې ادعا کړې چې په هلمند او کندهار کې یې د بېلابېلو عملیاتو پر مهال د طالبانو دوه غړي وژلي دي. د جبهې په وینا، لومړی برید د هلمند د ګرشک او نوزاد ولسوالیو ترمنځ په کاریز سیمه کې او دویم برید د کندهار ولایت د ارغنداب ولسوالۍ په سربند سیمه کې شوی دی.
د طالبانو د عامې روغتیا وزارت یوه کارکوونکي افغانستان انټرنشنل ته د اسنادو په استولو، په خصوصي روغتیایي انسټیټیوټونو کې د لوړپوړو مسوولانو له مالي، اخلاقي او اداري فساد نه شکایت کړی.
دافغانستان په شمال کې د دوړو او خاورو پرلهپسې توپانونو د خلکو ورځنی ژوند ګډوډ کړی او د لید واټن یې کم کړی دی. کارپوهان وايي، وچکالي، د ونو او بوټو کمېدل او د تالابونو وچېدل د ځمکې د سطحې حاصلخېزه خاوره له خپل ځایه وړي او د سیمو د زیانمنېدو لامل کېږي.
د طالبانو د کرنې وزارت وايي، چې سږ کال د افغانستان د غنمو تولید د تېر کال په پرتله ۱۳ سلنه زیات شوی او ۵،۱۵ میلیونه مټریک ټنو ته رسېدلی دی. د وزارت په وینا، پر وخت ورښتونو او د اصلاح شویو تخمونو وېش د حاصلاتو په زیاتوالي کې مهم رول درلود.
په پاکستان کې د روسیې سفیر افغانستان انټرنشنل ته وویل، چې مسکو چمتو دی د افغانستان او پاکستان ترمنځ د کړکېچ کمولو کې مرسته وکړي، خو د اسلام ابادځواب ته په تمه دي. هغه د پاکستان د بریدونو له امله د ملکي وګړو د مرګژوبلې او له افغان خاورې د وسلهوالو د نفوذ په اړه اندېښنه وښوده.
د طالبانو د لوړو زده کړو وزیر ندا محمد ندیم له خصوصي پوهنتونونو غوښتي چې د ټولنې اړتیاوو ته په کتو پوهنځي او څانګې جوړې کړي، څو افغانستان له ستونزو خلاص او په ځان بسیا شي. نوموړي ټینګار کړی چې خصوصي پوهنتونونه باید د طالبانو احکام او پالیسۍ عملي کړي.
د اکتوبر په پنځلسمه او شپاړسمه نېټه په مسکو کې د منځنۍ اسیا او افغانستان د امنیت په اړه د (CSTO, CIS & SCO) له خوا یو ګډ کنفرانس جوړ شوی و. په دغه کنفرانس کې د روسیې د بهرنیو چارو وزیر سرګي لاوروف یوه مهمه وینا درلوده.