د افغانستان انټرنشنل تر راپورونو وروسته، د طالبانو د غصب د مخنیوي کمېسیون په امر د دغه ډلې د مخابراتو وزیر ملا عبدالاحد فضلي له لوري د هلمند امنیه قومندانۍ ته څېرمه د شنې سیمې د غصب مخه نیولې ده. په ویډیوګانو کې ښکاري چې پر غصب شوې ځمکه جوړ شوي دېوالونه بېرته نړول شوي دي.
د طالبانو تر واک لاندې د هغه افغان ماشومانو شمېر په بېساري ډول لوړ شوی، چې خپل راتلونکی د کورنۍ لپاره د یوې ګوله ډوډۍ په پيدا کولو قرباني کوي. په سویلي حوزه کې د ماشومانو وضعیت تر پخوا ډېر خراب شوی او ګڼ ماشومان په درنو کارونو بوخت دي.
په هلمند کې د طالبانو د کرنې ریاست وایي، چې پر شاوخوا ۳۰۰ جریبه ځمکه د خرما بڼونه جوړ شوي او د دغه بڼونو ډېری ونې اوس د حاصل ورکولو پړاو ته رسېدلې دي. یوشمېر بزګران وایي، د هلمند ګرم اقلیم او مناسبه هوا د خرماوو د ودې لپاره مناسب شرایط برابر کړي دي.
د پېښور سترې محکمې د یوه افغان د زېږون اسنادو او پاکستاني رسمي اسنادو پربنسټ اړوندو ادارو ته امر کړی، چې نوموړي ته پاکستانی تابعیت ورکړي او د هغه افغان تابعیت او د کډوالۍ (پي او ار) کارت لغوه کړي.
د افغانستان لپاره د ملګرو ملتونو ځانګړی راپور ورکوونکی ریچارډ بېنېټ وايي، چې په هرات کې د ښځو د نیولو پرضد د پلان شويو لاریونونو په ترسره کېدو باید ټول له زغم او احتیاط کار واخلي.
ځایي سرچینو د جمعې په سهار افغانستان انټرنشنل ته ویلي، چې له تېرې شپې راهیسې په هرات کې د درنو وسلو سره طالب ځواکونه په پراخه کچه ځای پرځای شوي دي. د افغانستان انټرنشنل لهخوا ترلاسه شوي انځورونه په ټول ښار کې د طالبانو پوځي موټرونه ښیي، چې په درنو وسلو سمبال دي.
د خیبر پښتونخوا په بنو ولسوالۍ کې په دوو جلا پېښو کې دوه پولیس سرتېري وژل شوي دي. ځایي چارواکي وایي، دواړه بریدونه د جمعې په ورځ (د غبرګولي ۲۲مه) شوي دي.
د رویټرز خبرياژانس د راپور له مخې؛ د امریکا ولسمشر ډونالډ ټرمپ اداره پلان لري، چې د افغانانو په ګډون د کډوالو یوه ډله مرکزي افریقا ته انتقال کړي. په راپور کې راغلي، چې د امریکا او مرکزي افریقا ترمنځ په دې اړه یوه نوې هوکړه هم شوې ده.
سرچینو د کابل په لوېدیځ دشت برچي سیمه کې د طالبانو له پراخ حضور خبر ورکړی. د ترلاسه شویو راپورونو له مخې؛ د طالبانو دغه اقدام د هر ډول احتمالي لاریونونو او راټولېدنو د مخنیوي په موخه شوی دی.
د کندهار یوشمېر اوسېدونکي وایي، په وروستیو ورځو کې د طالبانو د امربالمعروف محتسبینو لهخوا د خلکو د ظاهري بڼې، په ځانګړي ډول د ږېرو د لنډولو یا خرېلو په تړاو اقدامات زیات شوي او له همدې امله ګڼ شمېر کسان نیول شوي، پوښتنې ترې شوې او ځینې یې توقیف خونو او زندان ته لېږدول شوي دي.
پاکستان د منځنۍ اسیا هېوادونو ته د سوداګرۍ لپاره نوې ځمکنۍ لارې فعالې کړې دي؛ هغه لارې چې د افغانستان له خاورې پرته د ایران او چین له مسیرونو څخه د پاکستان بندرونو ته رسېږي. دغه اقدام د سیمې په سوداګریز او جیوپولیټیک جوړښت کې د پام وړ بدلون بلل کېږي.
یو کابل مېشتي افغانستان انټرنشنل ته ویلي: «موږ هغه اعتراض کوونکي یو، چې په ځینو څانګو کې د بېعدالتۍ، خپلوۍ او له واک څخه د ناوړه ګټې اخیستنې له امله ستړي شوي یو». هغه وایي، د طالبانو د مخابراتو وزارت امنیتي قوماندان د نورو کسانو پرځای خپل خپلوان پر دندو ګومارلي دي.
له نیمروز ولایت څخه یو ټکسي چلوونکي افغانستان انټرنشنل ته په لېږلي پيغام کې ویلي، چې په دغه ولایت کې د طالبانو د ترافیک چارواکو ټول ټکسي چلوونکي پر سړکونو له کار کولو منع کړي. نوموړي ویلي، چې طالبان د زرګونه ټکسي چلوونکو پوښتنو او ستونزو ته ځواب نه وایي.
د شمالي وزیرستان په مرکز میرانشاه کې د ۱۴۴مې مادې لګېدلي محدودیتونه د اتمې ورځې لپاره هم دوام لري. د امنیتي عملیاتو له امله د تګراتګ محدودیتونو، د مخابراتي او انټرنېټي خدمتونو پرې کېدو او د ښوونیزو بنسټونو تړل کېدو د سیمې د خلکو ورځنی ژوند اغېزمن کړی دی.
له هرات نه یوې مېرمنې افغانستان انټرنشنل ته په لېږلي غږیز پیغام کې ویلي، چې د طالبانو د امر بالمعروف ځواکونو د ۱۳زره افغانیو په بدل کې خوشې کړې ده. دغه مېرمن وایي، چې په کور کې د نارینه د نشتوالي له کبله بازار ته د خپلو ماشومانو لپاره د ښوونځيو اړوندو توکو د پېرلو لپاره تللې وه.
بلجیم د اروپايي ټولنې او طالبانو ترمنځ د افغان کډوالو د بېرته ستنولو په اړه د پلان شویو خبرو لپاره د طالب پلاوي د غړو امنیتي ارزونې پیل کړې دي. د بلجیم د بهرنیو چارو وزیر مکسیم پریوټ منلې، چې اروپايي کمېسیون بروکسل ته د احتمالي سفر لپاره د طالبانو د استازو نوملړ دوی ته سپارلی دی.
د جرمني په هامبورګ ښار کې یوشمېر افغانانو د یوې اعتراضي غونډې پرمهال په هرات کې د طالبانو لهخوا د ښځو د نیولو لړۍ د درېدو غوښتنه کړې. د غونډې ګډونوالو د ښځو نیول او د هرات د جبرییل سیمې له اوسېدونکو سره د طالبانو تاوتریخجن چلند غندلی.
په افغانستان کې د طالبانو له بیا واکمنېدو وروسته ښځینه خبریالانې له سختو محدودیتونو سره مخ دي. د راپورونو له مخې؛ ښځینه خبریالانې د افغانستان په یوشمېر ولایتونو کې د ټلوېزیون پر څپو له راڅرګندېدو منع شوې او د خبري ناستو پرمهال د پوښتنو او معلوماتو ته د لاسرسي حق هم نهلري.
یوشمېر افغان مېرمنې وايي، طالبانو د ښځو پر حجاب د تازه محدودیتونو په لګولو سره افغانستان د ښځو لپاره په «دوزخ» بدل کړی. یوې هراتۍ مېرمنې ویلي: «اوس په بازارونو کې د طالبانو محتسبین ان د ښځو پښې او لاسونه هم ګوري. که د پوستکي یو انچ هم ښکاره شي؛ نو ستونزه جوړوي».
یو افغان الاصله اسټرالیایي وګړی په غزني ولایت کې خپل پلرني کلي ته د سفر پرمهال په ډزو وژل شوی دی. محمدعلي عطایي چې په افغانستان کې زېږېدلی و؛ وروسته اسټرالیا ته کډوال شو او د هغه هېواد تابعیت یې ترلاسه کړی و.
په هرات کې ځايي سرچینې وایي چې د پنجشنبې شپې په وروستیو ساعتونو کې د طالبانو لسګونه نظامي وسایط د ښار په بېلابېلو برخو کې په ګزمو بوخت وو او امنیتي حضور یې په څرګند ډول زیات شوی و.