د کینیا یوې محکمې د مذهبي ډلې مشر پاول مکینزي او ۳۰ نور کسان د ۱۹۰ ماشومانو او یوه بالغ کس د وژنې په تور مجرمان وپېژندل. څارنوالان وايي، مکینزي خپلو پیروانو ته امر کړی و چې د نړۍ تر پای مخکې جنت ته د تلو او له عیسی مسیح سره د لیدو په باور ځانونه او ماشومان وږي وساتي.
د جرمني له خوا د کډوالو، په ځانګړې توګه د افغان پناه غوښتونکو د اېستلو پروګرام د کډوالو د حقونو د فعالانو له مخالفت سره مخ شوی دی. ټاکل شوې چې د کډوالو د حقونو ملاتړې ډلې د شنبې په ورځ، د لړم په دویمه، د جرمني په اوو هوايي ډګرونو کې لاریونونه وکړي.
د قطر د لومړي وزیر مرستیال سعود بن عبدالرحمن ال ثاني ویلي، دوحه د وروستیو بریدونو سره هم له ایران سره په بېلابېلو کچو خپلې اړیکې ساتلې دي. نوموړي د خلیج د همکارۍ شورا له غړو او همداراز پاکستان او ترکیې سره د خبرو غوښتنه وکړه.
په لوګر ولایت کې د طالبانو د امر بالمعروف او نهی عن المنکر ریاست اعلان کړی، چې د دغه ولایت له مرکز او ولسوالیو څخه راټول شوي د موسیقۍ غږولو ۱۴۲ وسایل یې سوځولي دي.
د طالبانو مخالفه وسلهواله ډله، مقاومت جبهه ادعا کوي چې طالبان په پنجشېر کې شاوخوا ۳۰ زره سرتېري لري او ۷۰۰ امنیتي پوستې یې جوړې کړې دي. د دغه جبهې په وینا، په هره پوسته کې له ۳۰ تر ۴۰ پورې طالبان ځای پر ځای شوي او د دې ولایت امنیتي وضعیت د پراخې پوځي څارنې او ځپنې ښکارندویي کوي.
د بلوچستان د مستونګ ولسوالۍ په غرنیو سیمو کې هغه ۲۲ پولیس خوشې شوي چې تېره جمعه د نامعلومو وسلهوالو له خوا تښتول شوي وو. د مستونګ د پولیسو مرستیال مشر رفیق حمزه د هغوی د خوشې کېدو پخلی کړی خو دا یې نه دي ویلي چې پولیس څنګه او له کوم ځایه خوشې شوي دي.
د امریکا ولسمشر ډونالډ ټرمپ د ایلن ماسک له هغې ژمنې هرکلی کړی چې غواړي راتلونکی کال د سپېساېکس شرکت یوه ونډه د امریکا هر ماشوم ته ورکړي. ټرمپ ویلي، دا اقدام د «ټرمپ حسابونو» له لارې ماشومانو ته د پانګونې او د امریکايي خوب د یوې برخې د ترلاسه کولو زمینه برابروي.
د ایران د بهرنیو چارو وزیر عباس عراقچي، تهران ته د خپل روسي سیال سرګي لاوروف د سفر پر مهال له نوموړي سره په یوه ګډه خبري غونډه کې ویلي، تهران او مسکو د طالبانو او اسلاماباد ترمنځ د تاوتریخوالي د راکمولو پر اړتیا بشپړه هوکړه لري.
راپورونه ښیي چې د افغانستان او پاکستان ترمنځ سوداګري ۷۴ سلنه کمه شوې او له ۱،۳ میلیارد ډالرو ۳۵۸ میلیون ډالرو ته راټیټه شوې ده. په داسې حال کې چې د ډيورنډ کرښې تړل کېدو د پاکستان سوداګرو ته زیان اړولی، خو افغانستان خپلې سوداګریزې لارې د ایران او منځنۍ اسیا پر لور اړولې دي.
د طالبانو د زندانونو چارو د تنظیم ادارې چارواکو ویلي، چې د طالبانو مشر ملا هبتالله اخوندزاده ورته په سږني تشکیل کې د ۵۶۰ نورو ملایانو د ګومارنې امر کړی. ملا هبتالله تر دې مخکې، د پوهنې وزارت تر ۹۰ زرو پورې بستونه لغوه کړي او ګڼ ښوونکي یې په کور کړي وو.
له ایران سره د پاکستان د سوداګریزو لارو له بندېدو وروسته په دغه هېواد کې د اوبلنو ګازو د یوه کیلوګرام بیه په تېره یوه اوونۍ کې ۱۰۰ پاکستانۍ کلدارې لوړه شوې ده. د اوبلنو ګازو سوداګر وايي، له ۴۵۰۰ ټنو څخه پر زیاتو ګازو بار لارۍ د ایران په خاوره کې بند پاتې دی.
د تېر جمهوري نظام په مشرانو جرګه کې د افغان هندوانو او سېکانو استازې انارکلي هنر یار، د ازبکي ژبې د ملي ورځې په مناسبت ویلي، ازبکي ژبه د افغانانو د هویت او فرهنګ سمبول او زمونږ د نیکونو میراث دی.
د ایران د عدلیې وزیر امین حسین رحیمي، د قانوني اسنادو لرونکو افغان ماشومانو د رسمي زدهکړو د حق پر خوندیتوب ټینګار کړی او له اړوندو ادارو یې غوښتي چې ښوونځیو ته د دغو ماشومانو د لاسرسي پر وړاندې خنډونه لرې کړي.
د مصر ولسمشر عبدالفتاح السیسي د واتیکان د پاپ، څوارلسم لیو د بشپړې روغتیا هیله څرګنده کړې ده. نوموړي ویلي، چې پاپ په نړیوالې سولې، ثبات او زغم په ټینګښت کې مهم رول لري.
د پاکستان روغتیايي چارواکي وايي، د کراچۍ ښار د جمالۍ کالونۍ په سیمه کې د پولیو د یوې نوې پېښې له ثبتېدو سره په روان ۲۰۲۶ کال کې په ټول پاکستان کې د پولیو د مثبتو پېښو شمېر ۷ ته لوړ شوی دی. دا پېښه په یوه شپږ میاشتني ماشوم کې تایید شوې ده.
د ملګرو ملتونو سرمنشي خبرداری ورکړی چې د پرمختګونو سره سره د نړۍ د خوړو سیسټم تر سخت فشار لاندې دی.ګوترېش، خوړو ته لاسرسی د هر انسان بنسټیز حق ګڼلی او له نړیوالو یې غوښتي، چې د لوږې د ختمولو لپاره خپلې ژمنې عملي کړي.
د افغانستان د کرېکټ ملي لوبډلې د صدیقالله اتل د سلیزې، د ابراهیم ځدراڼ د ۹۰ منډو او د راشد خان د څلورو وېکټو په مټ زمبابوې ته په ۱۵۸ منډو ستره ماتې ورکړه او د درې اړخیزې یو ورځنۍ لوبلړۍ پیل یې په بریا وکړ.
د ایران له دولتي سرچینو سره تړلي، تسنیم خبري اژانس راپور ورکړی چې ټاکل شوې ده چې د پاکستان د پوځ مشر عاصم منیر د سېشنبې په ورځ تهران ته سفر وکړي. د دغه سفر په اړه تر اوسه پاکستاني او ایراني چارواکو رسمي تایید نه دی کړی.
د طالبانو د قبایلو چارو وزارت چارواکو ادعا کړې، چې خلکو په یوه غونډه کې، د دوی په واکمنۍ د خدای « شکر» ادا کړی او ویلي یې دي چې اوس د «ازادۍ» په خوند پوه شوي، خو فریډم هاوس سازمان، د ۲۰۲۶ راپور کې افغانستان د « غیر ازادو» هېوادونو په ډله کې د « تر ټولو ټیټ» مقام لرونکی ګڼلی.
د روسیې د بهرنیو چارو وزیر سرګي لاوروف وايي، د اوکراین ولسمشر ولودیمیر زیلینسکي نه غواړي له روسیې سره خبرې اترې وکړي. هغه پر زیلینسکي تور پورې کړ چې د خبرو اترو د بیا پیل لپاره د هیلو له رامنځته کېدو وروسته یې پر ملکي موخو بریدونه کړي.
د ملګرو ملتونو د ښځو اداره وايي، د سولې په ټینګښت کې د ښځو د مشرتابه لپاره پانګونه کمېږي او ښځې د سولې له خبرو څخه په زیاتېدونکي ډول لرې کېږي. په افغانستان کې هم د طالبانو له واک ته بیا رسېدو وروسته ښځې د سولې، امنیت او د هېواد د راتلونکي په اړه له مهمو پرېکړو څخه څنډې ته شوې.