ملګرو ملتونو اعلان وکړ چې د ۱۴۰۱ کال د مرغومي له ۱۱مې تر ۱۴۰۴ کال د مرغومي تر ۱۰مې نېټې پورې، په افغانستان کې ۱۴۱۵ ماشومانو ته مرګژوبله اوښتې ده. له دې ډلې، ۴۴۶ ماشومانو خپل ژوند له لاسه ورکړی او ۹۶۹ ماشومان ټپیان شوي دي.
د پاکستان د بلوچستان پولیسو ویلي چې په بارکهان ولسوالۍ په راړه شم سیمه کې د ۱۰ کسانو جسدونه موندل شوي دي. د پولیسو د معلوماتو لهمخې، یاد کسان په ډزو وژل شوي او جسدونه یې په دښته کې غورځول شوې وو.
د طالبانو د کورنیو چارو وزارت خبر ورکړی، چې د چاریکار ښار د اوومې امنیتي حوزې اړوند سیمه کې یې د څه باندې ۶۵۰ کیلوګرامه قیمتي لاجوردو د قاچاق مخه نیولې ده. د یاد وزارت په وینا، لاجورد په یوه موټر کې په ډېر مهارت ځای پر ځای شوې و او په تړاو یې دوه تنه هم نیول شوي دي.
اروپايي ټولنې توماس فریلېسن د افغانستان لپاره د خپل نوي ځانګړي استازي په توګه وټاکه. توماس فریلېسن تردې وړاندې په اوکراین کې د اروپايي ټولنې د پلاوي د مشر د مرستیالی تر څنګ نورې دندې هم ترسره کړي دي.
د ایران د انرژۍ وزیر عباس عليابادي ویلي کابل ته د سفر په ترڅ کې یې د طالبانو له وزیرانو سره د جلا جلا لیدنو پر مهال د دوه اړخیزو اقتصادي اسانتیاوو او د سوداګرۍ د ستونزو پر حل خبرې کړې د. علي ابادي ولي، تهران غواړو له کابل سره خپلې اقتصادي اړیکې لا پراخې کړي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی چې تېره ورځ ۱۶۳ کډوالې کورنۍ چې د غړو شمېر یې ۶۷۸ کسانو ته رسېږي، له پاکستان او ایران نه افغانستان ته جبري ستانه کړل شوي دي.
د هند پولیسو په نوي ډیلي کې د دغه هېواد د ټاکنو د کمېسیون د مشر پر ضد د پیل شویو پراخو لاریونو د مخنیوي په موخه د زرګونو امنیتي ځواکونه د ځای پر ځای کولو ترڅنګ لسګونه لاریونوال نیولي او پر ترانسپورټ او انټرنیټي خدماتو یې محدویتونه لګولي دي.
په کابل کې د امام ابوحنیفه پنځم ملي او نړۍوال نندارتون په څنډه کې، یوه افغان او اتریشي شرکت اروپا ته د افغاني غالیو د لېږد په برخه کې د اسانتیا هوکړه لاسلیک کړه. د دغه هوکړهلیک پر بنسټ، اتریشي لوری به د افغاني غالیو د طرحې، ډیزاین او بهرني بازارموندنې په برخو کې همکاري وکړي.
د جنوبي اوکراین په زاپوریژیا ښار کې د روسیې په هوايي برید کې لږ تر لږه اووه کسان وژل شوي او لس نور ټپیان دي. سیمهییز چارواکي وايي، برید د شنبې په سهار د ښار څو ځایونه په نښه کړي او د ژغورنې ډلې د کنډوالو لاندې د احتمالي قربانیانو په لټون بوختې دي.
د بنګلهدېش د کرېکټ ملي لوبډلې د افغانستان پر وړاندې د ابوظبۍ په ټېسټ لوبه کې په لومړۍ پاڼۍ کې د ټولو لوبغاړو په سوځېدو ۳۴۶ منډې جوړې کړې. د افغان لوبډلې توپاچوونکو د بنګلهدېش د پیاوړي پیل وروسته د هغوی د منډو بهیر ورو کړ او پرلهپسې یې ویکټې واخیستې.
د پاکستان په خیبر پښتونخوا کې د بیړني حالت یا ګورنر راج لګولو لپاره اداري چمتووالی بشپړ شوی او د دولتي او پولیسو د چارواکو د بدلون لېستونه هم چمتو شوي دي. د جیو ټيوي د دولتي سرچینو حواله ویلي، وروستۍ پرېکړه به د حکومت او اپوزیسیون ترمنځ د خبرو اترو له پایلو سره تړلې وي.
د طالبانو د کورنیو چارو وزارت وايي، د کابل ښار په نهمه امنیتي حوزه کې د قاضي پلازې په ودانۍ کې لګېدلی اور مهار شوی او د شاوخوا ۴۱ میلیونه افغانیو په ارزښت مالي شتمنۍ ژغورل شوې ده.
د رواني روغتیا نړۍواله ورځ سږ کال په داسې حال کې نمانځل کېږي چې ملګري ملتونه په افغانستان کې د لوږې، بېځایه کېدو، اقلیمي بدلونونو او د طالبانو د محدودیتونو له امله د افغانانو د رواني روغتیا په اړه اندېښنه څرګندوي.
د خیبر پښتونخوا په خیبر ولسوالۍ کې د تیرا درې د شاوخوا ۵۰ زره بېځایه شویو کورنیو د بېرته ستنېدو بهیر، چې ټاکل شوې وه د اکتوبر پر ۱۰مه پیل شي، د نامعلومې مودې لپاره ځنډول شوی دی. بې ځایه شوي وايي، حکومت پر خپلو ژمنو عمل نه دی کړی او د ځنډ کوم دلیل یې هم نه دی وړاندې کړی.
د بشري حقونو د څار سازمان وايي، په غزه کې د اوربند له پیل یو کال وروسته هم اسراییلي ځواکونه فلسطینیان وژني او ټپیانوي، بشري مرستې محدودې دي او د بیارغونې چارې لا نه دي پیل شوې. د سازمان په وینا، د اوربند له پیل راهیسې لږ تر لږه ۱۴ سوه کسان وژل شوي.
د طالبانو چارواکو په فاریاب کې د شمال پنځو ولایتونو ترمنځ د امنیتي همغږۍ د پیاوړتیا او په لویو لارو او ښارونو کې د امنیتي پوستو د معیاري کولو پرېکړه کړې ده. دا غونډه په داسې حال کې شوې چې د طالبانو مخالفې وسلهوالې ډلې په بېلابېلو ولایتونو کې د خپلو بریدونو خبرونه خپروي.
د طالبانو د کورنیو چارو وزارت وايي، په ۱۱ ولایتونو کې یې ۵۰ کسان د نشهیي توکو د پلور، کارونې او قاچاق په تړاو نیولي او په تخار ولایت کې یې په یوه شخصي امبولانس کې ۶۱۴ کیلوګرامه تریاک نیولي دي.
د بلوچستان ایالتي حکومت د عامه ترانسپورټ لپاره نوي امنیتي مقررات اعلان کړي دي. د دې پرېکړې له مخې، ناقانونه مېشتو بهرنیانو او په ځانګړي ډول افغانانو ته به د بس ټکټونه نه ورکول کېږي.
د افغانستان د سوداګرۍ او پانګونې خونه وايي، د امام ابوحنیفه د پنځم ملي او نړۍوال نندارتون په څنډه کې جوړې شوې غونډې کې د افغانستان او د سیمې د یو شمېر هېوادونو استازو د پانګونې پر فرصتونو او سوداګریزو همکاریو خبرې کړې دي.
خیبر پښتونخوا کې د واکمن ګوند تحریک انصاف یو ایالتي وزیر، ډاکټر امجد علي او د ایالتي اسمبلۍ غړی محمد اعظم خان د نامعلومو وسلهوالو له لوري له خپلو کورونو تښتول شوي دي.
د روغتیا نړیوال سازمان د رواني روغتیا د نړیوالې ورځې په مناسبت د افغانستان خلکو ته ډاډ ورکړی چې د رواني روغتیا د ښهوالي په برخه کې یوازې نه دي او ټینګار یې کړی چې د خلکو د کیسو اورېدل، پاملرنه او ګډ ملاتړ مهم دي.