د امریکا او د روسیې ولسمشرانو په یوې ټیلیفوني اړیکه کې د اوکراین د کړکېچ د حل پر لارو چارو او همدارنګه د ایران د وضعیت په اړه خبرې کړې دي. د روسیې ولسمشر ولادیمیر پوتین په دې ټېلیفوني اړیکه کې ویلي، چې چمتو دی د امریکا او نړۍ بازارونو ته خام تېل او د نفتو نور تولیدات صادر کړي.
بلومبرګ د یوه راپور په خپرولو سره وايي، چې د سعودي عربستان ارامکو شرکت د اروپا د تېلو تصفیهخونو ته خبر ورکړی، چې په نومبر میاشت کې به د هغوی ټول غوښتل شوي خام تېل ورته چمتو کړي. دا پرېکړه د سعودي عربستان د «ختیځ پر لوېدیځ» نللیکې د فعالیتونو له بیا پیلېدو وروسته شوې ده.
د بشري حقونو د څار او د بښنې نړیوال سازمانونو د جرمونو پر نړیوالې محکمې د امریکا د ولسمشر ډونالډ ټرمپ د حکومت نوي بندیزونه په کلکه غندلي او دا کار یې د نړیوال عدالت او د قانون د حاکمیت پر وړاندې یو بېساری برید بللی دی. دغې محکمې د ۴ طالب چارواکو د نیولو حکمونه هم صادر کړي.
له افغان شخصیتونو سره د اړیکو کمېسیون مشر شهابالدین دلاور د طالب ځواکونو شمېر شاوخوا ۵۰۰ زره یاد کړ او په تلویحي ډول یې پرې وسلهوال مخالفان وګواښل. دلاور د مخکیني ولسمشر غني په اړه وویل، هېواد ته د ستنېدو لپاره رسمي بلنه نهورکوي، خو که په خپله خوښه راستون شي «خوندي» به وي.
د خیبرپښتونخوا د اعلی وزیر سهېل اپریدي په مشرۍ د تحریک انصاف ګوند اوږد لاریون د جمعې په ماښام (د تلې ۱۷مه) چارسدې ولسوالۍ ته ورسېد. سهېل اپریدي خپلو پلویانو ته په وینا کې وویل، چې د ټول پاکستان کاروانونه به د اکټوبر پر ۱۱مه او ۱۳مه په «صوابۍ انټرچېنج» کې سره یو ځای شي.
د ناروې د کډوالو شورا وايي، د کونړ د زلزلې له پېښې یو کال وروسته هم زیانمنې کورنۍ د خپلو کورونو د بیا جوړولو او د څښاک پاکو اوبو ته د لاسرسي لپاره مرستو او ملاتړ ته اړتیا لري. د دې شورا په وینا، ډېری زیانمن شوي کسان لا هم په خېمو او لنډمهالو سرپناهځایونو کې ژوند کوي.
پاکستان او ترکیې د ترهګرۍ، د نشهيي توکو د قاچاق او سازمانشویو جرمونو پر ضد د مبارزې په برخه کې د همکاریو د پراختیا لپاره یو تړون لاسلیک کړ. دغه تړون نن (جمعه د تلې ۱۷مه) په استانبول کې د پاکستان د کورنیو چارو وزیر مُحسن نقوي او د ترکیې د کورنیو چارو وزیر مصطفی چیفتچي لاسلیک کړ.
د خیبر پښتونخوا والي فیصل کریم کنډي ادعا کړې، چې افغانستان د هند او اسراییل پر مرکز بدل شوی او تور یې ولګاوه، چې تحریک انصاف ګوند د افغانستان په وضعیت او له هغې خوا د بریدونو په تړاو پټه خوله دی. هغه ادعا وکړه، چې ایالتي حکومت د ترهګرۍ پر وړاندې هېڅ څرګنده تګلاره نهلري.
د نړۍ ستر میلیاردر اېلان ماسک په هند کې د خپلې سپوږمکۍ انېټرنټي شبکې سټارلېنک د فعالیتونو لپاره د هڅو پر مهال د دغه هېواد د مخابراتي بازار پر وضعیت توندې نیوکې کړې دي. هغه د هند پر مخکښ صنعتکار موکېش امباني نیوکه وکړه او په طنزیه بڼه یې هغه ته د «لومړي وزیر امباني» خطاب کړی دی.
په ایټالیا کې د افغانستان سفیر خالد ذکریا د افغانستان په اړه د مسکو فارمټ ناسته کې د طالبانو او پاکستان اختلافونه او له همدې امله، له ګډې اعلامیې پرته د ناستې پای ته رسېدو ته په اشارې سره ویلي، چې د سیمهییزو ګټو تضاد په افغانستان کې د نیابتي سیالیو خطر رامنځته کړی دی.
د جرمونو نړیوالې محکمې پر دغه بنسټ د امریکا له لوري لګول شوي نوي بندیزونه په کلکه غندلي او دا کار یې د عدالت پر وړاندې ښکاره خنډ بللی دی. دغې محکمې اعلان وکړ، چې دا بېسارې پرېکړه د عدالت د پلي کېدو د لارې د بندولو او د قانون د حاکمیت د زیانمنولو لپاره شوې ده.
لوړپوړی طالب چارواکی شهاب الدین دلاور ادعا کوي، چې افغانان او په ځانګړي ډول پښتانه په مجلسونو کې د ښځو یادونه نهکوي. د هغه په خبره، له همدې امله دوی په دوحې تړون کې له پيله تر پایه، یو ځل هم د ښځو یادونه نهده کړې.
د یمن دولت بهرنیو چارو وزارت د ملک خالد پر نړیوال هوايي ډګر او د سعودي پر یوې مسافر وړونکې الوتکې د یمن د یاغي وسلهوالو له بریدونو وروسته، له امنیت شورا وغوښتل چې د دغو بریدونو د درولو او له ایران څخه یادو وسلهوالو ته د وسلو د استولو لارو د بندولو لپاره پرېکنده اقدام وکړي.
په مسکو کې مېشت امریکايي سیاسي شنونکی انډریو کوریبکو په یوې نوې مقاله کې څرګنده کړې، چې د پاکستان په اړه د طالبانو لیدلوری او دریځ په بشپړه توګه ناسم نهدی او یو څه ريښتینولي لري.
د خیبر پښتونخوا په مانسهره ولسوالۍ کې پولیسو د یوې ۱۸ کلنې نجلۍ او ۲۷ کلن ځوان د غیرت په نوم وژنې په تور د هغوی دوه وروڼه نیولي دي. پولیس وايي، دغه وژنې د یوې سیمهییزې جرګې د پرېکړې پر بنسټ ترسره شوې دي.
د افغانستان د ملي راډیو ټلویزیون پخواني رییس اسماعیل میاخېل ویلي، طالبانو افغانستان له یوه ستر ناورین سره مخ کړی. هغه زیاتوي، که حامد کرزي او عبدالله عبدالله په کابل کې د دوی پر وړاندې سیاسي دریځ نهشي نیولای، د حکمتیار په شان دې له هېواده بهر او ورته دریځ ونیسي.
جاپانۍ رسنۍ «نیکي اسیا» وايي، د طالبانو او پاکستان ترمنځ د نښتو دوام او د دواړو لورو ترمنځ د تاوتریخوالي د کمولو لپاره د چین د منځګړیتوب ناکامي، د افغانستان امنیتي وضعیت پېچلی کړی دی. دې رسنۍ خبرداری ورکړی، چې د اوسني وضعیت دوام افغانستان کې د کورنۍ جګړې د پیلېدو خطر زیاتولی شي.
د اتریش د کورنیو چارو وزارت ویلي چې په ویانا کې یې څلور اوکراینیان د جاسوسۍ په تور نیولي دي. د اتریش رسنیو راپور ورکړی چې د نیول شویو کسانو په ډله کې دوه خبریالان هم شامل دي.
د افریقا د یوې ښځینه قاضي له خوا د ۲۰۲۶ کال د نوبل سولې جایزې له ګټلو څو ساعته وروسته، د امریکا د جرمونو پر نړیواله محکمه نوې بندیزونه ولګول.
د بښنې نړیوال سازمان وايي، د ترهګرۍ ضد قانون تعدیل چې د ۲۰۲۶ کال د اګسټ پر ۳۱مه د پنجاب ایالتي اسامبلۍ له خوا تصویب شو، په پاکستان کې پر عادلانه محاکمه او د حقونو پر خوندیتوب یو ښکاره برید ګڼل کېږي.
د خیبرپښتونخوا په سوات ولسوالۍ کې په لومړي ځل د بڼوالو او ځايي چارواکو له لوري د املوکو ځانګړی نندارتون جوړ کړی. چاروکو ویلي، چې له یاد نندارتون څخه یې موخه د املکو د حاصلاتو زیاتوالی او بهرنیو هېوادونو ته د صادراتو د لار هوارول دي.