د پاکستان حکومت وایي، له افغانستان سره د لارو تړل پاتې کېدو او د منځني ختیځ د کړکېچ له امله د سمندري لارو د ګډوډېدو له کبله دغه هېواد په سوداګرۍ او ټرانزیټ برخه کې له ۱.۴ مېلیارد ډالرو ډېر زیان لیدلی دی.
د طالبانو د کورنیو چارو وزارت د نشهيي توکو په وړاندې د مبارزې ادارې خبر ورکړی، چې په ۹ ولایتونو کې یې ۵۰ کسان د «نشهيي توکو د پلور، استعمال او قاچاق» په تور نیولي دي. یاد وزارت ویلي، چې ۱۲ نور کسان یې بیا د بېلابېلو «جنايي جرمونو» په تور نیولي دي.
د بېځایه شویو نړۍوال سازمان وایي، له زرو ډېر افغان متحدین چې پهکې تر ۴۰۰ډېر ماشومان هم شامل دي؛ لاهم په قطر کې بندپاتې دي. د یاد سازمان په وینا؛ دغه افغانان بېرته افغانستان ته د ستنېدو او یا هم داسې هېوادونو ته د تلو له سخت انتخاب سره مخ دي، چې له بېثباتۍ سره لاس او ګرېوان دي.
د کندوز یو اوسېدونکی چې د طالبانو په زندان کې بندي وو؛ له زندانه تر خوشې کېدو وروسته یې افغانستان انټرنشنل ته ویلي، چې د طالبانو زندانونه له بېګناه وګړو ډک دي او طالب استخبارات ترې بډې اخلي.
د اوکراین ولسمشر ولادیمیر زېلېنسکي له امریکا غوښتنه کړې، چې د کیف د دفاعي زېرمو د کمښت جبران لپاره دې نور د پيټریوټ توغندیز دفاعي سیسټمونه ورواستوي. هغه ویلي، چې روسیې په یوه شپه پر اوکراین ۷۳ توغندي او له ۶۰۰ ډېر ډرونونه توغولي دي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې د سېشنبې په ورځ له بېلابېلو لارو ۲زره او ۷۹۷ کډوال افغانستان ته ستانه شوي دي. د یاد کمېسیون د راپور له مخې؛ همداراز پر ۷۵۳ تازه ستنو شویو کورنیو د استوګنې نمرې وېشل شوې دي.
د طالبانو د نشهيي توکو پر وړاندې د مبارزې مرستیال عبدالرحمان منیر په کابل کې د ملګرو ملتونو د نشهيي توکو او جرمونو پر وړاندې د مبارزې ادارې له مشر پولیک اوک سره په لیدنه کې غوښتنه کړې، چې نړۍوال سازمانونه باید د نشهيي توکو پر وړاندې مبارزه د سیاسي موخو قرباني نهکړي.
د خېبر پښتونخوا ایالت د تحریک انصاف ګوند د اسمبلۍ یوشمېر غړو د ګوند له مشرتابه غوښتي، چې له زندانه د پاکستان د پخواني لومړي وزیر عمران خان د خلاصون لپاره دې یوه منظمه او اغېزناکه تګلاره جوړه کړي.
د کابل ښار د بېلابېلو سیمو اوسېدونکي وایي، چې له تېرو ۴ کلونو راهیسې د څښاک اوبو له سخت کمښت سره مخ دي او ډېر مهال د اوبو راوړلو لپاره اوږده مزلونه کوي؛ خو طالبان بیا وایي، کابل ته د شاتوت بند او پنجشېر سیند څخه د اوبو رسولو پلان لري، چې یو څه وخت ته اړتیا لري.
د طالبانو ویاند ذبیحالله مجاهد وايي، له مسکو سره د پوځي او تخنیکي همکاریو تړون د هېڅ کوم هېواد پر ضد نهدی؛ بلکې موخه یې د افغانستان دفاعي او امنیتي وړتیا پیاوړې کول دي او په دې اړه اندېښنې بېبنسټه دي.
په پکتیا کې د طالبانو د پېښو پر وړاندې د مبارزې او چمتووالي رییس مولوي نثار احمد نجات وایي، چې د دغه ولایت په روحانيبابا ولسوالۍ کې د پخواني ناچاوده ماین د چاودنې له امله دوه ماشومان وژل شوي دي.
د پاکستان د بلوچستان ایالت په بېلابېلو سیمو کې د جلا، جلا پېښو له امله اته کسان وژل شوي دي. د راپورونو له مخې؛ یوازې د عبدالله کلا ولسوالۍ د مېزي اډې په سیمه کې د قبایلي شخړې له امله د ډزو په پېښه کې دوه کسان وژل شوي دي.
په هرات کې د طالبانو تر واک لاندې د کرنې، اوبو لګولو او مالدارۍ ریاست وایي، چې سږکال په دغه ولایت کې د ۲۰زره ټنه کچالو حاصلاتو راټولولو اټکل شوی. د یاد ریاست د محصولاتو خونې مدیر امید تیمور زیاتوي، چې په ټول هرات کې پر ۱۳۰۰ هکټاره ځمکه کچالو کرل شوي دي.
په لغمان کې د طالبانو د کور او ښار جوړولو رییس مولوي حسین احمد تیلوي وایي، چې په دغه ولایت کې له ګاونډیو هېوادونو تازه ستنو شویو کورنیو ته د استوګنیزو نمرو د وېش لړۍ روانه ده او تر دې مهاله پر ۳زره او ۱۶۴ کورنیو نمرې وېشل شوې دي.
افغانستان د لوبو په ډګر کې د نړۍوالو سیالیو په کچه یوه بله بریا هم تجربه کړه. افغان لوبغاړي حدیث حفیظي د جرمني په برلین ښار کې د «ICL Fight Night» د یوې برخې په توګه د IPA Combat League سیالۍ کې د خپل ترکي سیال په ماتولو د ۶۶ کیلوګرامه وزن په کټګورۍ کې د اتلولۍ کمربند وګاټه.
د امریکا د بهرنیو چارو وزارت ویاند ټامي پیکوټ د اسراییل او لبنان د سیاسي او امنیتي پلاوي ترمنځ د مستقیمو خبرو اترو څلورم پړاو ته په اشارې وویل، چې خبرې اترې د پرمختګ او پراخ تړون لپاره روانې دي. د نوموړي په خبره؛ د دغه خبرو اترو بل پړاو به د چهارشنبې په ورځ ترسره شي.
د افغان کډوالو پر وړاندې د فشارونو پر دوام، د بلوچستان ایالت د سیفالله کلا ولسوالۍ ځایي ادارې په خبرپاڼه کې راغلي، هغه کسان دې (د غبرګولي ۱۳مه) د مرستیال کمېشنر دفتر کې ځانګړې غونډه کې ګډون وکړي چې د پاکستاني پېژندپاڼو معلومات یې د افغان کډوالو له ثبت شویو معلوماتو سره ورته دي.
په یوه پرانیستي لیک کې ۸۳ افغان او نړۍوالو بشري حقونو سازمانونو له اروپايي ټولنې غوښتي، چې د طالبانو له استازو سره له هر ډول ډیپلوماټیکو اړیکو ډډه وکړي. دغه بنسټونو خبرداری ورکړی، چې دغه ډول تعاملات کولای شي د طالبانو د عادي کېدو او مشروعیت لامل شي.
د امریکا مرکزي قومندانۍ (سينټکام) ويلي، امریکایي ځواکونو د جون پر دويمه په منځني ختیځ کې د ايران د بریدونو په غبرګون کې، څو بالستیک توغندي او ډرون الوتکې په بریالیتوب سره له منځه وړي او د قشم په ټاپو کې یې د ځان په دفاع کې بریدونه ترسره کړي.
د روغتیا نړیوال سازمان د سېشنبې په ورځ اعلان وکړ چې د کانګو ډیموکراتیک جمهوریت کې د ایبولا ناروغۍ د خپرېدو له پیل راهیسې د دې ناروغۍ ۳۲۱ تایید شوې او ۱۱۶ شکمنې پېښې ثبت شوې دي. د دې سازمان د شمېرو له مخې، تر اوسه ۴۸ کسان له دې وبا څخه مړه شوي دي.
د ملګرو ملتونو د ښځو څانګې ویلي، چې د طالبانو او پاکستان ترمنځ د نښتو او د تاوتریخوالي د زیاتېدو له امله د افغانستان په ختیځو سیمو کې څه باندې ۱۰۰ زره کسان بېځایه شوي دي.