د ډونالډ ټرمپ حکومت د ۲۰۲۷ مالي کال لپاره د امریکا د پناه غوښتونکو د منلو شمېر ۱۷ زره او ۵۰۰ ټاکلی دی. د رسمي سند پر بنسټ، د پناهغوښتونکو د منلو ډېره برخه یې هم «سویلي افریقا» ته ځانګړې شوې او د افغانانو لپاره پهکې روښانه ونډه په پام کې نهده نیول شوې.
د پاکستان د طبیعي پېښو او ژغورنې اداره وایي، چې د خیبر پښتونخوا په کرک ولسوالۍ کې په یوه کور کې د ګازو ډبې چاودنې له امله یوه ښځه او دوه ماشومان مړه شوي او ۱۰ نور ټپیان شوي دي. د ژغورنې ډلو ټپیان او مړي له کنډوالو را اېستلي او روغتون ته یې لېږدولي دي.
د خوړو نړیوال پروګرام ویلي چې په یمن کې د جګړو د زیاتېدو له امله په ځینو سیمو کې له هرو څلورو کورنیو درې یې کافي خواړه نه لري. یادې ادارې ویل چې جګړو لسګونه زره کسان بېځایه کړي او میلیونونو خلکو ته یې د توکو رسونه ګډوډه کړې ده.
په اروپا پارلمان کې د سوسیالیستانو او ډیموکراتانو ډلې، د جرمونو نړۍواله محکمه او د دې بنسټ چارواکي د فکر د ازادۍ لپاره د ۲۰۲۶ کال د ساخاروف جایزې ترلاسه کولو ته نوماند کړي. دا ډله وایي، چې دې محکمې د نسل وژنې، جنګي جنایتونو او د بشریت پر ضد جنایتونو عاملان له فشار سره مخ کړي.
د فرانسې په بېلابېلو ښارونو کې د ښوونځیو د درسي شرایطو او د تعلیم د بودیجې پر سر د زده کوونکو لاریونونه د جمعې په ورځ له پولیسو سره په نښتو اوښتي دي. د یادو لاریونونو او نښتو له امله ۴۰۰ لیسې تړل شوې ۶۵ ښوونیز کارکوونکي ټپیان شوي دي.
د پاکستان د بهرنیو چارو وزیر اسحاق ډار ویلي چې د لارو تړل کېدو له امله د پاکستان په پرتله افغانستان ته د اقتصادي زیان رسېدو کچه ډېره لوړه ده.
د تېر جمهوري نظام د ملي امنیت د سلاکار حمدالله محب تر مشرۍ لاندې د اماراتو لومړنۍ په کور دننه جوړه شوې تجارتي سپوږمکۍ «التایر-۱» د امریکا له نه کالیفورنیا فضا ته وتوغول شوه. دا سپوږمکۍ د ځمکې د څارنې لپاره د ۱۰ سپوږمکیو د شبکې لومړۍ برخه ده.
د اکټوبر دویمه د عدم تشدد نړۍواله ورځ ده، خو د پښتنو او افغانانو په پراخه جغرافیه کې له افغانستانه تر خیبر پښتونخوا او بلوچستانه پورې، لا هم جګړې، پوځي عملیاتو، بمبارۍ، ترهګرۍ او سیاسي تاوتریخوالی موجود دی. ایا پښتانه په طبیعي ډول متشدد دي، که تاریخ او سیاست هغوی متشدد کړي دي؟
د کابل د سروبي ولسوالۍ یوه اوسېدونکي شکایت کړی چې د دې ولسوالۍ لپاره د طالبانو د برېښنا شرکت د مرستیال د زوی په واده کې له دوو ورځو راهیسې پټاقۍ چاودول کېږي او د مرکزي بازار د خلکو ارام یې ګډوډ کړی دی.
د پاکستان د پوځ د قول اردو قوماندانانو د عاصم منیر په مشرۍ د امنیتي وضعیت ارزونې په اړه ناسته کړې او له افغان خاورې څخه یې د ترهګریزو بریدونو پر دوام اندېښنه ښودلې. د پاکستان پوځ خبرداری ورکړی چې د افغانستان له خاورې د پېښېدونکو بریدونو مسولیت د طالبانو د رهبرۍ پر غاړه دی.
د طالبانو د کرنې وزارت وايي، د تېرکال په پرتله سږ کال د زعفرانو تولید ۴۱ سلنه زیات شوی دی او په روان کال کې د ۷۷ میلیونه ډالرو په ارزښت زعفران بهرنیو هېوادونو ته صادر شوي دي.
د پاکستان د بهرنیو چارو وزیر اسحاق ډار ویلي چې د د ملګرو ملتونو سرمنشي انتونیو ګوتریش پاکستان ته د سفر لپاره د دغه هېواد د لومړي وزیر بلنه منلې ده او ډېر ژر به اسلام اباد ته سفر وکړي.
د لیتوانیا سرحدي ځواکونو ۳۵ پناه غوښتونکي د بلاروس له پولې تر اوښتو وروسته نیولي دي. د لیتوانیا سرحدي ځواکونو ویلي چې نیول شویو کسانو ځانونه افغان او عراقي وکړي معرفي کړي دي.
د ترکیې د پارلمان غړې سویلاي چلنک اوزن د دغه هېواد د بهرنیو چارو وزیر هاکان فیدان غوښتي، چې له افغانستان نه د جانسو بادور د خوندي بېرته ستنولو لپاره اقدام وکړي. د بادور کورنۍ وايي، نوموړې په کابل کې په زور ساتل کېږي او له تاوتریخوالي سره مخ ده.
د خیبر پښتونخوا پولیسو ویلي چې په بنو ولسوالۍ کې د ملکي وګړو پر موټر د ماین په چاودنه کې څلور کسان وژل شوي دي. پولیسو ویلي چې یاد کسان د وسله والو له لوري د نورو یرغمل شویو کسانو د ژغورلو پر مهال د سړک غاړې ماین چاودنې ښکار شوي دي.
د طالبانو د کندهار والي رسنیز دفتر د پاکستان د پوځ د ویاند هغه ادعا رد کړه، چې کواګې ملا شیرین او بهرنیو جنګیالیو ترمنځ ناسته شوې ده. طالبانو ویلي چې د پاکستان نظامي کړۍ د دا ډول ادعاوو له لارې هڅه کوي په افغانستان کې د ملکي وګړو وژنه او خپل نور جنایتونه توجیه کړي.
د طالبانو د اطلاعاتو او کلتور وزارت د خپرونو مرستیال مهاجر فراهي د کوم هېواد او ډلې له نوم یادولو پرته ویلي چې د افغانستان «غلیمان» هڅه کوي دا هېواد یو ځل بیا په نویو جګړو کې ښکېل کړي.
حالوش سیمهییز اژانس راپور ورکړی چې د ایران د زاهدان په رودماهي سیمه کې د وسله والو په برید کې د فاطمیون ډلې پنځه غړي وژل شوي دي. دا پېښه نن سهار رامنځته شوې، د فاطیمون پر موټر لومړۍ ماین چاودنه شوې او ورسته پرې ډزې شوې دي.
د ملګرو ملتونو د خوړو او کرنې سازمان وايي، د لوژستیکي ستونزو او موسمي اندېښنو له امله د غلو دانو بازارونه اغېزمن شوي، چې له امله یې په سپټمبر کې د خوراکي توکو نړیوالې بیې په نږدې تېرو څلورو کلونو کې خپل تر ټولو لوړ کچې ته رسېدلي دي.
په پاکستان کې افغان محصلین د تحصیلي ویزو د نه ورکړې او په پنجاب کې له طبي پوهنتونونو د اېستلو له امله له جدي ستونزو سره مخ دي. له دې سره سږکال په پښتونخوا کې افغان محصلینو ته داخله نهده ورکړل شوې.
د افغانستان د غېږنیونې ملي لوبغاړي عمر ځاځي د ناګویا اسیایي لوبو د ۶۵ کیلوګرامه وزن په کټګورۍ کې د دویم چانس سیالۍ کې د ایران له استازي عباس ابراهیمزاده سوادکوهي څخه د ۱۵-۵ امتیازونو په توپیر ماتې وخوړه او له سیالیو بهر شو.