د طالبانو د بهرنیو چارو وزارت د بروکسل په ناسته کې له اروپايي هېوادونو غواړي، چې لږترلږه هر هېواد د طالبانو یو ډیپلوماټ ومني او په بدل کې به یې دوی د افغان پناه غوښتونکو د اخراج په بهیر کې له اروپايي هېوادونو سره مرسته کوي. د بروکسل ناسته په راتلونکې میاشت کې کیږي.
چین غواړي د طالبانو او پاکستان ترمنځ د ارومچي د تېرې غونډې په دوام ددغه بهیر دویمه غونډه هم جوړه کړي. د افغانستان لپاره د چین ځانګړي استازي د دویمې غونډې لپاره د زمینې برابرولو کار لا له وړاندې پیل کړی. هغه دا موضوع د همدې میاشتې په پیل کې کابل ته د سفر پر مهال مطرح کړې ده.
د کندهار اوسېدونکي وایي، سږ کال یو ځل بیا د طالبانو د امربالمعروف محتسبینو سخت دریځو اقداماتو د خلکو اختر په وېره او فشار بدل کړی دی. دوی وايي، د اختر په شپه طالبانو لسګونه ځوانان او سلمانیان د ږېرو او وېښتانو جوړولو او سندرو اورېدو په تور نیولي او ګواښلي دي.
د سپاه پاسداران د سمندري ځواکونو مرستیال مشر محمد اکبرزاده وایي، امریکا د هرمز تنګي په پرانیستلو کې «ستراتیژیکه ماته» خوړلې ده. هغه زیاته کړې: «دوی ادعا کوله چې کولای شي د هرمز تنګی پرانیزي؛ خو د یادې لویې لارې له بندښت وروسته دوی په ټول ځواک سره هیڅ هم ونشو کړای».
د طالبانو د بهرنیو چارو وزیر امیرخان متقي او د یادې ډلې د کډوالو او بېرته راستنېدونکو چارو وزیر مولوي عبدالکبیر یو وار بیا د اختر لمونځ جلا په سپېدار ماڼۍ کې ادا کړ، چې له ارګ سره شریک دېوال لري.
په کندهار کې د طالبانو د مشر ملاهبت الله اخوندزاده د اختریزې وینا ټوله برخه پر اطاعت، امر منلو، د خپلمنځي اختلافاتو په لهمنځه وړلو او یووالي ورټوله وه. نوموړي ویلي: «که یو سړی مړ شي او د یو امیر سره بیعت ونه لري، د امیر په اطاعت کې نهوي نو د دې سړي مرګ د جاهلیت مرګ دی».
د لبنان روغتیا وزارت وايي، د سېشنبې په ورځ د لبنان پر سویلي سیمو د اسراییل په هوايي بریدونو کې لږترلږه ۳۱ کسان وژل شوي او شاوخوا ۴۰ نور ټپیان دي. د راپورونو له مخې؛ دغه بریدونه د برج الشمالي، کوثریه الرز، حبوش، معرکه او سلع په ښارګوټو او کلیو شوي دي.
د طالبانو رییس الوزرا ملاحسن اخوند په خپل اختریز پيغام کې د کډوالو او اړمنو کسانو د لاسنیوي غوښته کړې ده. د هغه په وینا؛ په دې وروستیو کې په مېلیونونه کډوال له ګاونډیو هېوادونو ستانه شوي او یا د ځینو پېښو له امله یوشمېر خلک له خپلو سیمو بېځایه شوي دي.
د جوزجان یوه اوسېدونکي افغانستان انټرنشنل ته ویلي، طالبانو خلکو ته اجازه نهده ورکړې چې د خپلې سیمې جوماتونو کې د اختر لمونځ ادا کړي چې دغه چاره د پراخې ګڼېګوڼې لامل شوې. د هغه په وینا؛ په تېرو کلونو کې د دغه ولایت اوسېدونکو د لوی اختر لمونځ د خپلې سیمې په جوماتونو کې ادا کاوه.
د فلسطین روغتیايي چارواکي وایي، چې پر غزې د اسراییل په هوايي بریدونو کې لږترلږه اووه فلسطینیان وژل شوي دي. یوازې په مرکزي غزه کې د کډوالو پر پنډغالي د ډرون برید له امله لږترلږه پنځه کسان وژل شوي او یوشمېر نور ټپیان دي.
د امریکا د بهرنیو چارو وزارت ویاند ټامي پیګوټ وایي، چې ټرمپ د تهران د اټومي پروګرام پر وړاندې پرېکنده اقدام کړی. هغه پر اېکس خواله رسنۍ لیکلي: «له لومړۍ ورځې راهیسې ولسمشر ټرمپ دا روښانه کړې، چې ایران نهشي کولی اټومي وسله ترلاسه کړي».
د افغانستان پخواني ولسمشر حامد کرزي په خپل اختریز پیغام کې یو وار بیا د نجونو پرمخ د ښوونځیو او پوهنځیو د دروازو پرانیستلو غوښتنه وکړه. هغه وایي، افغانستان ابادۍ او پرمختګ ته اړتیا لري؛ خو پرمختللي او هوسا ژوند ته د رسېدو لپاره باید «متحد او لوستی ملت واوسو».
په جوزجان کې د طالبانو د امنیې قوماندانۍ ویاند عبدالستار حلیمي خبر ورکړی، چې د دغه ولایت د شبرغان–سرپل پر لویه لار د یوې ټرافیکي پېښې له امله شپږ کسه مړه او څلور نور ټپیان شوي دي.
د تېر جمهوري نظام پرمهال د کورنيو چارو وزیر عبدالستار ميرزکوال په خپل اختریز پیغام کې ویلي، چې تر نیمايي زیات افغانان د بېوزلۍ، لوږې او سختو محدودیتونو تر سیوري لاندې اختر نمانځي.
د بنفشه هاشمي په ګډون د کرېکټ افغان ښځینه لوبغاړې وايي، سره له دې چې له افغانستان نه جلاوطنه شوې او لاهم په نړۍواله کچه په رسمیت نهدي پېژندل شوې؛ د کرېکټ لپاره یې هیلې او مبارزه نهده کمزورې شوې.
د افغانستان سوداګر او مرستندویه ټولنې وايي، د هرمز تنګي کړکېچ او له پاکستان سره د لارو تړل پاتې کېدو ستونزو له امله د افغانستان سوداګري او بشري مرستې له جدي خنډ سره مخ شوې دي.
په کندهار کې له نن سهار ۶ بجو راهیسې د لوی اختر لمانځه لپاره د مخابراتي شبکو فعالیت او انټرنېټ پرې شوی. د طالبانو ځایي امنیتي سرچینو هم ویلي، چې دغه اقدام په هر اختر کې د امنیتي تدابیرو لپاره ترسره کوي.
د لوی اختر له رارسېدو سره هممهاله په کندهار ښار او شاوخوا سیمو کې کلک امنیتي تدابیر نیول شوي او زرګونه خلک د اختر د لمانځه ادا کولو لپاره جوماتونو او لویې عیدګاه ته روان دي.
د پاکستان په قامي اسمبلۍ کې د اپوزېسیون مشر محمودخان اڅکزي ویلي، که د پاکستان پخواني لومړي وزیر عمران خان پر ضد روان چلند همداسې دوام وکړي او هغه ته درنې سزاګانې واورول شي؛ نو سیاسي کړکېچ به نور هم ژور شي.
د طالبانو د احصایې او معلوماتو ادارې ویاند محمد حلیم رافع خبر ورکړی، چې د یادې ډلې له بیا واکمنېدو راهیسې یې په ټول افغانستان کې تر ۱۱.۶ مېلیونه ډېرې برېښنایي پېژندپاڼې وېشلې دي. د هغه په وینا؛ دامهال په ټول افغانستان کې ۸۷ څانګې د برېښنا د وېش فعالیتونه پرمخ وړي.
نړۍوال بانک په خپل میاشتني راپور کې ویلي، د افغانستان اقتصاد سره له دې چې محدوده وده کړې؛ خو لاهم له جدي ننګونو سره مخ دی. د دغه سازمان په وینا؛ د نفوس او انفلاسیون زیاتوالي او د بهرنیو مرستو کمښت د خلکو پر معیشت فشار زیات کړی او د خلکو د ژوند کچه یې کمزورې کړې ده.