د جمعیت علمای اسلام پلویان وایي، د دغې سترې جرګې موخه دا ده چې د پښتون مېشته سیمو مشران په دې سره وغږیږي چې ولې د دوی په سیمو کې ترهګریز بریدونه زیات شوي او څنګه کولای شي چې د دغه شان بریدونو په مخنیوي کې خپلو سیمو ته امن او ټيکاو راولي.
د جمعیت علمای اسلام ګوند دغه جرګه تر هغې وروسته وربللې چې د جولای پر ۳۰مه نېټه د باجوړ په ځانمرګي برید کې د هغوی ۶۳ تنه پلویان وژل شوي او نژدې دوه سوه نور کسان یې ټپيان شوي وو. د هغه برید پړه هم د داعش ډلې منلې وه.د دغه ګوند پلویان وایي، چې دغې جرګې ته د ټولو ګوندونو پلویان او پښتانه مخور وربلل شوي، چې د راتلونکې لپاره د حل لاره په ګوته او د دغسې بریدونو لپاره نوې تګلارې رامنځته.په داسې حال کې چې لا هم په پېښور کې دغه غونډه روانه ده، او لا یې د رابرسېره کېدونکو پایلو په اړه څوک څه نه شي ویلای، خو په اسلام اباد کې یو شمېر خبریالان او سیاسي شنونکي وایي، هغه شان چې له دغې غونډې د جمیعت علمای اسلام ګوند تمه لري، ښایي یو شمېر ګوندونه او قامي مشران په هغې کې له برخې اخیستلو ډډه وکړي.
