ځایي سرچینې وايي، چې د پاکستان د بلوچستان صوبې په کوټه ښار کې د پاکستاني بېرغونو یوه پلورنځي او یوې لاسي کراچۍ ته لاسي بمونه ورغورځول شوي، چې له امله یې د دوو پولیسو په ګډون لس تنه ټپیان دي.
د کوټې پولیس وايي، چې لومړۍ پېښه تېره ورځ د کوټې پر جواینټ روډ شوې؛ چېرې چې پر یوې لاسي کراچۍ د پاکستان بېرغونه پلورل کېدل.
پولیس وايي، چې د لاسي بم په دغه چاودنه کې د دوو پولیسو او یوې مېرمنې په ګډون شپږ تنه ټپیان شوي دي او بم غورځونکی د پېښې له ځایه تښتېدلی دی.
دویمه پېښه نن پنجشنبه د کوټې د ګلونو په بازار د پاکستاني بېرغونو په یوه پلورنځي کې رامنځته شوې ده، چې له امله یې څلور تنه ټپیان شوي دي.
د کوټې پولیس؛ ځایي رسنیو ته پېښه تاییدوي او وايي، چې نامعلومو وسلوالو د پاکستاني بېرغونو دوکان ته لاسي بم ورغورځولی او په خپله له سیمې څخه تښتېدلي دي.
تر اوسه پورې د دغو دواړو پېښو مسوولیت چا پر غاړه نه دی اخیستی.
د اګسټ څوارلسمه د پاکستان د ازادۍ ورځ ده، له همدې امله په بازار کې د پاکستاني بېرغونو پلور زیات شوي.
