د ایکس یا پخوانی ټویټر مالک ایلان ماسک وايي چې هغه به له ایکس څخه د "بلاک" کولو بټن یا اپشن لرې کړي. دا بټن کاروونکو ته اجازه ورکوي چې نور حسابونه بلاک کړي. منتقدینو د ایلان ماسک دا پریکړه "نامسوولانه" بللې ده.
ایلان ماسک، چې ځان «د بیان د ازادۍ مطلق ملاتړی» بولي، په خپله ایکس پاڼه کې لیکلي: «بلاک د یوه اپشن په توګه لرې کیږي».
خو د نورو حسابونو د «بې غږه» کولو اپشن به وساتي.
د دې اپشن کار دا دی چې د کارنو یا کاروونکو د مشخصو حسابونو د لیدلو مخه نیسي، مګر د بلاکولو برعکس، کارن یې په اړه نه پوهیږي.
په هر حال، منتقدین وايي چې د هغه دا چلند "نامسوولانه" دی.
څیړونکي وایي، چې له هغه وخته چې ماسک د دې ادارې چارې په غاړه اخیستې، په دې پلټفارم کې د کرکې او یهوديزم پر ضد خبرې زیاتې شوې دي.
ځینو حکومتونو هم دا شرکت تورن کړی چې په منځپانګه کې د بدلون لپاره په کافي اندازه کار نه کوي.
د ماسک لخوا دا پریکړه ممکن هغه د «اپل اپ» او «ګوګل پلې» شرکتونو لخوا شامل شويو لارښوونو سره په ټکر کې کړي.
«اپل» وایي چې د کارنو لخوا رامنځته شوي د منځپانګې پروګرامونه باید د ناوړه ګټه اخیستونکو د حسابونو د بندولو توان ولري.
«ګوګل پلې» شرکت هم وایي، چې پروګرامونه باید د کارن لخوا د رامنځته شوې محتوا د بندولو لپاره یو سیستم وړاندې کړي.
د ایکس اجراییوي مدیره لینډا یاکارینو، د ماسک د پریکړې دفاع وکړ او ویې ویل: «په ایکس کې زموږ د کارنو خوندیتوب زموږ لپاره لومړیتوب لري او موږ په هڅه کې یو چې د بندولو او بې غږه کولو څخه بهتره لار ومومو».
