د امریکا په هاوایي ایالت کې د اور لګیدنې د تلفاتو د زیاتوالي په دوام او پر سیمه ییزو چارواکو تر ډېرو نیوکو وروسته د دغه ایالت د بېړنیو حالاتو د ادارې مشر له خپلې دندې استعفا کړې ده.
په ښکاره توګه د هرمان اندایا د استعفا لامل د هغه خراب روغتیایي وضعیت بلل شوی، خو د هغه د روغتیا په اړه نور جزئيات نه دي خپاره شوي.
د ماوي ښاروال ریچارد بېسن ویلي، چې د هغه استعفا سملاسي منل شوې او د هغه ځای ناستی به ډېر ژر وټاکل شي.
تر دې وړاندې دا نیوکه کېده، چې په ماوي کې د ۸۰ خطر زنګونو له ډلې هیڅ یوه یې هم زنګ نه دی وهلی او د ښاغلي اندایا په مشرۍ یوه ویاند دا خبر هم تایید کړی و.
د هاوایي دغه چارواکی د چهارشنبې په ورځ د خبریالانو لخوا وپوښتل شو، چې د خطر د زنګ پر نه وهلو پښېمانه نه یاست؟ نوموړي په ځواب کې ویلي و، چې بخښنه نه غواړي، ځکه کېدای شوای د زنګ په غږولو سره «خلک په اور کې ولوېږي.»
دا په داسې حال کې ده، چې د امریکا د رسنیو د راپورونو له مخې إه ماوي ټاپو کې ۱۱۱ کسان وژل شوي او شاوخوا زر نور ورک شوي دي.
سیمه ییزو چارواکو ویلي، چې د زمري پر ۱۷مه د ماوي ټاپو په کلتوري او سوداګریز مرکز، لهاینا ښار کې اور ولګید، چې تر دې مهاله هره ورځ د لټون په عملیاتو کې زیات قربانیان موندل کېږي.
د هاوایي ایالت قوماندان جشوا ګرین ویلي، ښایي د مړو شمېره نوره هم لوړه شي.
د امریکا یوې فدرالي ادارې د جمعې په ورځ د ( د زمري ۲۷ مه ) اعلان وکړ، چې په هوایي کې د اور لګېدنې د قربانیانو کورنیو ته یې ۵،۶ میلیونه ډالره ورکړي دي.
همدارنګه د جاپان لومړي وزیر فومیو کشېدا د امریکا د مریلنډ ایالت په ډېوېډ کمپ کې د امریکا له ولسمشر جوبایډن او د سویلي کوریا له ولسمشر ویون سوک یول سره په ګډه غونده کې وویل، چې دوه میلیونه ډالره د هاوایي له قربانیانو سره مرسته کوي.
