طالبان وايي، د ازبکستان د ټرانسپورټ وزیر تورخم بندر د ټرانزېټ په برخه کې مهم بللی او ویلي یې دي چې هېواد یې هڅه کوي د افغانستان اقتصاد او ټرانزېټ ته وده ور کړي. طالبان وايي، الهام محکوموف د یوه پلاوي په مشرۍ د یکشنبې په ورځ تور خم ته تللی دی.
د باختر اژانس د راپور له مخې: «دغه پلاوي تورخم بندر د ټرانزیټ لپاره یوه مهمه او اساسي لار وبلله او یادونه یې وکړه، چې موږ کوشش کوو د افغانستان ټرانزيټ او ملي اقتصاد ته وده ورکړو، څو په دغه برخه کې ځان بسیاینې ته ورسیږي.»
د هغه په خبره، د افغانستان له لارې سوېلي او منځنۍ اسیا نښلولو سره به د دغه هېواد ملي اقتصاد هم ډېر پراخ شي.
ازبکستان غواړي د افغانستان له لارې تر پاکستان د افغان ټرانس په نوم پټلۍ وغځوي او له دې لارې دا په وچه ایسار هیواد پر سوېلي اسیا سربېره له نورې نړۍ سره ونښلي.
د ازبکستان د صنعت او تجارت وزارت د لومړي مرستیال ناظم جان خالمرادوف په مشرۍ دېرش کسیز پلاوی پرون کابل ته د دوه ورځني سفر لپاره تللی دی.
د دې پلاوي غړو نن د طالبانو د صنعت او تجاره وزارت او کرنې وزارت له چارواکو سره هم ناستې درلودې.
د طالبانو د کرنې وزیر عطاالله عمري له تاشکند د کرنې په برخه کې همکاري غوښتې ده.
په تېر مارچ یا د وري لومړیو کې هم د ازبکستان د ملي امنیت شورا د سلاکار عبدالعزیز کاملوف په مشرۍ حکومتي پلاوی کابل ته تللی و.
دغه پلاوي د ملا برادر په ګډون له مختلفو طالب چارواکو سره پر اقتصادي او ټرانزیتي مسلو سربېره پر پټلۍ، برېښنا او قوش تېپې کانال خبرې درلودې.
