افغانستان او پاکستان د نړۍ هغه دوه هېوادونه دي، چې تراوسه هم پکې د ګوزڼ ناروغي شته. د ماشومانو لپاره د ملګرو ملتونو د ملاتړ صندوق "یونسېف" په یوه راپور کې راغلي، چې نن د افغانستان په شپږو ولایتونو کې د ګوزڼ ضد واکسین څلور ورځنی کمپاین پیل شو.
د ګوزڼ ضد واکسین د کمپاین بهیر تېره اونۍ هم په ځینو ولایتونو کې وشو، چې په ترڅ کې یې څه باندې ۱۱ میلیونه ماشومانو واکسین شول.
دا په داسې حال کې ده، چې یوازې روان کال په افغانستان کې د ګوزڼ پنځه مثبتې پېښې ثبتې شوې دي.
د یونسېف په وینا، د ګوزڼ ضد واکسین په دغه بهیر کې چې په بلخ، جوزجان، سمنګان، سرپل، فاریاب او ارزګان ولایتونو کې ترسره کېږي، څه باندې یو نیم میلیونه ماشومان به واکسین شي.
د ماشومانو د ګوزڼ یا پولیو پرضد د واکسین دغه بهیر د طالبانو د عامې روغتیا وزرات لهخوا د یونسېف او د روغتیا نړۍوال سازمان په مرسته پرمخ وړل کېږي.
سره له دې چې له کلونو راهیسې له بېلابېلو لارو په افغانستان کې د ماشومانو ګوزڼ یا پولیو پر ضد ښه عامه پوهاوی شوی؛ خو بیا هم د پولیو نوې مثبتې پېښې ثبتېږي.
د روغتیاپالو په خبره، پولیو درملنه نهلري خو پرې د اخته کېدو د مخنیوي یوازینۍ لاره یې د ګوزڼ پر ضد د واکسین د دوه څاڅکو څڅول دي.
اوسمهال افغانستان او پاکستان د نړۍ هغه دوه هېوادونه دي، چې د پولیو ویرس په کې لا هم شته.
د ماشومانو لپاره د ملګرو ملتونو د ملاتړ صندوق "یونسېف" وايي، دغه ویروس د افغانستان په محدودو سیمو کې پاتې دی او که کورنۍ د خپلو ماشومانو د واکسین په برخه کې ناغیړي ونهکړي؛ نو دغه ناروغي به په افغانستان کې هم تر راتلونکې یوه کاله له منځه ولاړه شي.
