په پنجشېر ولایت کې د طالبانو مالي مسوولین وايي، چې په ۱۴۰۱ مالي کال کې یې له ۶۳ میلیونو افغانیو ډېر مالیات راټول کړي دي. د طالبانو تر کنټرول لاندې ملي ټلویزیون خبر ورکړ، چې دغه پېسې په پنجشیر ولایت کې د طالبانو د حکومت حساب ته تللي دي.
د دغه راپور له مخې، دغه پیسې د دولتي ادارو، خصوصي شرکتونو، اصنافو او نورو مالیاتي عوایدو له لارې ترلاسه شوې دي.
ویل شوي، چې دغه ۶۳ میلیونه افغانۍ د احصایې او مالوماتو، د پوهنې، لوړو زدهکړو موسسو، ښار جوړونې، مستوفیت او د پاسپورټ له ریاستونو راټولې شوې دي.
په پنجشير ولایت کې د طالبانو د ادارې د عوايدو د راټولولو مسوول لطف الله باور باختر خبري ژانس ته ويلي، چې د دغې ډلې عوايد په راڼه ډول راټوليږي.
طالبانو تر اوسه د ۱۴۰۲ کال په وروستیو څو میاشتو کې له پنجشیر څخه د خپلو عوایدو په اړه راپور نه دی خپور کړی؛ خو طالبانو په زمري میاشت کې اعلان وکړ چې د پنجشیر ولایت په حصه اول ولسوالۍ کې یې د زمردو کان کیندنه پیل کړې ده.
