د افغانستان کرېکټ بورډ د یکشنبې په ورځ د اسیا جام لپاره د حشمت الله شهیدي په لوبډلمشرۍ د ملي لوبډلې ۱۷-کسیز نوملړ اعلان کړ. دغه سیالۍ به راتلونکې چارشنبه پیل او تر ۱۸ ورځو د پاکستان او سریلانکا په کوربتوب په بېلابېلو ښارونو کې روانې وي.
د افغانستان کرېکټ بورډ د غوراوي کمېټې مشر اسدالله خان په خبري ناسته کې د دې نوملړ اعلانولو سره وویل، چې دې جام کې به حشمت الله شهیديد افغان ملي ټیم لوبډلمشر او رحمت شاه زرمتی به مرستیال لوبډلمشر وي.
د نوموړي په خبره، رحمن الله ګربز او اکرام علي خیل ویکټ ساتونکيدي.
د دې جام لپاره پاتې لوبغاړو کې ابراهیم ځدراڼ، ریاض حسن، نجیب الله ځدراڼ، محمد نبي، کریم جنت، ګلبدین نایب، راشد خان، عبدالرحمن، شرف الدین اشرف، مجیب الرحمن، نور احمد، محمد سلیم ساپی او فضل الحق فاروقي شامل دي.
افغان ملي لوبډله به په اسیا جام کې لومړۍ لوبه د سپټمبر میاشتې په دریمه د بنګله دېش او دویمه لوبه د همدې میاشتې په پنځمه له سریلانکا سره ولري.
دواړه سیالۍ به د پاکستان په لاهور ښار کې ترسره شي.
اسیا جام سیالیو کې د افغانستان، پاکستان، هند، بنګله دېش، سریلانکا او نېپال لوبډلې سره لوبېږي.
