فرزانه جمالزاده د طالبانو واکمنېدو پسې له دې وېرې کډواله شوه چې له امریکا سره کار به یې له خطر سره مخ کړي. امریکا ته په رسېدو یې نیویارک کې له خیریه ادارې سره دنده پیدا کړه چې د کور کرایه او نورې اړتیاوې پوره کړي، خو اوس د کار اجازه نه لري.
د اګسټ په پای ته رسېدو سره د مېرمن جمالزاده او د هغې د مېړه فرهاد د کار اجازه ختمه شوې او د دایمې مېشتېدو لپاره د کډوالو ادارې سره مرکې ته په انتظار به د اونیو یا ډېر وخت لپاره له نامعلوم برخلیک سره مخ وي.
نوموړې وايي: «بچت پیسې هم را سره ډېرې نشته، که بېمه یا مالي مرسته بایلو، نو څه به کوو؟ روغتیايي بېمه هم ډېره ګرانه ده ډېره.»
څه باندې اویا زره هغه افغانان د کډوالۍ اسنادو سره لاس ګرېوان دي چې له ۲۰۲۱ کال راهیسې امریکا ته د ملګرو هرکلي پروګرام په چوکاټ کې تللي دي.
د مېرمن جمالزاده او د هغې د مېړه په ګډون ډېری افغانانو داسې بشرپال اجازه لیک ترلاسه کړی چې له مخې یې دوی تر دوو کلونو په امریکا کې پاتېدلی او کار کولی شي.
په جون کې د جو بایډن په مشرۍ د امریکا حکومت دا سند د دوو نورو کلونو لپاره وغځاوه، خو لا هم لنډمهالی دی.
د متحده ایالاتو د قانون جوړونکو، پخوانیو سرتیرو او مدافع وکیلانو دوه اړخیز ایتلاف په کانګرس فشار راوړي چې د افغانستان د سمون لایحې په نوم د قانون له مخې افغانانو ته د دایمي استوګنې او تابعیت ور کولو ته لار پیدا کړي.
خو د جمهوريپالو په مشرۍ ولسي جرګه کې دې قانون ته پام نه کېږياو په سنا یا مشرانو جرګه کې هم پاتې دی، چې ډیموکراټان پکې لږکي دي.
د کډوالو ملاتړې ډلې سره تړاو لرونکی ډانیلو زاک وايي، د بشپرپال اجازه لیک له لارې امریکا ته راغلي افغانان ښايي د دایمي استوګنې ترلاسولو کې له ننګونو سره مخ شي.
د نوموړي په خبره، ډېر افغانان د کډوالۍ ملاتړ نشي ترلاسولی.
خو د ډېرو نورو افغانانو برعکس جمالزاده او مېړه یې د دایمي استوګنې چانس لري.
له امریکا سره کاري مخینه یې مرسته ور سره کوي چې د کډوالۍ ځانګړې ویزې غوښتنه وکړي.
دا ویزه د ژباړنو او نورو هغو کسانو لپاره ده چې په افغانستان کې یې له امریکايي ځواکونو سره د دوو لسیزو بهیر کې همکاري کړې ده.
د دایمي استوګنې د ترلاسولو لپاره جمالزاده او مېړه یې باید د سپټمبر پر ۱۲ حکومتي مرکې ته حاضر شي.
جمالزاده هیله لري چې کانګرس به دې ستونزې ته یوه لار برابره کړي چې په امریکا کې نور افغانان ځانونه لا ډېر خوندي وبولي.
د اګسټ پر ۳۱ د امریکا ولسمشر له افغانستان د امریکايي ځواکونو د دویمې کلیزې مناسبت غونډه کې هم له کانګرس وغوښتل چې افغانانو ته د دایمي استوګنې ورکولو لپاره قانون تصویب کړي.
ولسمشر بایډن دا هم وویل، چې د طالبانو له واکمنېدو راهیسې یې تر یو لک اویا زره ډېرو افغانانو ته پنا ور کړې ده.
هغه دا هم وویل، چې له افغانانو سره د امریکا ملاتړ به روان وي.
