الجزیرې د دغه خبر په خپرولو سره همداراز زیاته کړې، دغه لیدنه په داسې حال کې کېږي چې انقره او ملګري ملتونه غواړي د اوکراین د غَلو دانو د صادراتو تړون بېرته راژوندی کړي، چې د نړۍوال خوراکي ناورین په کمولو کې مرسته کوي.
د کرملېن ویاند دیمیتري پېسکوف تېره ورځ ویلي، چې پوتین او اردوغان به د دوشنبې په ورځ د روسیې د تور سمندرګي په سوچي ښار کې سره وګوري؛ خو نوموړي ډېر جزئیات نه دي ورکړي.
د دغه تړون په مرسته غلې دانې او نور خوراکي توکي د افریقا، منځني ختیځ او اسیا هغو سیمو ته استول کېدل چې د لوږې ګواښ په کې د زیاتېدو په حال کې دی.
دغه تړون هغه وخت پای ته ورسېد، چې روسیه په یو اړخیزه توګه د جولای په میاشت کې ترې ووتله.
ترکیې د ملګرو ملتونو سره په ګډه د ۲۰۲۲ کال د جولای په میاشت کې دا تړون لاسلیک کړ.
دغه تړون اوکراین ته اجازه ورکړه، چې له روسیې سره د جګړې پر مهال د تور سمندرګي له درېیو بندرونو څخه د خوراکي توکو بار وړل له سره پیل کړي.
د ترکیې د بهرنیو چارو وزیر هاکان فېډان د جمعې په ورځ په مسکو کې د اردوغان او پوتین ترمنځ له لیدنې مخکې د روسیې د دفاع وزیر سرګي شویګو سره وکتل.
شویګو وویل، چې روسیه د غلې دانې د تړون د ناکامۍ په برخه کې ملامته نه ده او د روسیې پر دریځ یې ټینګار وکړ؛ که له روسیې سره شوې ټولې ژمنې پوره شي نو مسکو به دغه تړون ته ورستنه شي.
د ملګرو ملتونو سرمنشي انتونیو ګوترېش د پنجشنبې په ورځ ویلي، چې د روسیې د بهرنیو چارو وزیر سرګي لاوروف د تړون د بیا ژوندي کولو په موخه "د قوي وړاندیزونو یوه ټولګه" لېږلې ده.
د ترکیې د بهرنیو چارو وزیر د پنجشنبې په ورځ په مسکو کې د یوې غونډې پرمهال وویل، چې د دغې هوکړې بیا رغول د نړۍ لپاره ډېر اهمیت لري.
