د اوهایو پولیسو داسې انځورونه خپاره کړي، چې ښيي یو افسر پر یوې تورپوستې مېندواره مېرمنې ډزې کوي. ۲۱ کلنه تاکیا یانګ د اګست په ۲۴مه د خوراکي توکو د پلورنځي په پارکېنګ کې له هغې وروسته ووژل شوه، چې د پولیسو غوښتنه یې په پام کې نهوه نیولې.
د اوهایو پولیسو هغه انځورونه خپاره کړي، چې د امنیتي مامور په بدن کې د ځای پر ځای شوې کمرې پر مټ اخېستل شوي او ښيي، چې یو پولیس افسر پر یوې تور پوستې مېندوارې مېرمن ډزې کوي.
دغه فلم ښيي، چې مامورین هڅه کوي له دغې مېرمنې څخه له پلورنځي نه د غلا په تور پوښتنې ګروېږنې وکړي.
په هغه ویډیو کې چې د جمعې په ورځ خپره شوه، لیدل کېږي هغه مهال چې دغه مېرمن د موټر چلولو په وخت د یوه پولیس افسر پر لور روانه ده، هغه پولیس چې موټر ته مخامخ ولاړ دی، د ښځې پر لور ډزې کوي.
په دغې ویډېو کې دوه پولیس افسران ښکاري، چې له ډزو یوه دقیقه وړاندې له مېرمن یانګ څخه غوښتنه کوي چې له خپل موټره ښکته شي. مېرمن یانګ یې په ځواب کې وایي:«د څه لپاره؟» خو په ټوله کې وایي چې نه ښکته کېږي.
پولیس افسرانو ویلي هڅه یې وکړه، چې دغې مېرمنې ته روغتیایي مرسته ورسوي؛ خو و نه توانېدل چې هغه او د هغې په نس کې ماشوم وژغوري.
د پولیسو ادارې په یوې خبر پاڼه کې دغه پېښه یوه «تراژیدي» یاده کړې او ویلي یې دي، چې د مېرمن یانګ د کورنۍ دغه غم او ماتم د درک وړ دی.
د مېرمن یانګ کورنۍ هم دغه کړنه «مجرمانه عمل » بللی دی.
دمګړۍ د هغه پولیس افسر دنده چې ډزې یې کړې وې ځنډېدلې او د پولیسو ادارې د جنایي څېړنو او د اوهایو له لویې څارنوالۍ څخه غوښتي، چې د دغې پېښې په اړه دې پلټنې وکړي.
