د افغانستان د ولسمشر پخوانی مرستیال د افغانستان د ملي مقاومت جبهی او روسیې ترمنځ د "رسمي او ښکاره اړیکو د پیلېدو" ادعا کوي. امرالله صالح روسیې ته د احمد مسعود سفر د رسمي اړیکو او د یو «یو مهم ګام او ستراتیژیک پرمختګ» په مانا بولي.
امرالله صالح وویل، روسي چارواکو له دې سره چې پوهیږي د مقاومت جبهې ستراتیژي وسلواله مبارزه ده د احمد مسعود یې هرکلی یې کړی.
ښاغلي صالح د شنبي په ورځ (د وږي یوولسمه) پر خپله فیسبوکپاڼه په یوه یاددښت کې روسیې ته د افغانستان د ملي مقاومت جبهې مشر احمد مسعود سفر «ښه هیله» بللې ده.
د افغانستان د ملي مقاومت جبهې مشر احمد مسعود د دوشنبې په ورځ (د وږي شپږمه) مسکو ته د سفر په ترڅ کې د روسیې په پارلمان کې د عادل روس ګوند له مشر سرګي میرونوف سره وکتل.
ښاغلی مسعود د روسیې د پارلمان د مرستیال ښاغلي میرونوف په بلنه مسکو ته تللی و.
امرالله صالح دغې غونډې ته په اشارې سره په خپل یاددښت کې ليکلي دي:« د روسيې پارلمان د کرملين له سياستونو سره همدریځی دی او په دې کې شک نشته چې له حکومت سره له همغږۍ او د روسیې د پریکړې نیونې ادارې سره له هوکړې پرته د جبهې د مشر سفر وشي.
تر دې مخکې د روسیې یوه کارپوه اندري سرنکو هم په یوه تحلیل کې لیکلي وو، چې د روسیې په پارلمان کې د مسعود حضور د کرملین له اجازې پرته ممکن نه و.
مسکو ته د افغانستان د ملي مقاومت جبهې د مشر له سفر وروسته، د روسیې د بهرنیو چارو وزارت ویاندې ماریا زاخارووا د چهارشنبې په ورځ (د وږي په ۸ مه) په یوه خبري غونډه کې له سرګي میرونوف سره د ښاغلي مسعود د کتنې په اړه خبرې وکړې.
مېرمن زاخارووا په افغانستان کې د یوه ټول شموله حکومت د جوړېدو غوښتنه هم وکړه.
امرالله صالح چې د افغانستان د ملي مقاومت جبهې له مشرانو څخه دی، د هغه څه په اړه چې جبهه یې له روسیې سره «رسمي او ښکاره اړیکې» بولي نور معلومات نه دي ورکړي.
د افغانستان د ولسمشر پخواني مرستیال یو ځل بیا پر امریکا نیوکه کړې او لیکلي یې دي: «د دوحې د هوکړې پر بنسټ امریکا او ناټو هغه ناوړه سناریو عملي کړه چې زموږ ټولو هېوادوالو ترې کرکه کوله».
تر دې مخکې د عادل روسیې ګوند اعلان کړی و، چې په راتلونکو میاشتو کې به په مسکو کې د احمد مسعود په شتون کې د افغانستان په اړه ناسته ترسره شي.
