د طالبانو امر بالمعروف او نهې له منکر وزارت وايي په خوست کې د دې وزارت د اړوند ریاست پلاوي د ملکي روغتون له مسوولینو سره په اصلاحي ناسته کې له هغوی غوښتي دي، چې ډاکترانې دې حجاب وکړي او د اختلاط د مخنیوي لپاره دې یې کاري ساحه بېله شي.
دغه وزارت د پنچشنبې ورځ - د سنبلې ۱۶ مه - د یوې خبرپاڼې په خپرولو سره ویلي په خوست کې د امربالمعروف ریاست د رییس په مشرۍ یو پلاوي د دې ولایت له ملکي روغتونو څخه په لیدنه کې اړوند مسوولینو ته دا لارښوونه کړې ده چې د ښځینه ډاکترانو کارځي به بېلیږي او حجاب به مراعتوي.
په دغه خبرپاڼه کې راغلي چې پلاوي د ملکي روغتونو ټولو ډاکترانو او کارکوونکو ته سپارښتنه وکړه، چې خپل سیرت او صورت د نبوي ارشاداتو سره سم جوړ کړي.
دغه خبرپاڼه زیاتوي چې د خوست مرکز او ولسوالیو محتسبینو د ۶۷ جوماتونو له ملا امامانو سره د همغږۍ ناسته کې لارښونې کړي چې په ټولنه کې د منکراتو مخنوی وکړي.
دا په داسې حال کې چې د پلازمینې په شمول په یو شمیر ولایتونو کې د طالبانو د محتسبیونو له چلند څخه خلک ناخوښه دي.
افغانستان انټرنشنل څو ورځې وړاندې مستندې ویډیوګانې خپرې کړي، چې د طالبانو محتسبین افغان ځوانان په عامه ځایونو کې په څپېړو وهي او میرمنو ته اجازه نه ورکوي چې پرته له محرم څخه په بازار کې وګرځي او یا هم په موټرو کې سفر وکړي.
دا په داسې حال کې ده چې د وخت په تېریدو سره د طالبانو لخوا په افغانستان کې پر خلکو په بېلابیلو برخو کې محدودیتونه زیاتیږي، چې په کور دننه او بهر یې د خلکو او نړيوالو سازمانانو غبرګونونه راپارولي دي.
