د پاکستان د کورنیو چارو لنډمهالي وزیر یو ځل بیا "د افغانستان له خاورې په پاکستان کې د تاوتریخوالي په زیاتوالي" نیوکه وکړه. سرفراز بګټي ویلي، چې تیره اوونۍ په چترال کې د پاکستاني طالبانو برید په افغانستان کې پلان شوی و.
سرفراز بګټي ویلي، چې تیره اوونۍ په چترال کې د پاکستاني طالبانو برید په افغانستان کې پلان شوی و، خو تر اوسه روښانه نه ده چې په دغه برید کې افغانان هم لاس لري او که نه.
هغه د خیبر پښتونخوا په چترال سیمه کې د تېرې چهارشنبې په ورځ د پاکستاني طالبانو هغه برید ته اشاره وکړه چې پکې ګڼو پاکستاني پوځیانو ته مرګ ژوبله اوښتې وه.
د پاکستان د کورنیو چارو لنډمهاله وزیر په اسلام اباد کې د یوې خبرې غونډې پر مهال هیله څرګنده کړه چې افغان طالبان دې د دوحې تړون عملي کړي او ډاډ دې ورکړي چې د افغانستان خاوره به د چا پر ضد نه کارول کېږي.
دغه پاکستاني چارواکي په چترال کې د برید کوونکو هویت ته په اشارې سره زیاته کړه: «دا مهمه نه ده چې دا برید چا کړی دی، زموږ لپاره دوی ټول ترهګر دي."
د پاکستان دغه امنیتي چارواکی وايي، د ترهګرۍ د کچې لوړېدل دومره لوی نه دي، چې موږ وویروي.
نوموړي ټینګار وکړ چې حکومت به هیچا ته اجازه ورنه کړي چې خپلې غوښتنې پر موږ په زور وتپي.
په چترال کې د تېرې اوونۍ د برید په غبرګون کې د پاکستاني طالبانو ویاند دا برید یو لوی عملیات بللياو ادعا یې کړې وه چې د ټي ټي پيڅو کلي هم نیولي.
چترال د افغانستان له کونړ، نورستان او بدخشان ولایتونو سره ګډه اوږده پوله لري.
