د طالبانو او ایران د انرژۍ وزیرانو د هرات د برېښنا د ستونزو په اړه خبرې کړي
د طالبانو د انرژۍ او اوبو وزیر او د ایران د اسلامي جمهوریت د انرژۍ وزیر د هرات د برېښنا د ستونزو د حل په اړه ټیلیفوني خبرې وکړې.
د طالبانو د انرژۍ او اوبو وزیر او د ایران د اسلامي جمهوریت د انرژۍ وزیر د هرات د برېښنا د ستونزو د حل په اړه ټیلیفوني خبرې وکړې.
د طالبانو د انرژۍ وزارت په یوه خبرپاڼه کې لیکلي، چې علي اکبر محرابیان له عبداللطیف منصور سره ژمنه وکړه چې د برېښنا د قرارداد د نوي کولو او د هرات د برېښنا د پرچاوۍ د حل په برخه کې به همکاري وکړي.
افغانستان د برېښنا په برخه کې پر ګاونډیو هېوادونو تکیه کوي. د هرات برېښنا په عمده توګه د ایران او ترکمنستان له خوا تامین کیږي.
د ایران د انرژۍ وزارت د طالبانو د کابینې له دغه غړي سره د ټیلیفوني خبرو او د هرات د برېښنا د ستونزو په اړه څه نه دي ویلي او د طالبانو د اوبو او انرژۍ وزارت هم په دې اړه وضاحت نه دی ورکړی.
د طالبانو د انرژۍ او اوبو وزارت وايي؛ په دې ټيلیفوني خبرو کې دواړو لورو موافقه کړې، چې د طالبانو پلاوی به د هرات د برېښنا د ستونزو د حل لپاره ایران ته سفر وکړي.
هرات د افغانستان یو له صنعتي ښارونو څخه دی او په دغه ولایت کې د برېښنا پر پرچاوۍ څو ځلې نیوکې شوې دي.
