د پاکستان پخوانی بهرنیو چارو وزیر او د دغه هېواد د تحریک انصاف ګوند مرستیال مشر شاه محمود قریشي وايي، په بند کې «هر جبر» په مېړانه زغمي شاه محمود قریشي د چارشنبې په ورځ محکمې ته د تلو پر مهال خبریالانو ته ویلي چې «بې ګنا او سیاسي» بندي دی.
د نوموړي د همدې خبرو ویډیو خواله رسنیو کې لاس په لاس کېږي چې وايي، له خدای غواړي چې هر جبر وزغمي.
نوموړی قاضي ته په خطاب کې وايي، چې ممکن انصاف وځنډول شي، خو پټېدلی نه شي.
د هغه په خبره، په اډیاله بند کې یوازې ساتل کېږي او د نورو بندیانو په څېر چکر ته هم نه پرېښودل کېږي.
شاه محمود قریشي دا هم وايي، چې خپل هېواد پرې ګران دی او کله یې هم ور سره خیانت نه دی کړی او که یې کومه غداري کړې وي، نو پانسي ته تیار دی.
شاه محمود قریشی د تېرې اګسټ میاشتې پر ۱۹ په اسلام اباد کې د پولیسو له خوا په خبل کور کې ونیول شو.
تر دې مخکې هم شاه محمود قریشي نیول شوی، خو له څو ورځو بند تېرولو وروسته خوشی شوی دی.
