د طالبانو د ریاست الوزرا مرستیال کابل کې د چین له نوي سفیر سره په کتنه کې ویلي،چې پر تایوان د چین له تسلطه ملاتړ کوي. هغه د کمربند او سړک جوړونې په کار کې د چین د بهرنۍ پانګونې په اړه هیلهمندي وښوده، چې افغانستان هم په دغې تګلارې کې شامل دی.
د کمربند او سړک پروژه چې سلګونه ملیارډ ډالره لګښت پرې راځي، چین یې د پورونو په بدل کې لکه د لویو لارو، سرحدي ودانیو، اسمان څکو ودانیو، د اوسپنې پټلۍ، پلونو او هوایي ډګرونو په څېر د نړۍ په اویاو هېوادونو په تېره بیا په اسیایي او افریقایي هېوادونو کې جوړوي.
امریکا دغه تکلاره په اسیایي او افریقایي هېوادونو کې د چین د نفوذ د زیاتولو لپاره وسیله ګڼي. واشنګټن وایي، هغه هېوادونه چې د دغه سړک او کمربند پر سر پراته دي د چین تر پورونو لاندې راځي، چې د دغو پورونو د پرې کولو توان نهلري او په دې توګه د چین تر نفوذ لاندې راتلای شي.
حنفي هم ویلي، چې طالبان په دغه تکلاره کې ورګډېدو ته لېواله دي او زیاتوي چې هڅه کوي د بېلابېلو دهلیزونو له لارې له دغې پروژې سره ونښلول شي.
څه موده وړاندې د طالبانو د رییس الوزرا اقتصادي مرستیال ملا برادر هم په دغه پروژه کې د افغانستان د ورګډېدو غوښتنه کړې وه.
طالبانو د چین سفیر له قوله لیکلي، چې «موږ په افغانستان کې د تل پاتې سولې او ټیکاو ملاتړي یو او په سترو اقتصادي پروژو کې د افغانستان د ورګډولو لپاره په ګډه سره کار او مشوره کوو.»
حنفي پرته له دې چې کوم هېواد ته ګوته ونیسي، وایي چې «ځينې هېوادونه د افغانستان د بد نامولو لپاره منفي تبلیغات کوي؛ خو په افغانستان کې د چین حضور او همکارۍ دغه تبلیغات ناسم ثابت کړي دي.»
هغه دا رنګه «نړۍ ته د افغانستان د رښتیني انځور په وړاندې کولو کې» د چین رول وستایه.
د طالبانو دغه لوړ پوړي چارواکي د «یو واحد چین» له سیاسته ننګه وکړه چې له مخې یې تایوان د چین یوه برخه ده او د خپلواکۍ د اعلانولو حق نه لري. لویدیځ چارواکي اندېښنه لري چې چین غواړي په زوره دغه ټاپو تر خپلې ولکې لاندې راولي او له خپلې جغرافیې سره یې یو ځای کړي.
واشنگټن چین ته خبرداری ورکړی که پر تایوان یې برید وکړ، نو هغوی به له تایوانه ننګه وکړي.
