روسیه وايي امریکا اوکراین ته "تر ټولو خطرناکې وسلې" ورکوي
په واشنګټن کې د روسیې سفارت وايي، امریکا اوکراین ته "تر ټولو خطرناکې وسلې" ورکوي. دغه سفارت په یوه خبرپاڼه کې ویلي چې متحده ایالات غواړي کیف ته د دغو وسلو په ورکولو سره د اوکراین «ناکام ځوابي برید» جبران کړي.
د اوکراین ولسمشر ولادیمیر زیلینسکي د پنجشنبې په ورځ (د سنبلې په ۳۰ مه) د امریکا له ولسمشر جوبایډن او د دفاع له وزیر لویډ اسټن سره وکتل او خبرې یې وکړې.
امریکايي چارواکو په دغو غونډو کې اعلان وکړ چې اوکراین ته د پوځي مرستو یوه نوې بسته لېږي.
په واشنګټن کې د روسیې سفارت د پنجشنبې په ورځ ـ سپتمبر ۳۰ ـ په یوه خبرپاڼه کې وویل: په کیف کې خپلو پیرودونکو ته د واشنګټن د وسلو او پیسو پرله پسې لېږلو هیڅوک حیران نه کړل او اوس امریکا چمتو ده چې ان خپل خطرناک پوځي تجهزات اوکراینیانو ته ور کړي.
په واشنګټن کې د روسیې سفارت وايي، د اوکراین وسله وال ځواکونه خپلو اهدافو ته نه دي رسېدلي او د افرادو او تجهیزاتو په برخه کې یې ډېر زیان لیدلی او امریکايي کارپوهان په دې خبره پوه شوي دي.
په همدې حال کې د روسیې سفارت له کیف سره د واشنګټن مرستې بې ګټې وبللې او ادعا یې وکړه چې د لویدیځ دا هڅې په ډګر کې د وضعیت د بدلولو توان نه لري، بلکې د جګړې او ورانۍ د لا اوږدولو لامل به شي.
پر اوکراین د روسیې د برید له پیل راهیسې، واشنګټن له کیف سره تر ۴۳ میلیارد ډالرو زیاته پوځي مرسته کړې ده.